நிர்வாணத்தின் குரல்கள்  :  ஆத்மாவின் துடிப்பு

சுமார் பத்து பதினைந்து ஆண்டுகளுக்கு முன் சதக் ஹசன் மண்டோவின் ஒர் சிறுகதையை  சிற்றிதழ் ஒன்றில் வாசித்தேன் . பாலியல் தொழிலாளியின் வாழ்க்கையைக் குறித்தது . வாசித்தபின் அதிர்ந்தேன். அவரைத் தேடத் தொடங்கினேன் . பின்னர் தோழர் ராமானுஜம் மொழியாக்கம் செய்த சதக் ஹசன் மண்டோவின் இரு சிறுகதைத் தொகுப்புகளை வாசித்தேன் . ராமனுஜத்தோடு நீண்ட நேரம் அதுகுறித்து பேசிக்கொண்டிருந்ததும் , நூல் அறிமுகம் எழுதியதும் நினைவில் உள்ளன . ஆபாச எழுத்தாளர் என மாண்ட்டோ  மீது ஓர் அவச்சொல் உண்டென்றும் ; வழக்குகள் உண்டென்றும் அறிந்தேன். அவர் பத்திரிகையாளர் , மானுட அன்பில் திழைத்தவர் என்பதே உண்மை.

எதிர் வெளியீட்டில் வந்த இஸ்மத் சுக்காய் “வார்த்தைகளில் ஒரு வாழ்க்கை” சுயசரிதை வாசிக்கிற போது  ஓர் செய்தி .

 “சதக் ஹசன் மண்ட்டோவுக்கு எதிராகவும் இஸ்மத் சுக்தாய்க்கு எதிராகவும் ஒரே நேரத்தில் ஓர் வழக்கு நடந்தது .ஆபாசமாக கதை எழுதிவிட்டதாகவே அவ்வழக்கு . இருவரும் நிர்பந்தங்களுப் பணிந்து  மன்னிப்பு கேட்காமல் , அதனை துணிச்சலுடன் எதிர்கொண்டு நிமிர்ந்து நின்றது சாதாரணமானது அல்ல . இன்றும் வழிகாட்டும் செய்தி அது.”

ஆக , மண்ட்டோ என்னை தொடர்ந்து தொந்திரவு செய்து கொண்டே இருந்தார் ,இந்நிலையில் உதயசங்கர் மொழியாக்கத்தில் வந்த இந்நூல் குறித்து அறிந்ததும் , உடனே தொடர்பு கொண்டு கேட்டுப்பெற்றேன்.

மானுட நேயம் ,மானுட அன்பு என்பது நன்கு அறிந்த இருவருக்கிடையே ஆன உணர்ச்சி ததும்பல் அல்ல. மாறாக முன்பின் அறிமுகம் இல்லாதவர்களிடம் அதிலும் வாழ்வில் கடையனுக்கும் கடையனாய் இருப்போரிடம் ,பிரதிபலன் எதிர்பாராது செலுத்துகிற பேரன்பே ஆகும் . சதக் ஹசன் மண்டோ எழுத்து நெடுக இந்த பேரன்பு பெருமழையாய் பொழிந்து கொண்டே இருக்கிறது. அவர் சந்தேகத்துக்கு இடமின்றி ஓர் முற்போக்கு எழுத்தாளரே!

இந்தியா பாகிஸ்தான் பிரிவினையின் போது மதவெறி உச்சத்தில் பித்தேறி நடந்த கொடூர கலவரத்தின் , அழுகுரலின் நேர்முக சாட்சி மண்ட்டோ . தன் வாழ்நாள் முழுவதும் அந்த ரணத்தை சுமந்து திரிந்தவர் .ஆனால் ஒரு போதும் மதவெறியின் குரலுக்கு செவி சாய்க்காதவர் . அவர் எழுத்து நெடுகிலும் முகாரி ராகமே நிரம்பி வழிவதின் ரகசியம் இதுவே.

 “ அவரைச் சதாகாலமும் போலியான மனிதசமூகம் அணிந்திருக்கும் நாகரிகமான ஆடைகளுக்குப் பின்னாலிருக்கும் அழுகிய புண்களில் வடிந்து கொண்டிருக்கும் சீழ் தொந்திரவு செய்து கொண்டே யிருந்திருக்கிறது.” ஆம் அதுதான் கலகக்குரல் ஆனது .கலைப்படைப்பும் ஆனது.

இந்நூலில் இடம் பெற்றுள்ள கதைகளுக்கு போகும் முன்பு சதக் ஹசன் மண்டோ குறித்து உதயசங்கர் எழுதியுள்ள அறிமுக உரை,  “ மானுட மனசாட்சியின் உரத்த குரலை “ கண்டிப்பாக வாசியுங்கள் .

