சொல்.52

Posted by அகத்தீ Labels:




தினம் ஒரு சொல் .52 [ 20 /10/2018 ]

என் தாத்தா குடுமியையும் தலைமுடி முன்வெட்டையும் மாற்றி கிராப்புக்கு மாறியபோது வீடே அல்லோகலப்பட்டதாம் . குடியே மூழ்கிவிட்டதாய் அவரது தாத்தாவும் பாட்டியும் அழுது ஆர்ப்பாட்டம் செய்தார்களாம் . இத்தனைக்கும் எம் குடும்பம் பிராமணர் அல்ல .

என் பாட்டி ஜாக்கெட் போட்ட போதும் அதே ஆர்ப்பாட்டம்தான் .

என் அப்பா பெரிய வெங்காயத்தில் தயிர் பச்சடி செய்யச் சொன்னபோதும் ;என் அம்மா அதை செய்த போதும் வீட்டுக்குள் பூகம்பமே வெடித்தது . முட்டை வீட்டுக்குள் நுழைந்த போதும் அப்படித்தான் .

வீட்டுக்குள் கக்கூஸ் கட்டலாமா வேண்டாமா என்பதற்காக நடந்த சண்டை கொஞ்சமா ?

அக்கா வயதுக்கு வந்த பின்னும் பள்ளிக்கு அனுப்ப [ ஐம்பது அறுபது வருசங்கள் முன்பு ] அப்பா ஆச்சியோடு முட்டி மோதியது நினைவில் இருக்கிற்து ஆனாலும் எட்டாம் வகுப்பைத் தாண்டவிடவில்லை .

ஐயர் பையன் லெதர் டெக்னாலஜி படிப்பதும் ; அருந்ததியர் மகள் முட்டி மோதி டாக்டராவதும் மரபை மீறித்தானே ! கணித மேதை ராமானுஜம் வெளிநாடு போனதற்காக அவர் இறந்த போது இறுதிக்கடன் செய்ய சக ஐயர்கள் மறுத்ததும் , அவர் மனைவி கிராமம் கிராமமாய் ஓடி ஒழிந்து செய்ததும் .வரலாறு .இன்று அத்திம்பேர் ஆஸ்திரேலியா ,அண்ணா யூஎஸ் என பீத்திக் கொள்வது மரபை மதித்தால் கிடைக்குமா ?

வீட்டுக்குள் எவ்வளவு மாற்றம் ? கோயிலும் வழிபாடும் மாறாமலா இருந்திருக்கிறது ? சைவமும் வைணவமும் போட்ட சண்டை கொஞ்சமா ? இப்போது மிச்ச சொச்சம் அங்கொன்று இங்கொண்று உண்டு . ஆயினும் எல்லா கோயிலுக்கும் எல்லோரும் போவர் .

மாறாத மரபோ .சடங்கோ ,சம்பிரதாயமோ ,பழக்க வழக்கமோ என்றும் எங்கும் எப்போதும் இல்லை ,மாற்றங்கள் நிகழும் போதெல்லாம் பழமைவாதிகள் முட்டி மோதுவர் . ஆனாம் புதுமையே வெல்லும் ,பழமை வீழும் .




























































































சொல்.51

Posted by அகத்தீ Labels:




தினம் ஒரு சொல் .51 [ 19 /10/2018 ]

என் நண்பர் ஒருவர் ஒரு முறை உரையாடும் போது வேதனையோடு சொன்னார்   பாலின சமத்துவத்தை நானும் ஏற்கிறேன் .அதன் பக்கம் உறுதியாக நிற்கிறேன் . .ஆனால் குடும்பத்தில் பெண்கள் செய்வதெல்லாம் நியாயமா ? கண்மூடி ஆதரிப்பது சரியா ?” என வெடித்ததோடு அவருக்கு ஏற்பட்ட பல கசப்பான அனுபங்களைப் பகிர்ந்தார் .

மெய்தான் . பெண்களின் சில பிடிவாதங்கள் பிழையான புரிதலோடு இருப்பது கண்கூடு .அவற்றை மாதர் இயக்கங்கள் தக்க முறையில் சுட்டிக்காட்ட வேண்டும் .எடுத்துக்காட்டாக ,சடங்கு ,சம்பிரதாயம் ,பூஜை , மூடநம்பிக்கைகள் ,கரடுதட்டிப்போன பழக்க வழக்கங்கள் போன்றவற்றை தொடர்ந்து பேணிக்காப்பதில் பெண்களின் பங்கு மிகப்பெரிது .இவற்றுக்கு எதிராக மாதர் இயக்கங்கள் சமரசமற்ற விழிப்புணர்வு முயற்சியை தொடர வேண்டும் . ஐயமே இல்லை .

குடும்பத்தை நிர்வகிப்பதில் கணவன் ,மனைவி இருவரும் சம பொறுப்பாளர்கள் .குடும்ப பட்ஜெட் , குழந்தை வளர்ப்பு ,உள்ளிட்ட எதுவாயினும் கலந்துரையாடி முடிவெடுக்க வேண்டும் .ஆனால் நிர்வாகத்தில் டிரான்ஸ்பரன்ஸி அதாவது வெளிப்படைத்தன்மை இருந்தால் மட்டுமே இது சாத்தியம் .இரு பக்கமும் ஹிட்டன் அஜெண்டா அதாவது மறைமுக காய்நகர்த்தல் இருப்பின் குடும்ப ஜனநாயகம் வெறும் பேச்சாகவே இருக்கும் .இதில் ஆணின் குறைகளைச் சுட்டுவதுபோல் பெண்ணின் பக்கம் உள்ள குறைகளையும் எடுத்துச் சொல்வது பிழையே அல்ல .தேவையே !

ஆணாதிக்கம் என்பது ஆணிடம் மட்டுமே உள்ள தீய குணமல்ல . ஆணாதிக்கம் என்பது சமூகம் குறித்தும் குடும்பம் குறித்தும் ஆணை மையப்படுத்திய ஆதிக்க மனோநிலையாகும் .இது ஆணிடம் ஓங்கி இருக்கும் .பெண்ணிடமும் அவளின் பல பேச்சுகளில் செயல்களில் வெளிப்படும் .ஆதிக்க மனோநிலையை யார் வெளிப்படுத்தினும் குற்றம் குற்றமே !

பாலின சமத்துவத்தில் துளியும் பிசகக்கூடாது  . அதேவேளை அநீதி ,அராஜகம் ,அறியாமை எங்கு யாரிடம் வெளிப்படினும் – ஆணிடம் ஆயினும் பெண்ணிடம் ஆயினும் எடுத்துரைக்க தயங்கவே கூடாது .இரண்டும் ஒன்றுக்கு ஒன்று எதிரி அல்ல ; நடைமுறையில் ஆதிக்கத்திற்கு எதிரான இரட்டைக்குழல் துப்பாக்கியே ஆகும் !





















































































சொல்.50

Posted by அகத்தீ Labels:




தினம் ஒரு சொல் .50 [ 18 /10/2018 ]

எலித் தொல்லை ஓய்வதே இல்லை . எட்டாவது மாடிக்கும் வந்துவிடுகிறது .எலிமருந்து ,எலி பிஸ்கேட் ,எலி பேஸ்ட் எல்லாம் முயற்சி செய்தாயிற்று .பலனில்லை .எலிப் பொறியும் கருவாடுமே ஆகச் சிறந்த வழி .ஆயினும் சில வாரங்களிலேயே மீண்டும் எலி வந்துவிடும் .

கொசுவும் அப்படித்தான் எத்தனை மாடியாயினும் முகவரியைத் தெரிந்து வந்துவிடும் .விதவிதமான கொசுவத்தி மருந்து எல்லாம் அதற்கு டானிக் ஆகிவிடுகிறது . நொச்சி இலை கொஞ்சம் பலன் தரும் ஆயினும் கொசுவிலிருந்து தப்ப வலையே உத்திரவாதமான ஒரே வழி .

கரப்பான் பூச்சிக்கு நீங்கள் மருந்தை மாற்றி மாற்றி அடிக்கிறீர்கள் . தன்னை எப்படியோ அதற்கொப்ப தகவமைத்து மீண்டும் வந்து விடுகின்றன .எல்லா உயிரினங்களும் தன்னை சூழலுக்கு ஒப்பத் தன்னைத் தகவமைத்துக்கொள்ள தொடர்ந்து போராடுகின்றன . வெற்றி பெறுகிறுகின்றன .

மனிதரென்ன சூழலின் அடிமையா ? இல்லவே இல்லை . மனித குலமும் தொடர்ந்து போராடி வெற்றிக்கொடி நாட்டியே வந்திருக்கிறது .

என் அறிவுக்கு எட்டியவரை பொதுவாய் எந்த விலங்கும் உயிரினமும் தற்கொலை செய்து கொள்வதில்லை . தனக்குத் தானே குழி வெட்டிக் கொள்வதில்லை .ஆனால் மனிதர் மட்டுமே தற்கொலை செய்கின்றனர் . இயற்கையை ஒட்ட உறிஞ்சி தமக்குத்தாமே குழிபறித்துக் கொள்கின்றனர் . ஆயுதங்களைக் குவித்து தமக்குத்தாமே கொள்ளிவைத்துக் கொள்கின்றனர் . நச்சுப் புகைகளால் ,விஷக்கழிவுகளால் காற்றை ,நீரை மாசுபடுத்தி பேரழிவை விளைவித்துக் கொள்கின்றனர் .

எலியும் ,கொசுவும் ,கரப்பான் பூச்சியும் இன்னபிறவும் தாக்குதல்களைத் தாங்கி மீண்டெழுகிறதே தன்னைத் தகவமைத்துக் கொள்கிறதே அதுபோல் உங்கள் சந்ததியால் முடியுமா ? இல்லை அழிந்துதான் போகவேண்டுமா ? யோசித்தால் விழிப்போம் ! யோசிக்க மறந்தால் வீழ்வோம் .வேறென்ன சொல்ல … .

















































































COL.49

Posted by அகத்தீ Labels:


தினம் ஒரு சொல் .49 [ 17 /10/2018 ]

ஒரு முறை மறைந்த எழுத்தாளர் ஜெயகாந்தன் சொன்னார் , “ நான் சிறு வயதாயிருக்கும் போது டிராபிக் போலீஸாக வரவேண்டும் என ஆசைப்பட்டேன் .ஏனெனில் அவர் கையைக் காட்டினால்தான் எல்லா வண்டியும்  நிற்கிறது .போகிறது .அவரே அதிக அதிகாரம் உள்ளவர் என நினைத்தேன்.”

பொதுவாக குழந்தையாய் இருக்கும் போது ஒன்றில் இருக்கிற ஆர்வ்ம் போகப்போக குறைந்து இன்னொன்றுக்குத் தாவிவிடுகிறது . பலர் கல்லூரியில் சேரும் போது இருந்த ஆர்வம் வேகமாய் வற்றி இன்னொரு பக்கம் திரும்பிவிடுகிறது .

படித்தபின் பிழைப்புக்காகத் தேடுகிற வேலை பெரும்பாலும் மனதுக்கு உகந்ததாக இல்லாமல் வாழ்க்கை நிர்ப்பந்தத்திற்கு ஓடிக்கொண்டிருப்போரே அதிகம் .எதிர்பார்ப்பின் ஏமாற்றமும் வலியும் எல்லோரிடமும் ஏதோ ஒரு அளவில் இருக்கத்தான் செய்யும் .