 “பிஸ்மில்லா” என்கிற முதல் கதை கலவரத்தின் போது கைவிடப்பட்ட ஒரு இந்துப் பெண் . ஜாகீர்  என்பவரால்  பிஸ்மில்லா என்ற பெயரில் பாலியல் தொழிலில் ஈடுபடுத்தப்பட்டவள் பற்றிய கதை .இச்செய்தியே கடைசி பத்தியில்தான் தெரியும் . ஜாகீரின் மனைவி என்றே கருதி பழகத் தொடங்கி ,அவளின் சோகமான பெரிய கண்களால் ஈர்க்கப்பட்டு காதல் வயப்படும் சையத் ஓர் சினிமா தயாரிப்பாளன் . அறிந்த கதையைவிட அறியாத கதை ஒவ்வொருவரிடமும் இருக்கத்தானே செய்யும் .

அமங்கலி சாரதாவின்  சோகத்தைப் பிழியும்  “ஆறுதல் “கதை , குடி போதையில் நண்பர் அஸ்கர் என்ன செய்திருப்பான்  ? ஆறுதல் சொல்லப் போனவன் உளவியல் . மிக நுட்பமான உணர்ச்சிப் பிழியல் .

லாஜோவின் அம்மாவும் பாலியல் தொழிலாளியுமான சந்தோ சன்யாரியின் மனவோட்டத்தை ஓர் எழுத்தாளனால் இதைவிட துல்லியமாக படம்பிடிக்க முடியுமா எனக் கேட்கும் “ மெழுகுவர்த்தியின் கண்ணீர்”.

 “நிர்வாணக் குரல்கள்” இந்த கதையைப் படித்த போது என்னுள் ஒரு பழைய நிகழ்வுகள் நிழலாடின .கலைஞரை நள்ளிரவு அவர் படுக்கையறையில் புகுந்து கைது செய்த போது ;அதற்கு எதிராய் மனித உரிமைக் குரல்கள் உரக்க எழுந்தன . நானும் தீக்கதிரில் கண்டித்து எழுதினேன் . இது மனித உரிமை மீறல் வண்மையாகக்  கண்டிக்கிறோம் .மிகச்சரி .கண்டித்தாக வேண்டும் .

அதே வேளை  இடபிள்யூஎஸ்  [EWS]என்கிற வருவாய் மிகக் குறைந்த பிரிவினருக்காக வீட்டுவசதி வாரியம் ஒதுக்கும் வீடுகளை எண்ணிப் பாருங்கள் . ஒரு மூலையில் கழிப்பறை  ,ஒரு குட்டி சுவர் மறைப்பில் அடுக்களை , இரண்டு பேர் படுக்கவும் போதாத அறையில் கணவன் மனைவி ,அம்மா ,வயதுக்கு வந்த பெண் ,மகன் என ஐந்து பேர் . அவர்களுக்கு பிரைவேசி என்பது எங்கு ? யாது ? எந்த மனித உரிமை ஆர்வலரேனும் அதை எப்போதேனும் பேசியது உண்டா ?

இன்குலாப் எழுதிய பீட்டர் சாலை பெரிய சாலை எனும் கவிதையில் கோணிப்பை மறைப்பு குடியிருப்பு பற்றி   வரும் .  மனிதம் பொங்கும் கவிதை அது .

இக்கதையில் கோணிப்பை மறைப்பில் தாம்பத்தியம் நடத்தும் வாழ்க்கையின்  வலியும் , மரத்துப்போன வாழ்வும் ,இதனை சகிக்க முடியாமல்  மனப்பிறழ்வாகும் மனிதனும் ; வாசிக்கும் போதே நெஞ்சு வலிக்கிறது . இக்கதையை வாசித்தபின் மேலும் தொடர முடியாமல் ஒரு நாள் புத்தகத்தையே மூடிவைத்துவிட்டேன். கொஞ்சம் ஈரமனதுள்ளோர் இக்கதையை வாசித்து உணர்ச்சி வசப்படாமல் இருக்கவே முடியாது .

 “ உன்னால் எல்லா விளக்குகளையும் அணைக்க முடியுமா ?” பாலியல் தொழிலாளி கங்குபாயின் கேள்வியின் உக்கிரம் தகிக்கும் “ தோற்றுக் கொண்டேயிருப்பவன்” கதை .

வயதுக் கோளாறு , உடலின் பாலியல் உந்துதல்  இவற்றால் ஓர் பாலியல் தொழிலாளியைத் தேடிப்போகும் ஜாவீத் அவள் வீட்டுக்குள் நுழைய முடியாமல் மனப்போராட்டத்தில் சிக்கிக் கொள்கிறான் . இந்த வதையை “கோழை” என்கிற கதை மிகவும் நுட்பமாகப் பேசுகிறது .”ஜாவீத். நீ மிகப்பெரிய பாவத்திலிருந்து காப்பாற்றப் பட்டிருக்கிறாய்.நீ கடவுளுக்கு நன்றியோடு இருக்க வேண்டும்.”என முடியும்.