வாழ்க்கைப் பாட்டிற்கு ஏதோ ஒரு வேலை ; தன் ஈடுப்பாட்டிற்கு இலக்கியம் , விளையாட்டு ,சமூகசேவை ,இசை ,அரசியல் என ஏதாவது ஒன்றைத் தேர்ந்து ஓடிக்கொண்டே இருப்பவர்கள் ஓரளவு மன அழுத்தமின்றி நாட்களை நகர்த்திக் கொண்டிருக்கிறார்கள் . தன் ஈடுப்பாட்டிற்குரிய துறையில் வெற்றிக்கொடி நட்டு வாழ்பவர்கள் மிகச் சொற்பமே!

இதிலும் ஆண்களுக்கு கிடைக்கும் அனைத்து சுதந்திரமும் வாய்ப்பும் பெண்களுக்கு கிடைத்துவிடுமா ? கிடைக்காது .அதன் வலியை காயத்தை ஆண் சமூகம் உணர்வதுகூட இல்லை .நம் சமூக கட்டமைப்பு அப்படி .அதையும் மீறி சாதிக்க வருகிற பெண்கள் மீது வீசப்படும் சொல்லம்புகள் சொல்லும் தரமன்று.

ஆணோ பெண்ணோ தனக்குப் பிடித்த ஓர் துறையில் காலூன்றி நடக்க ஏற்ற சமூக அமைப்பும் சூழலும் இங்கு இல்லை .லாபவெறியில் தறிகெட்டலையும் சுரண்டல் சமூகமே இது . இந்த சுரண்டல் அமைப்பை தகர்த்தால்தானே உங்கள் வலியும் காயமும் உங்கள் சந்ததிக்காவது குறையும் மெல்ல ; மெல்ல மறையும்.

சரி ! சரி ! அதற்காக ஒரு வார்த்தையேனும் ஒரு அசைவேனும் உங்களிடம் உண்டா கொஞ்சம் அசைபோடுங்கள்! !













































































சொல்.48

Posted by அகத்தீ Labels:


தினம் ஒரு சொல் .48 [ 16 /10/2018 ]

அந்தக் காலம் போல் இந்தக் காலம் இல்லை . இப்படிச் சொல்லாத பெரியவர்கள் மிகக்குறைவு.இதில் வேடிக்கை என்னவெனில் அவர்கள் இளைஞர்களாக இருந்த போது அவர்களின் தாத்தாவும் இதே வார்த்தைகளைச் சொன்னார்கள் என்பதுதான்.

காலம் ஓடிக்கொண்டே இருக்கும் .மாற்றங்கள் நிகழ்ந்து கொண்டே இருக்கும் . நல்லதும் கெட்டதும் கலந்தேதான் மாற்றங்கள் இருக்கும் . கடந்த காலத்தின் நல்லவற்றை அல்லது தமக்கு பிடித்தவற்றை மட்டும் அசைபோட்டு அங்கலாய்ப்பது பெரியோர் இயல்பு . புதியதின் நல்வாய்ப்பை மட்டுமே பார்த்து பழமையைப் பழிப்பது இளையோர் இயல்பு .

முன்பெல்லாம் ஒரு தலைமுறை என்பது குறைந்தது 35 வருடங்களாவது இருக்கும் .அப்போது மாற்றங்கள் மெதுவாக நிகழ்ந்தன .இப்போது பதினைந்து வருடங்களில் ஒரு தலைமுறை சிந்தனை மாறிவிடுவதாய் பத்தாண்டுகளுக்கு முன்னர் சொன்னார்கள். மாற்றம் அவ்வளவு வேகம் கொண்டுள்ளது .இப்போது பத்தே ஆண்டுகளில் எவ்வளவோ மாறிவிடுகின்றன .

மாறாதது எதுவுமில்லை .மாற்றங்களே நிரந்தரம் . மாற்றங்களூடே தன்னைத் தகவமைத்துக் கொள்வதும் , தன்னைத் தொடர்ந்து புதுப்பித்துக் கொள்வதும் காலத்தின் கட்டாயம் .

பெரியவரோ இளைஞரோ அன்றாடம் நிகழும் மாற்றங்களை உள்வாங்கி தன்னை வளர்த்துக் கொள்ளாவிடில் தொழிலில் ,வாழ்க்கையில் ,சமூகத்தில் தோற்கடிக்கப்பட்டு ஒதுக்கப்பட்டுவிடுவோம் ! இதுதான் காலநியதி ! இது தனிநபருக்கு மட்டுமல்ல .நிறுவனங்களுக்கு ,இயக்கத்துக்கு அனைத்துக்கும் பொருந்தும் .

மாற்றங்களூடே உங்களைச் செதுக்கிக்கொண்டே இருங்கள் !









































































சொல்.47.

Posted by அகத்தீ Labels:


தினம் ஒரு சொல் .47 [ 15 /10/2018 ]

சிலரின் ஞாபக சக்தி வியக்க வைக்கும் .எதைச் சொன்னாலும் மிகத் துல்லியமாக நினைவுகூர்ந்து சொல்லிவிடுவார்கள் .வருடம் ,மாதம் ,நாள் ,பெயர் எதுவும் தப்பாது .

சிலருக்கு தன் தொலைபேசி எண்கூட நினைவில் இருக்காது ;தப்புத்தப்பாகவே சொல்வர் .அதிலும் கைபேசி வந்தபிறகு எல்லாம் அதற்குள் அடங்கிவிட ஞாபகம் வைத்துக்கொள்ள வேண்டிய அவசியமும் சுருங்கிவிட்டது .

வீட்டில் ஆண்களின் ஞாபக சக்தி சோதனைக்குள்ளாகும் .அலுவலகம் விட்டு வரும்போது வாங்கிவருவதாகச் சொன்னவற்றை மறந்து வந்ததே அதிகம் .அது உண்மையில் ஞாபக மறதியா அல்லது காரிய மறதியா என்பது இதுவரை சந்தேகத்துக்கு உரியதாகவே உள்ளது.