ஓர் மூடநம்பிக்கை சார்ந்த நையாண்டி கதை “ ஷாடோலின் எலி.”,  யாசித் என்பவன் முகமதிய வரலாற்றில் பழிவாங்கும் எதிர்மறை கதாபாத்திரம் . இந்த பெயரில் அமைந்த கதை இந்தியா பாகிஸ்தான் பகைமை நீறுபூத்த நெருப்பாய் தொடர்வதை காட்சிப் படுத்துகிறது .பழி வாங்கல் என்பது முடிவற்ற தொடர்கதை என உணர்த்தும் காத்திரமான கதை யாசித் .

“ கேள்விக்குறியான கெளரவம்” எனும் கதை மம்மது பாய் எனும் தாதாவின் மறுபக்கத்தின் ஈரத்தையும்  ,கெளரவமும் படும்பாட்டையும்  காட்சிப் படுத்துகிறது . திரைப்பட பிரபலம் மீது ஏற்படும் ஈர்ப்பும் பைத்தியம் பிடித்த மனோபாவதையும் பகடி செய்யும் “ நூர்ஜகன்”.என ஒவ்வொரு கதையும் நம் வாழ்வில் புதைந்து கிடக்கும் பக்கங்களைப் புரட்டுகிறது .

 “நிர்வாணத்தின் குரல்கள்” என்பது நூலின் பெயராக இருந்தாலும் இது ஆபாசத்தின் குரல் அல்ல ; ஆத்மாவின் துடிப்பு . இந்நூலில்  பத்து  தேர்ந்தெடுக்கப்பட்ட கதைகள் நன்கு  உயிரோட்டத்தோடு மொழியாக்கம் செய்து தந்திருக்கிறார் உதயசங்கர் .அக்கதைகள் நம் இதயத்தோடு உரையாடுகின்றன .

மாண்டோ கதைகளை வாசிக்கும் போது நம் இதயம் அழும் .துடிக்கும் . அதே உணர்வை மண்ட்டோவைப் போல் நம்மால் அடுத்தவருக்கு கடத்திவிட முடியாது .நானும் அவற்றை இங்கே சொல்வதில் தோற்றுத்தான் போனேன். நாம் அந்தக் கதையைச் சொல்லலாம் .உணர்ச்சியை சொல்ல முடியாது .ஒரே தீர்வு ஒவ்வொருவரும் இக்கதைகளைப் படித்து உணர்வதுதான்.படியுங்கள் !

நிர்வாணக் குரல்கள், ஆசிரியர் : சதக் ஹசன் மண்டோ , தமிழில் : உதயசங்கர் , வெளியீடு : நூல்வனம் ,M22 ஆறாவது அவென்யூ ,அழகாபுரி நகர் , ராமாவரம் , சென்னை- 600 089. E mail : noolvanampublisher@gmail.com பக்கங்கள் : 144  விலை : ரூ.220/

சு.பொ.அகத்தியலிங்கம்.

24.05/2024.

வீசுகிற குப்பை 

என் மகள் வழிப் பேரனும் பேத்தியும் கனடாவிலிருந்து வந்தனர் .எம்மோடு சில நாட்கள் தங்கினர் . உரையாடல் நெடுக கனடாவுக்கும் இந்தியாவுக்குமான ஒப்பீடாகப் பெரும்பாலும் கழிந்தது .எல்லாவற்றையும் எழுதவும் இயலாது .தேவையும் இல்லை .

என் பேத்தி சொன்னாள் , “ தாத்தா ! இங்கு தெருவெல்லாம் குப்பை குவிஞ்சு கிடக்கு , அங்க யாரும் ரோட்டில குப்பையை வீசமாட்டாங்க …”

என் பேரன் சொன்னான் ,” தாத்தா , நம்ம நாட்டில டிராபிக் சென்ஸ்சே கிடையாது…” இதனை என் மருமனும் வழிமொழிந்தார் .

இதில் குப்பையைப் பற்றி மட்டும் இப்போது  இங்கு பேசுவோம் .

நான் அண்மையில் திருச்செந்தூர் போயிருந்தேன் . கோயிலை ஒட்டிய கடற்கரையைப் பகுதியை இவ்வளவு குப்பையாக வைத்திருக்க முடியும் என்பதில் சாதனை படைத்திருக்கிறது அவ்வூர் . நகராட்சி .அறநிலையத்துறை என்ன செய்கிறது என்கிற பெருங்கேள்வி ஒரு பக்கம் எழுகிறது .

நிர்வாகத்தின் தோல்வி ஒரு புறம் . மறுபுறம் நம் மக்களின் மனோபாவம் இன்னும் குப்பையாக இருக்கிறது என்பது வெளிப்படை .பக்தி ஆன்மீகம் என வேஷம் போட்டாலும் சாப்பிட்ட குப்பைகளை, நெகிழிக் குப்பைகளை ,தண்ணீர் போத்தல்களை , மதுபுட்டிகளை இன்னபிறவற்றை வீசி அடிப்பதில் நம்மவரை அடிச்சிக்க யாரும் இல்லை .

பக்தியும் ஆனமீகமும் புத்தியையும் சுத்தத்தையும் கொடுக்கவே இல்லை . பொது புத்தியில் இன்னும் குப்பை அள்ள ஒரு சாதி என்கிற சாதி மமதையும், வீட்டில் குப்பை பெருக்க பெண் என்கிற ஆணாதிக்க மமதையும் ஆட்டுவிக்கிறதே ? எப்படி போதிப்பது ?

அதே திருச்செந்தூர் அருகே மணப்பாடு மீனவர் கிராமம் பார்த்தோம் பெருமளவு தூய்மை பேணப்பட்டு இருந்தது . ஏன் அந்த ஞானம் திருச்செந்தூரில் இல்லை .கோயிலுக்குள்ளேயும் வெளியேயும்கூட தூயமை இல்லையே . உழவாரப் பணி எல்லாம் நடக்குதா என்ன ? பக்தி மூடத்தனமானதுதானே ! தூய்மைக்கு பகுத்தறிவுக்கும் பொதுபுத்திக்கும் அங்கு என்ன வேலை ?

அடுக்ககங்களின் வலி இன்னொரு வகை . நான்கு மாடி ஐந்து மாடி இப்போது சர்வசாதாரணம் . மேலே இருந்து குப்பையை வீசுவது .பக்கத்து காலிமனையை குப்பை மேடாக்குவது என அட்டூழியம் தொடர்கிறது .அங்கு குப்பை சேர்ந்தால் தன் வீடும் சேர்ந்துதானே நாறும் என்கிற பொது புத்தியில் உறைப்பதே இல்லை . பெங்களூரின் நடைபயிற்சியின் போது எனக்கு வரும் கோபம் இது .

குப்பை பையை அருகில் போய் குப்பைத் தொட்டியில் போடாமல் போகிற போக்கில் வீசுவது ; அதிலும் டூ வீலர் காரில் போனபடியே வீசுவது எவ்வளவு பொறுப்பற்றதனம்?  அவர்கள் வீசுகிற குப்பை பெரும்பாலும் குப்பைத் தொட்டிக்குள் விழாது ; சுற்றிலும் சிதறித்தான் கொட்டும்.

நானும் என் இணையரும் ஒரு முறை திண்டுகல்லுக்கு அதிகாலை போயிருந்தோம் .ரயிலை விட்டு இறங்கி ஆட்டோவில் பயணம் செய்யும் போது பார்த்தோம்  ; வீட்டினுள் நின்ற படியே கோவில் வாசலில் தேங்காயை உடைத்து சிதற விடுவது போல் தெருவில் குப்பையை சிதறு விடும் கொடுமையை கண்டு நொந்தோம்.

மக்கும் குப்பை எது மக்கா குப்பை எது என்கிற ஞானமும் இல்லை .ரயில் நிலையங்களில் எல்லாவற்றையும் எல்லாவற்றிலும் வீசும் புத்திசாலித்தனத்தை என்னென்பது ?

குப்பையை அகற்றும் தூயமைப் பணியாளர்கள் , நம் சுத்தத்தைப் பேணும் போர்வீரர்கள் அல்லவா ? அவர்களை மனிதர்களாக மதித்தால் இப்படி எல்லாம் செய்வோமா ?

ஊதுகிற சங்கை ஊதி வைப்போம் !

சுபொஅ.

21/05/24.

 “நெடுநாள் களப்போராளியாய் இருந்து அனுபவத் தழும்பேறிய எம் அன்புத் தோழர் வீ.பழனி ” காரல் மார்க்ஸ் சொற்சித்திரம்” எனும் ஓர் எளிய நூலை ஆரம்பநிலை மாணவர்களுக்காய் எழுதித் தந்திருக்கிறார் . மார்க்சியம் எனும் மகாசமுத்திரத்தை  “இதோ பார்!” என விரல் நீட்டி குழந்தைக்கு காட்டுவது போல் காட்டி இருக்கிறார் . அந்தக் கடலுக்குள் குதித்து நீச்சலடிக்கும் ஆர்வத்தை ஊட்டி இருக்கிறார் …..”