இந்த புடவை இங்கு டூர் போகும் போது வாங்கியது , இந்த குண்டான் அந்தத் திருவிழாவில் வாங்கியது என ஒவ்வொன்றிலும் ஞாபகச் சுவடுகளைத் தடவிப்பார்த்து மனைவி சொல்லும் போது கணவன் முகத்தில் அசடு வழியும் .

ஏன் இந்த நிலை ? ஒரு வேளை ஆண்களைவிட பெண்களுக்கு ஞாபக சக்தி அதிகமோ ?அப்படி எல்லாம் இல்லை .ஞாபக சக்திக்கு பாலின பாகுபாடெல்லாம் கிடையாது .எதில் மனம் லயித்து செய்கிறோமோ அது ஞாபகத்தில் நிலைக்கும் .

ஞாபகம் என்பதுகூட ஈடுப்பாட்டின் இன்னொரு அளவுகோல் என்று சொல்லிவிடலாம் . இதில் வேடிக்கை என்னவெனில் எதை எதை நினைவில் வாழ்நாளெல்லாம் சுமக்க வேண்டுமோ அதை மறந்துவிடுவதும் ; எதை எதை அவ்வப்போதே மறந்துவிட வேண்டுமோ அதைத் தூக்கிச் சுமந்து தானும் வருந்தி பிறரையும் வருத்தப்பட வைப்பதும்தான் .

ஞாபகம் மட்டுமல்ல ஞாபக மறதியும் வாழ்க்கை மகிழ்ச்சியின் ரகசியமே ! எதெது எனத் தேர்வதில்தான் துயரத்தின் களிம்பும் காயமும் அடங்கும் .







































































சொல்..46

Posted by அகத்தீ Labels:


தினம் ஒரு சொல் .46 [ 14 /10/2018 ]

வரவுக்குள் வாழ வேண்டும் போதனை சரிதான் .ஆனால் யாராலும் பின்பற்ற முடியாமல் இருப்பதேன் ? பல காரணங்கள் உண்டு .

முதல் காரணம் , சம்பளம் மாதாமாதம் ஏறாது . வருவாய் உயரவு மிகமிகக் கடினம் .ஆனால் விலைவாசி தினசரி ஏறும் .மாதாந்திர குடும்ப பட்ஜெட் வீங்கிக்கொண்டே போகும் .
இரண்டு , எதிர்பாரா மருத்துவச் செலவுகள் .
மூன்று ,பிள்ளைகளின் கல்விச் செலவு
நான்கு , உறவு ,நட்பு என எதிர்பாராமல் வரும் திருமணம் ,கருமாதி இதர செலவுகள்
ஐந்து , எதிர்பாராச் செலவுகளுக்காக வாங்கிய கடன் அதற்கான வட்டி என பெருகிக்கொண்டே போகும் புற்றுநோய்
ஆறு , திடீர் வேலை இழப்பு ,ஊதிய இழப்பு போன்றவை
ஏழு ,குடி ,சூது போன்ற வழியில் பணத்தை இழத்தல்
எட்டு ,ஆடம்பர மோகம் , நுகர்வெனும் பெரும்பசி
ஒண்பது ,அடுத்தவரைபோல் மினுக்க ஆசைப்பட்டு கடன்வலையில் சிக்குதல்
பத்து .குடும்பத்தாரின் ஊதாரித்தனம்

இன்னும் பல இவற்றுள் நம்மால் தவிர்க்க முடிந்தவையும் உண்டு ;நம் கைக்குள் அடங்காததும் உண்டு .

என்ன செய்வது ? மாதந்தோறும் கணவன் –மனைவி உட்கார்ந்து பேசி குடும்பப் பட்ஜெட் போடுங்கள் . தவிர்க்கக்கூடியதை தவிருங்கள் .அது கடன் புதை சேற்றில் சிக்கமாலிருக்க உதவும் . கவுரவத்துக்காகவோ மரியாதைக்காகவோ எதையும் செய்ய வேண்டாம் .உங்கள் சக்தி எவ்வளவோ அதனோடு நிறுத்துங்கள் !

பிள்ளைகளுக்கும் வீட்டு நிலையை திறந்த புத்தகமாய் சொல்லி வளருங்கள் .உங்கள் வலி அவர்களுக்குத் தெரிய வேண்டும்!

உங்கள் வீட்டு பட்ஜெட்டுக்கும் , அரசு போடும் நாட்டுப் பட்ஜெட்டுக்கும் உள்ள தொடர்பை யோசிக்கத் தொடங்குங்கள் ..அரசியல் விழிப்புணர்வின் மூலவிதை அதுதான்….

போதனைகளால் புண்ணு ஆறாது . போராட்டமே வாழ்க்கை !!





































































சொல்.45

Posted by அகத்தீ Labels:


தினம் ஒரு சொல் .45 [ 13 /10/2018 ]


 வாசிப்பு என்பது வெறுமே பழக்கமல்ல ,பண்பாட்டின் கூறு . புத்தகத்தைக் காதலித்தவர் ஒருபோதும் அதனை தூக்கி எறியமாட்டார்.

வாசிக்க எனக்கு நேரமே இல்லை என்பது வெறும் சாக்கு . சீரியல் பார்க்காமல் இருக்கிறீர்களா ? அரட்டை அடிக்காமல் இருக்கிறீர்களா ? கொஞ்சாமல் ,சண்டை போடாமல் இருக்கிறீர்களா ? வாசிப்பில் லயித்துவிட்டால் நேரம் தானே கிடைக்கும்.

புத்தகத்தை எடுத்தால் தூக்கம் வருகிறதா ? ஆம் என்போரே அதிகம் . முதலில் உங்களை காந்தமாய் ஈர்க்கும் புத்தகத்தில் வாசிப்பைத் துவங்குங்கள் .அதன் தரம் .தகுதி பற்றி அலட்ட வேண்டாம் . வாசிக்க வாசிக்க உங்கள் ரசனையும் தேடலும் தானாகவே மேம்படும் .ஆகவே முதலில் பிடித்ததில் தொடங்குங்கள் !