 புதிய தலைமுறையினர் தேடித்தேடி கற்க…

[ நூலுக்கு வழங்கிய அணிந்துரை ]

 “மார்க்சியம் தோற்றுவிட்டது ,காலாவதி ஆகிவிட்டது” என முதலாளித்துவ உலகம் 24 x 7 மணி நேரமும் அரற்றிக்கொண்டே இருக்கிறது . கடுமையான விமர்சனங்களை பரப்பிக்கொண்டே இருக்கிறது . ஆயின் , நெருக்கடியில் இருந்து விடுதலைபெற உலகம் மார்க்ஸை நோக்கியே திரும்பிக் கொண்டிருக்கிறது . ஏனெனில் மார்க்சியம் வறட்டுச் சூத்திரம் அல்ல வாழ்வின் வழிகாட்டி ; சமூக அறிவியல் ; மானுட விடுதலையின் திறவுகோல் .

மார்க்ஸ் குறித்தும் மார்க்சியம் குறித்தும் தினசரி புதுப்புது நூல்கள் வந்து கொண்டே இருக்கின்றன .ஏனெனில் மார்க்சியம் ஒரு போதும் திகட்டாத அமுதம் ; இன்னொரு வகையில் சொல்வதானால் வற்றா அறிவுச் சுனை ,இறைக்க இறைக்க புதிது புதிதாய் ஊறிக்கொண்டே இருக்கும். அப்படி வந்து குவியும் நூல்கள் பல திறத்தன ; ஆரம்ப நிலை மாணவர் தொடங்கி ஆராய்ச்சி நிலை வரை பலவகைப்பட்டன. தேவை முடியவில்லை . பெருகிக்கொண்டே இருக்கின்றது .

நெடுநாள் களப்போராளியாய் இருந்து அனுபவத் தழும்பேறிய எம் அன்புத் தோழர் வீ.பழனி ” காரல் மார்க்ஸ் சொற்சித்திரம்” எனும் ஓர் எளிய நூலை ஆரம்பநிலை மாணவர்களுக்காய் எழுதித் தந்திருக்கிறார் . மார்க்சியம் எனும் மகாசமுத்திரத்தை  “இதோ பார்!” என விரல் நீட்டி குழந்தைக்கு காட்டுவது போல் காட்டி இருக்கிறார் . அந்தக் கடலுக்குள் குதித்து நீச்சலடிக்கும் ஆர்வத்தை ஊட்டி இருக்கிறார் .

ஐந்து பகுதிகளாக 14 அத்தியாயங்கள் .80 பக்கங்கள் . சின்ன சின்ன பத்திகளில் செய்திகளைப் பொதிந்து தந்திருக்கிறார் .

‘புதுயுகத்தின் வழிகாட்டி’ எனும்  பகுதியில் மார்க்சின் அருமை பெருமைகளை சிறப்புகளை இன்றியமையாமைகளை எடுத்துரைக்கிறார் .வரலாற்று பின்புலத்தில் ஏற்பட்ட மாற்றங்களை சுருங்க பட்டியலிடுகிறார் .

மார்கஸ் திடீரென ஞானம் பெற்ற ரிஷி அல்ல ; அவருக்கு பார்வதியோ யேகோவோ  வந்து ஞானப்பால் புகட்டவில்லை . எப்படி தன் முன் வாழ்ந்த தத்துவ அறிஞர்களை ,சமகால ஞானிகளை வாசித்து அவர்கள் சொன்னவற்றை விவாதித்து அதிலுள்ள பிழைகளை பட்டியலிட்டு சரியானவற்றை உட்கிரகித்து வளர்ந்தவர் மார்க்ஸ் .

ஏன் கம்யூனிஸம் என்ற சொல்கூட மார்க்சின் கண்டுபிடிப்பல்ல 1777ல் விக்டர் ஹுவே எழுதிய ‘ தத்துவரீதியான சமூகத்திற்கான திட்டம்” என்ற நூலில் பயன்படுத்தியதே . ஆனால் அச்சொல்லுக்கு ஆழந்த பொருளும் ஈர்ப்பும் உருவாக்கியவர் மார்கஸ் . இதை இந்நூலில் பழனி சுட்டுகிறார் . மார்க்சியம் என்ற சொல்லாடல் கூட மார்க்ஸாலோ எங்கெல்ஸாலோ முதலில் பயன் படுத்தவில்லை . பிறரே அதற்குச் சூட்டினர் .

இரண்டாம் மார்க்ஸ் எழுதிய நூல்கள் ஒவ்வொன்று குறித்தும் சிறு குறிப்பு தருகிறார் . ஒவ்வொரு நூலும் எச்சூழலில் ஏன் எழுதப்பட்டது என்பது வெறும் வரலாற்றுச் செய்தி அல்ல ; அதுவே ஓர் அரசியல் பாடம் . தோழர் பழனி அதற்கான பாடக்குறிப்பை இந்த பகுதியில் தந்துள்ளார் .