எழுத்துக்கூட்டி வாசிப்பது ,சொற்களாய் வாசிப்பது ,வாக்கியங்களாய் வாசிப்பது , பத்திகளாய் வாசிப்பது ,மனதுக்குள் வாசிப்பது ,உரக்க வாசிப்பது ,தனியாய் வாசிப்பது ,கூட்டாய் வாசிப்பது , அமைதியான இடத்தில் வாசிப்பது ,ஓடும் ரயிலில் வாசிப்பது ,வாசிப்பதே வேலையாய் செய்வது ,வேலையின் நடுவே வாசிப்பது ,அடடா வாசிப்பது என்பதில்தான் எத்தனைவகை ? எத்தனை சுவை ?

மீண்டும் சொல்கிறேன் . வாசிப்பு என்பது வெறுமே பழக்கமல்ல ,பண்பாட்டின் கூறு . புத்தகத்தைக் காதலித்தவர் ஒருபோதும் அதனை தூக்கி எறியமாட்டார்.

சென்றவாரம் முழுவதும் புதிய புத்தகம் எதுவும் வாசிக்காதாவர் வார்த்தையில் நறுமணம் வீசுவதில்லை என்பது சீனப் பழமொழி.

உங்கள் வார்த்தையில் நறுமணம்வீச வாசியுங்கள் ! தொடர்ந்து வாசியுங்கள் ! வாசித்ததை அடுத்தவருடன் பகிருங்கள் ! அதன் இன்பமே தனி !


































































சொல்.44

Posted by அகத்தீ Labels:


தினம் ஒரு சொல் .44 [ 12 /10/2018 ]


 ஆச்சி ! பக்கத்தில இருக்குற அனுமார் கோயிலுக்கு போகாமல் ஏன் தூரமா நடந்துபோய் அம்மன் கோயிலுக்கு போற ….”

இது என் பேரன் என் மனைவியிடம் கேட்டது .

இதையே வேறுமாதிரி யோசியுங்கள் . அருகிலேயே அழகழகாய் கோயில்கள் இருக்க திருப்பதி ,சபரிமலை என மாநிலம்விட்டு மாநிலம் போவதேன் ? உழைத்து சேர்த்த நாலுகாசை அங்கே சென்று கொட்டுவதேன் ?

எங்கும் நிறைந்தவன் இறைவன் என்று சொல்லிவிட்டு ;இல்லை இல்லை அந்த ஊரில் இருக்கும் அந்த சாமிக்கே பவர் அதிகம்னு சொல்வது வேடிக்கையாகவும் வினோதமாகவும் இல்லையா ?

இங்கே இறை நம்பிக்கையைவிட சடங்கு ,சம்பிரதாயம் ,மூடத்தனம் ,பைத்திக்காரத்தனம் எல்லாம் பேயாட்டம் போடும் . கடவுள் நம்பிக்கையினால் அல்ல சடங்கு ,சம்பிரதாயத்தைக் காக்கவே மூச்சைப் பிடித்து பேசுவர் . சாதி என்று வந்துவிட்டால் மதம்கூட இரண்டாம் பட்சம் ஆகிவிடும் .

இந்த மண்ணில் சித்தாந்தப் போர் நடத்துவது அவ்வளவு எளிதல்ல .மூடத்தனமும் , கண்மூடி வழக்கமும் , கேள்வி கேட்காமல் அடிபணியும் இழிவும் , சாதி ,மத போதையும் மிக்க சமூகத்தில் முட்டி மோதி விழுந்து எழுந்து ஊர்ந்து நடந்து செல்ல வேண்டியிருக்கும் .

உங்கள் வீட்டில் இதற்கான கேள்வியை துவக்கலாமே … முதலில் எம் பேரனின் கேள்வி பெருங்கேள்வி ஆகட்டும் !































































சொல் .43.

Posted by அகத்தீ Labels:


தினம் ஒரு சொல் .43 [ 11 /10/2018 ]

 “கார்த்திகை மாதத்து நாயென” – ஒரு சொல் வழக்கு உண்டு .விலங்குகளின் பாலியல் வேட்கை குறிப்பிட்ட ஆண்டின் குறிப்பிட்ட காலத்தில் மட்டும் மிகும் .இதனை இனப்பெருக்க காலம் என்பர் .மீனுக்கும் அப்படி உண்டு .எல்லா உயிரினங்களுக்கும் அப்படி உண்டு .

ஆனால் மனித இனம் மட்டுமே ஆண்டு முழுவதும் பாலியல் வேட்கையை சுமந்து திரிகிறது .இதற்கு வயதோ பாலினமோ நேரம்காலமோ தடை இல்லை. உடல் இச்சையாக மட்டும் அல்ல ,மனதாலும் இச்சை கொள்ளும் உயிரினம் மனித இனம் மட்டுமே என நான் நினைக்கிறேன் . அறிவியலாளர் தெளிவுபடுத்தட்டும் .

மனிதரின் பாலியல் வேட்கை கற்பனைக் கதவுகளைத் திறந்துவிட்டுள்ளது .ஓவியமாய் ,சிற்பமாய் ,கதையாய் ,கவிதையாய் படைப்பின் சகல பரிமாணங்களிலும் பாலியல் தலைநீட்டும் . சிக்மன் பிராய்டு சகல நோய்க்கும் சமூக நோய்க்கும் இந்த பாலியல் ஈர்ப்பே மையமெனச் சொல்ல .இன்னும் விவாதம் முடியவில்லை .அது தனி.

பாலியல் வேட்கை ,பாலியல் தேர்வு எதுவும் பிழை அல்ல ; எப்போதெனில் பாலின சமத்துவம் பேணப்படும் போதே ! ஆண் ,பெண் இருபாலரிடமும் பிழையான புரிதலும் போக்கும் உண்டு .இது ஒரு வழிப்பாதை அல்ல .