கூலி என்றால் என்ன ? லாபம் என்பது யாது ? என்பது சாதாரணக் கேள்வி அல்ல .அடிப்படைக் கேள்வி . அரசியல் பொருளாதாரத்தின் அச்சாணி . 1865 ல் மார்கஸ் எழுதிய ‘கூலி விலை லாபம் “ எனும் சிந்தனைப் பொறிதான் ’மூலதனம்’ எனும் பெரும் சித்திரத்தின் திறவுகோல். இவற்றை மூன்றாம் பகுதியில் சுட்டுகிறார் .

உயிரின் தோற்றம் ,மனித சமூக வரலாறு ,வர்க்கப் போராட்டம் , இயக்க இயல் பொருள் முதல் வாதம் , வரலாற்றியல் பொருள் முதல் வாதம் ,புவிப்பாதுகாப்பு ,திருத்தல்வாதம் ,சோஷலிசம் ,புரட்சி  போன்ற கருத்து பேழைகளை அறிமுகம் செய்கிறது நான்காவது பகுதி . மார்க்ஸை வாசித்து ஞானம் பெற வேண்டும் , சமூக மாற்றத்துக்கான போரில் ஆயுதம் ஆக்க வேண்டும் என்கிற ஆவலைத் தூண்டுகிறது இப்பகுதி .

’ ஒவ்வொருவரும் எல்லோருக்காகவும் ,எல்லோரும் ஒவ்வொருவருக்காகவும் “ என தத்துவம் தந்த மார்க்சின் வாழ்க்கை குறிப்புகளும் ,எங்கெல்ஸ் ,லெனின் ,லிப்னெட் போன்றோரின் மதிப்பீடுகளையும் , சிறந்த மேற்கோள்களையும் உள்ளடக்கியது ‘வாழ்க்கைச் சரித்திரம்’ என்ற நிறைவுப் பகுதி .

அகராதிக் குறிப்புகள் போல் செய்திகளைத் தொகுத்து மார்க்ஸை புதிய தலைமுறையினர் தேடித்தேடி கற்க அறிமுகம் செய்துள்ளது இந்நூல் .

இந்நூலை எழுதிய எம் தோழர் வீ.பழனிக்கு வாழ்த்துகள் .

சு.பொ.அகத்தியலிங்கம்.

20/05/2024.

ஜீனி போட்ட டீ யா ? கருப்பட்டி காப்பியா ?

தமிழில் சுமார் 2 லட்சத்திற்கும் அதிகமான சொற்கள் நா. கதிரைவேற் பிள்ளையின் அகராதியில் தொகுக்கப் பெற்றுள்ளது . [ கெளரா பதிப்பகம் வெளியிட்டுள்ளது ] இப்போது இதன் எண்ணிக்கை மேலும் விரிந்திருக்கும். எல்லாவற்றையும் எல்லோரும் தெரிந்திருக்க வாய்ப்பும் இல்லை .தேவையும் இல்லை .

மிகப்பெரிய எழுத்தாளர்கூட தன் படைப்பு மொத்தத்திலும் ஐயாயிரம் ஆறாயிரம் சொற்கள் பயன்படுத்தினாலே அதிகம் . ஷேக்ஸ்பியரே அப்படித்தான் என்கிறார்கள் விபரம் தெரிந்தவர்கள் . ஒரு மொழியில் சுமார் [ தோராயம் இன்னும் வழக்காகவில்லை] ஐநூறு சொற்களுக்குள்தான் சாதாரண மனிதன் வாழ்க்கையில் புழங்கும் என்கிறார்கள் மொழியிலாளர்கள் .அவர் தொழில் சார்ந்து புழகுவது தனி.

இதில் வட்டார வழக்குகளே மேலோங்கி நிற்கும் .அதுவே இயல்பு . அதே போல் பிற மொழிக் கலப்பே இல்லாமல் நூறு சதம் [ விழுக்காடு என தூய தமிழிலும் சொல்லலாம் ] இயங்குவதாய்ச் சொல்வது கற்பனை .  தோழர் வீ.பழநியும் ’என்னுரையில்’ அதைச் சுட்டி இருக்கிறார் .

பெயர் சொற்களை மொழிபெயர்ப்பது வீண் . வினைச் சொற்களைப் புறக்கணித்து வாக் பண்ணி ,ஸ்மைல் பண்ணி ,குக் பண்ணி ,மியூசிக் பண்ணி , டைரக்ட் பண்ணி ,ரீட் பண்ணி  இப்படி பண்ணித் தமிழாக்குவது மொழியைக் கழுத்தை நெரித்துக் கொல்வதாகும் .தொலை காட்சியும் ஊடகங்களும் இந்தக் கொலையில் முக்கிய பங்காற்றுகிறது .