ஆயின் ஆணின் செயல்களை ஏதாவது ஒரு வகையில் நியாயப்படுத்தி ஒப்புக் கொள்ளும் அல்லது கண்டு கொள்ளாமல் ஒதுக்கச் சொல்லும் சமூகம் பெண் என வரின் சீதையைப் போல் நெருப்புக் குண்டத்தில் இறங்கச் சொல்கிறது .

இது சமூக நடப்பாய் உள்ளது .வீட்டில் இது பெரும் ஒழுக்க வேலி என புனித முலாம் பூசப்பட்டு பெண்ணுக்கு மட்டுமே  பூட்டும் அநீதி நிறைந்திருக்கிறது .இது அநீதி ,குற்றம் என்கிற புரிதல் வீட்டில் இல்லவே இல்லை .

கற்புநிலை எனச் சொல்லவந்தால் அதை இருகட்சிக்கும் பொதுவில் வைக்கும் நாள் எந்நாளோ ?

பாலியல் புரிதல் பிழையற அமைய ,ஒவ்வொரு ஆணோடும் பெண்ணோடும் பாலியல் விவாதம் தொடங்க வேண்டியது காலத்தின் கட்டாயமோ ? யார் யாரோடு எப்படி உரையாடுவது என்பதே மிகமுக்கியம் .





























































சொல்.42

Posted by அகத்தீ Labels:


தினம் ஒரு சொல் .42 [ 10 /10/2018 ]

 “மனப்பாடக் கல்வி ஒழிக!” என பொதுவாய்ச் சொல்லுவதுண்டு. இதன் பொருள் என்ன ? எதையும் மனப்பாடம் செய்வதே பிழையா ?இல்லை .இல்லவே இல்லை .சிறுவயதில் ஞாபக சக்தியை வளர்க்க மனனம் செய்யும் பயிற்சி தேவை. தேவையே .

ஆனால் கல்வி என்பது படித்ததை அப்படியே வாந்தி எடுப்பதல்ல ; மாணவரின் படைப்பாற்றலை ,ஆராய்ச்சி மனப்பாங்கை உசுப்பிவிடுவதே ஆகும் .இதைச் சொல்லவே மனப்பாடக் கல்வி ஒழிக என்றனர்.அவ்வளவே !

ஒரு முறை தோழர் இஎம்எஸ் சொன்னது இன்னும் ஞாபகத்தில் உள்ளது .நான்[இஎம்எஸ்] சிறு வயதில் சமஸ்கிருத சுலோகங்களை மனனம் செய்தேன் .அர்த்தம் புரியாமலே மனனம் செய்தேன் .அர்த்தம் புரிந்த பின் இப்போது அந்த சுலோகங்களை விமர்சிக்கிறேன் .அந்த சுலோகங்களை மனப்பாடம் செய்ததால் எனக்கு ஞாபக சக்தி பயிற்சி கிடைத்தது மிகப்பெரிய லாபம் .அது இன்றுவரை பயன்படுகிறது .மனப்பாடம் கல்வியின் ஒரு கூறு .அதை நாம் நிராகரிக்கக் கூடாது .ஆயின் மனப்பாடம் மட்டுமே கல்வி ஆகாது .

தோழர் இஎம்எஸ் ,கலைஞர் கருணாநிதி ,பெரியார் ,அம்பேத்கர் ,நேரு , என பலரும் வாழ்வின் இறுதிவரை நிறைய ஞாபக சக்தி உடையவராய் இருந்தது எப்படி ? தொடர்ந்து படிப்பதும் – படித்ததை நினைவில் பதிப்பதும் – அவ்வப்போது நினைவுகூர்ந்து பயன்படுத்துவதுமே அவர்களின் பணியாக எப்போதும் இருந்ததே காரணம் .

தொடர்ந்து படிப்பதும் – படித்ததை நினைவுகூர்ந்து பிறருக்குச் சொல்லுவதுமாய் வாழ்வை முன்னெடுப்பின் உங்கள் வாழ்வின் இறுதிவரை நினைவு பிறழாமல் வாழலாமே .முயற்சி செய்க ! பயிற்சி செய்க !

























































சொல்.41

Posted by அகத்தீ Labels:


தினம் ஒரு சொல் .41 [ 9 /10/2018 ]

பாரம்பரியம் மாறாததுமல்ல ;மாற்றக்கூடாததும் அல்ல . கொஞ்சம் அசை போடுங்கள் ! உங்கள் வீட்டிலிருந்தே விசாரணையைத் தொடங்குங்கள் !

நான் குழந்தையாய் இருந்த போது என் தாய் மாதம் தோறும் மாதவிடாய் நாளில் புழக்கடையில்தான் இருப்பார் .நாங்கள் அவர் அருகே போகவேண்டுமெனில் அம்மணமாகத்தான் போக வேண்டும் .தவறுதலாய் டவுஜர் ,சட்டையோடு போய்விட்டால் உடனே ஆச்சி கத்துவாள் .அந்த டவுஜர் ,சட்டையைக் கழற்றி துவைக்க போட்டுவிட வேண்டும் . இன்று எவ்வளவு தூரம் வந்திருக்கிறோம் .பாரம்பரியம் என திரும்பிச் செல்ல முடியுமா ?

என் அக்கா திருமணத்திற்கு ரவிக்கைக்குப் பதில் கட்ஜோளியும் பிரேசியரும் வாங்கியபோதும் ஆச்சி எல்லாம் கெட்டுப்போச்சென கூப்பாடு போட்டார் .இன்று எவ்வளவு தூரம் வந்துவிட்டோம் ?

இப்படி சில மாற்றங்கள் நிகழ்ந்த போதிலும் ஆணாதிக்கம் இன்னும் தகர்ந்த பாடில்லையே !நரம்ப்போடு பின்னியுள்ள பாலின பாகுபாட்டை களையாதவரை நாம் நாகரீகர் என சொல்லும் அருகதை உண்டோ ?

வீடானும் நாடானாலும் பாரம்பரியம் என்பது காலந்தோறும் மாறிக்கொண்டிருக்கும் .சாதிய அடிப்படையிலும் பாலின சமத்துவத்திற்கு எதிராக உள்ளதுமான எல்லா விதமான பழக்க வழக்கங்களும் வீட்டிலிருந்தும் நாட்டிலிருந்தும் துடைத்தெறியப்பட வேண்டும் .

ஆனால் அதற்கான இடைவிடா போராட்டம் அவ்வளவு எளிதல்ல ஏனெனில் சமூக உளவியலில் ஊறிப்போயுள்ள கசடுகளுக்கு எதிரானது அல்லவா அது .






















































சொல்.40

Posted by அகத்தீ Labels:


தினம் ஒரு சொல் .40 [ 8 /10/2018 ]

நான் சிறுவனாயிருந்த போது வீட்டில் எண்னை ஓவியமாய் வரையப்பட்ட தாத்தா பாடியின் பெரியபடம் மாட்டப்பட்டிருக்கும் . போட்டோ எடுத்தால் ஆயுள் குறைந்து போய்விடும் என்கிற மூடநம்பிக்கை வேறு .

என் வீட்டில் என் அப்பா அம்மா சிறிய போட்டோ மாட்டப்பட்டிருக்கும் .இது தவிர வீட்டுப் பரணில் கட்டிவைக்கப்பட்டிருக்கும் பிரேம் போட்ட போட்டோக்களை வீடு மாற்றும் போதோ /வெள்ளையடிக்கும் போதோ எடுத்து நினைவை அசைபோடுவதுண்டு .

மேலும் கல்யாண ஆல்பம் உள்ளிட்ட பல்வேறு ஆல்பங்கள் பீரோவை அடைத்துக் கிடக்கும் .என்றேனும் ஒரு நாள் அதனை எடுத்து புரட்டுவதும் அது குறித்து உரையாடி மகிழ்வதும் உண்டு , ஆனால் போட்டோவோ ஆல்பமோ இரண்டு மூன்று தலைமுறைக்குப் பின் குப்பைக்கு போய்விடும் .அல்லது மக்கி மங்கி மறைந்துவிடும் .

வருங்காலத்தில் இவை என்ன ஆகும் ? இப்போதே எல்லாம் டிஜிட்டலுக்கு போய்க்கொண்டிருக்கிறது. நாளை இதைவிட உயர்ந்த தொழில் நுட்பம் இதை விழுங்கக்கூடும் .

உங்கள் எழு தலைமுறையைச் சொல்லுங்கள் எனில் உங்கள் பிள்ளையால் சொல்ல முடியுமா ?உங்களால் சொல்ல முடியுமா ? செத்தவருக்கு திதி கொடுக்கும் போதுகூட தந்தைவழி பரம்பரையைச் சொல்வதன்றி தாய்வழியைத் தவறியும் சொல்வதில்லை .அவ்வளவு இறுக்கமான ஆணாதிக்கச் சமூகம் .

இப்போதெல்லாம் மேலைநாடுகளில்  ‘பரம்பரை மரம்’ என்கிற பெயரில் தாய்வழி தந்தை வழி பேதமற்று படத்தோடு கணினியில் பதிவேற்றம் செய்கின்றனர் . எழுதலைமுறையை அறிய , அடுத்த தலைமுறைக்கு அறிவிக்க முயல்கின்றனர் .

இங்கு நாமும் முடிந்தவரை எழுதலைமுறை இல்லாவிடிலும் மூன்று தலைமுறையையாவது தொட முயலலாமே ! உங்கள் வாரிசுகள் தொடர்வர் . மெல்ல வளரட்டும் இந்த  “பரம்பரை மரம்” எழு தலிமுறைக்கும் அதன் பின்னும்.

காதல் மணமும் ,சாதி,மத மறுப்பு மணமும் இந்த பரம்பரை மரத்தை வீரியமாக்கட்டும் .


















































சொல்.39

Posted by அகத்தீ Labels:


தினம் ஒரு சொல் .39 [ 7 /10/2018 ]

சிலர் பார்த்த முதல் நாளிலேயே கலகலப்பாய்ப் பழகத் துவங்கிவிடுவார்கள் .இன்னும் சிலர் பழகவே கூலி கேட்பார்கள் . சிலர் எப்போதும் முகத்தில் புன்னகை தழுவ இருப்பார்கள் .இன்னும் சிலரோ காங்கிரீட் மூஞ்சி என்பதுபோல் இறுக்கமாய் இருப்பார்கள் .

யாரையும் முதல் நாளிலேயே எடைபோட்டு ஒரு முடிவுக்கு வந்துவிடக்கூடாது .பழகப் பழகப் பாலும் புளிக்கும் என்பதுபோல் சிலர் உறவு ஆகிவிடும் . தேய்க்க தேய்க்க மணக்கும் சந்தணமாய் சிலர் உறவு மேம்படும் .

வெளித் தோற்றத்தைக் கொண்டோ , பகட்டுப் பேச்சைக் கொண்டோ எந்த முடிவுக்கும் வந்துவிட முடியாது . யாரையும் எடைபோட்டுப் பார்க்க எந்தத் தராசும் இதுவரை கண்டிபிடிக்கப் படவில்லை .

தொடர்ந்து பழகுவதன் மூலமும் , மனம் திறந்த உரையாடலின் மூலமுமே ஓரளவு சாத்தியம் .அதிலும் ஒருத்தரைப் போல் இன்னொருவர் ஒரு போதும் இருக்கமாட்டார் . ஆயிரம் பேர் இருப்பின் ஆயிரம் விதமாகவே இருப்பர் .

குறையில்லா மனிதர் யாருமில்லை . குறை ,நிறை இரண்டும் கலந்தே ஒவ்வொருவரும் இருப்பர் . தர முத்திரையோடு யாரும் உலவுவது சாத்தியமில்லை . நிபந்தனையற்ற அன்பே இதயங்களை ஒட்டவைக்கும் .