பெளதீகம் ,இரசாயணம் , ஜியோமதி என்றால் இந்த காலத்துப் பிள்ளைகளுக்குத் தெரியாது .அழகிய தமிழில் இயற்பியல் ,வேதியல் ,வரைகணிதம் என புழக்கத்திற்கு வந்துவிட்டது . அருமையாய்  ‘வணக்கம்’ சொல்வதை விடுத்து ’நமஸ்காரம்’ என காராமாவது சங்கித்தனமே !

நான் ஐடிஐ படிக்கும் போது தமிழில் பாடநூல்கள் மிகக்குறைவு .ஒன்றிரண்டு இருக்கும்.அதுவும் மிகவும் கேலிக்குரியதாய் இருக்கும் . எடுத்துகாட்டு . மரத்தாலான சுத்தியல் / பிளாஸ்டிக்காலான சுத்தியல் இருக்கும் .இது அடிப்பதற்கல்ல  வடு இல்லாமல் நேர் செய்ய பயன்படும் .இதனை ஆங்கிலத்தில் soft hammer என்பர் . தமிழில் நாங்கள் கொட்டாப்புளி என்போம் . கொட்டாப்பிடி என வீ.பழநி அகராதியில் தொகுத்துள்ளார் . ஆனால் அதனை மெதுவடை போல் மெதுசுத்தி என அப்போது மொழியாக்கம் செய்திருந்தார்கள்  . ஸ்குரூ டிரைவரை  திருப்புளி [ இந்த அகராதியிலும் உள்ளது ] என்போம் .இதை முடுக்கும் கருவி என அப்போது மொழி பெயர்த்திருந்தனர் .anvil என்பது சம்மட்டி அடிக்கும் போது அடியில் வைக்கப்படும் கனமான இரும்பு மேடை .இதனை அடிதாங்கி  /இடிமனை என நாங்கள் சொல்வோம்  அதனை  ‘வைத்தடி மேடை’ என மொழியாக்கம் செய்திருந்தனர்.உழைக்கும் மக்கள் தன் வாழ்க்கையோடு ஏராளமானச் சொற்களை சுமந்து திரிகின்றனர் . அதனை அறியாமல் மொழியாக்கம் செய்வோர் இப்படித்தான் நம்மை காயப்படுத்துகின்றனர் .

விருதாப் போனவனே என நாஞ்சில் நாட்டில் ஏசுவார்கள் . வீணாகப் போனவனே என்று பொருள் . விருதாப் போனவர்களுக்கு விருதா கொடுக்கும் இந்நாளில் அச்சொல் முக்கியத்துவம் பெறும் .இந்த அகராதியில் அச்சொல்லைத் தேடினேன் கிடைக்கவில்லை . எல்லா சொற்களையும் அவர் எழுத முடியாது .இந்நூல் நல்ல முயற்சி .

முச்சூடு என்ற சொல் முழுவதும் எனப் பொருள் படும் . நாஞ்சில் ,நெல்லை மாவட்ட வழக்கு .“பாலின்றி பிள்ளை அழும்” எனத் தொடங்கும் பாடலில் ப.ஜீவானந்தம் “ வீடு முச்சூடும் அழும்” எனப் பாடி இருப்பார். இந்த அகராதியில் அச்சொல் இடம் பெற்றுள்ளது. கருப்பட்டி என்பதா பனைவெல்லம் என்பதா ? அது , நீ வாழும் ஊரைப் பொறுத்தது .

சந்து என்பதை நாஞ்சில் நாட்டில் முடுக்கு என்பார்கள் .இந்நூலில் முடுக்குதல் இருக்கிறது முடுக்கு இல்லை . ஈருள்ளிதான் வெங்காயம் இல்லை நாஞ்சில் நாட்டிலும் நெல்லையிலும் .அட, கன்னடத்திலும் ஈருள்ளிதான்.

காணத் துவையலும் சுடுகஞ்சியும் பப்படமும் சின்ன வயதில் அம்மை  [அம்மாவின் நாஞ்சில் வழக்கு] அதிகம் தந்திருக்கிறார் .சென்னைக்கு வந்த போது ஒரு கடையில் போய் காணம் கேட்டேன் .அண்ணாச்சி சொன்னார் இங்கே இதன் பெயர் கொள்ளு . இந்த அகராதியில் காணம் உள்ளது .

எல்லா சொற்களையும் எழுதுவது சிரமம் . மாதிரிக்கும் ஒன்றிரண்டு சுட்டினேன். இந்நூலை வாசிக்கும் முன் வெள்உவனின் முன்னுரை ,கிருஷியின் அணிந்துரை , பழநியின் என்னுரை மூன்றையும் அவசியம் படியுங்கள் .