லாபக் கணக்கு போட்டு யாரும் யாரோடும் பழகாதீர் .அது நட்பல்ல .வியாபாரம் .உடுக்கை இழந்தவன் கையாய் உதவிக்கு முந்துவீர் ! அன்பின் வலுவும் வலியும் மிகப்பெரிது .
















































சொல்.38

Posted by அகத்தீ Labels:


தினம் ஒரு சொல் .38 [ 6 /10/2018 ]


முகூர்த்த நாளில் ஐந்தாறு திருமண அழைப்புகள் .அருகருகே இருப்பினும் போய்  “தலையைக் காட்டிவிட்டாவது” வரலாம் . வெவ்வேறு ஊர் மூலைக்கு ஒன்றானால் என்ன செய்வது ?

எல்லோரும் இந்தச் சிக்கலை அனுபவித்திருப்போம் .ஆனாலும் நம் வீட்டில் திருமணம் நிச்சயிக்கும் போது இதை எல்லாம் யோசிப்பதே இல்லை .ஆண்டு முழுவதும் சுமார் 56 மூர்த்தநாட்களே பஞ்சாங்கம் சுட்டிக்காட்டும் பின் என்ன செய்வது என்பதே எல்லோரின் கேள்வியும் .

எல்லா நாளும் நல்ல நாளே என்கிற தெளிவுவரின் இந்த சிக்கலில் இருந்து எளிதில் மீளலாம் . ஆனால் பஞ்சாக்கத்திலிருந்து மீள முடியாதோர் பாடு சிக்கலே !

கோவை போன்ற நகரங்களில் முகூர்த்த நாளன்று கோவிலிலோ / வீட்டிலிலோ பத்து இருபது நெருங்கிய உறவினரை மட்டும் அழைத்து திருமணம் முடித்துவிட்டு .மண்டபம் கிடைக்கிற வசதியான நாளில் வரவேற்பு நடத்திவிடுகின்றனர் .இதுவும் ஒரு வழி .

என் நண்பர் ஒருவர் இதே போல் வீட்டில் திருமணம் முடித்தார் .தன் அலுவலக நண்பர்களுக்கு அவர்களுக்கு வசதியான நாளில் அலுவலகம் அருகில் ஒரு கெட் டுகெதர் ஏற்பாடு செய்துவிட்டார் .அதுபோல் தந்தை ,மாமனார்வீடு , மணைவி நண்பிகள் என அவரவர் வந்துபோக தோதாக சிறிய சிறிய சந்திப்புகள் ஏற்பாடு செய்துவிட்டார் . செலவு அதிகமாகுமோ எனக் கேட்டேன் . இல்லை என கணக்குச் சொன்னார் .மேலும் எல்லோரோடும் நெருங்கி கைகுலுக்க, உறவாட. உரையாட இனிதாக இருந்தது என்றார் .இதுவும் சரிதான் .

திருமணமோ அல்லது வேறு எந்த நிகழ்வோ நடத்துவோர் வசதியை மட்டுமல்ல வந்துபோவோர் வசதியையும் யோசித்து அவரவர் சூழலுக்கு ஏற்ப விதவிதமாய் திட்டமிடலாம் .சடங்கு போன்ற கும்பல் சந்திப்பு வேண்டாமே !













































சொல்.37.

Posted by அகத்தீ Labels:


தினம் ஒரு சொல் .37 [ 5 /10/2018 ]

யோகா செய் ,தியானம் செய் ,உடற்பயிற்சி செய் ,நடை பயிற்சி செய் ,இப்படி ஆளுக்காள் சொல்லிக் கொண்டிருக்கிறார்கள் . இதைச் சாப்பிடு, அதைச் சாப்பிடு, இப்பிடி சாப்பிடு. அப்பிடி சாப்பிடு என உபதேசம் செய்து கொண்டிருக்கிறார்கள் .

உடல் நலன் மீது அக்கறை செலுத்த வேண்டும் என்பது மிகச்சரி .ஆனால் எல்லோருக்கும் ஒரே மாதிரி யோசனை உதவாது .கடும் உடல் உழைப்பாளிகளின் தேவையும் , உட்கார்ந்து நாற்காலியைத் தேய்ப்பவரின் தேவையும் ஒன்றல்ல .

கடலில் மீன் பிடிக்கப் போகிறவரின் சவால்மிகு வாழ்க்கையும் கல்லுக்கு முன் உட்கார்ந்து மந்திரம் முணுமுணுப்போரின்  வாழ்க்கையும் ஒன்றல்ல .நேர் எதிரானது . எல்லோருக்கும் ஒரே உபதேசம் இயந்திரத்தனமானது .நடைமுறைக்கு ஒவ்வாதது .

அவரவர் பணிச்சூழல் ,வாழ்க்கைச்சூழல் ,பண்பாட்டுச் சூழல் சார்ந்தே எதை உண்பது, எதைச் செய்வது, எதைத் தவிர்ப்பது என்பதை தீர்மானிக்க இயலும் .

கெட்டுப்போன மீனின் நாற்றத்துக்கும் கருவாட்டின் வாசனைக்குமான வித்தியாசத்தை உணர்ந்தவனே அறிவாளி என அண்மையில் நண்பர் பாவேல் ஒரு பதிவில் குறிப்பிட்டிருந்தார் .எவ்வளவு பொருள் பொதிந்த சொல் .யோசிக்க யோசிக்க விரியும் .

தன்னைப் போல் பிறரை நேசிக்க வேண்டும் .என்பது சரி !தனக்குப் பிடித்ததே எல்லோருக்கும் பிடிக்க வேண்டுமென்பது எப்படிச் சரியாக இருக்க முடியும் ?

வீடோ ,ஊரோ ,நாடோ ,தேசமோ வெறும் மந்தையல்ல .மானுடம் என்பதே பன்மையின் பூந்தோட்டம் தானே . ஒற்றைப் பார்வை கவைக்கு உதவாது .