நீங்கள் ஒரு வேற்று மொழி ஊருக்குப் போகிறீர்கள் . அங்குள்ள மொழியைக் கற்றுக்கொள்வது எளிது .காய்கறிகள் ,மளிகைச் சாமான்கள் ,விழிச் சொற்கள் , மரியாதைச் சொற்கள் என சுமார் முன்னூறு சொற்கள் தெரிந்தால் சமாளிக்கலாம் .போகப்போக நிறைய அறியலாம் .

[ உபதேசம் செய்யும் நான் பத்துவருடங்கள் கடந்த பின்னும் கன்னடத்தில் ஒற்றை வார்த்தை கற்றுக்கொள்ளவில்லை .என்னை பார்த்த உடனே எல்லோரும் எப்படியாவது தமிழில் பேசிவிடுகின்றனர் .என் செய்வது ?]

 ஆனால் அடுத்த மொழி பேசத் துவங்கும் போது முதலில் எந்தெந்த சொற்களை பயன் படுத்தக்கூடாது அல்லது அந்த சொல் எந்த கெட்ட நோக்கில் உள்ளது என முதலில் அறிய வேண்டும் . நாம் பேசாமல் தவிர்க்கவும் ,பிறர் பேசும் போது உஷாராகவும் இது அவசியம் . சே குவேரா கூட இந்த ஆலோசனையை அவர் பயணத்தில் சொல்லி இருக்கிறார் .கடைப் பிடித்திருக்கிறார்.

ஆமாம் கண்டக்ட்ரிடம்  மீதிச் சில்லறையை பையக் கொடுங்கள் என்றால் , மெதுவாகக் கொடுங்கள் என்றுதானே அர்த்தம் . பணப்பையை கேட்பதாய் கருதினால் சண்டைதான் . உங்களுக்கு தெரிந்த சொல்தான் சரியென ‘ நிலையாநிக்காதீங்க’ [அடம் பிடிக்காதீங்க] அந்த ஊரில் அதன் பொருள் வேறாக இருக்கக்கூடும் .  திருநெல்வேலியில் போய் சக்கரையில்லா டீன்னு கேட்காதீங்க ஜீனி இல்லா டீன்னு கேளுங்க .சரிதானே !

கம்யூனிஸ்டுகளின் மொழிப்பற்றுக்கும் அக்கறைக்கும் இந்நூலும் சாட்சி .தோழர் பழநியும் சாட்சி.

சொல்லும்…. பொருளும்…. [ 2800 தமிழ்ச் சொற்கள் ]

ஆசிரியர் : வீ.பழநி , வெளியீடு : அ ஆ இ பதிப்பகம் , 27,அழகர் நகர் , பெருமாள்புரம் அஞ்சல் ,பாளையங்கோட்டை ,திருநெல்வேலி – 627 007 .தொடர்புக்கு : 94433 91196 / 63816 48023 /   palanicpm55@gmail.com பக்கங்கள் : 168  , விலை : ரூ.120/

சு.பொ.அ.

13/05/2024

சொல்ல வேண்டிய கதைகள்.. சொல்ல வேண்டிய மொழியில்….

தமிழில் சிறார் இலக்கியம் ,குழந்தை இலக்கியம் ஆக்குவதில்  இப்போது ஏற்பட்டுவரும் வளர்ச்சியும் மாற்றமும் மிகவும் நம்பிக்கை அளிக்கிறது . ராமாயணம் ,மகாபாரதம்  என அரைத்த மாவையே திரும்பத் திரும்ப அரைத்து அறிவை முளையிலேயே கிள்ளி எறியும் போக்கு மெல்ல சாகட்டும் !

அறிவைத் தூண்டிவிடும் நம்பிக்கையை போராட்ட குணத்தை சமத்துவ உணர்வை முளையிலேயே  உசுப்பிவிடும் முயற்சிகள் மெல்ல முகிழ்த்தாலும் வலுவாய் எழுகிறது . இ.பா.சிந்தனின் “அப்பா ஒரு கதை சொல்றீங்களா…. “ நூல் காத்திரமான வரவு . ஏற்கெனவே விழியன் ,உதயசங்கர் போன்ற சிலர் இப்பாதையில் தடம் அமைக்கின்றனர் .

இந்நூலில் உள்ள இருபது கதைகளும் வெறும் கதைகளல்ல ; கதை வடிவிலான சாதனையாளர் வாழ்க்கை .

” ஹேப்பி பர்த் டே “ நாமும் சொல்லி இருக்கிறோம் .கேட்டிருக்கிறோம் .அதன் பின்னால் ஹில் சகோதரிகளின் இதயமும் உழைப்பும் இருப்பதை இப்போதுதானே அறிந்தோம்.

போர் மேகம் சூழ்ந்த ஈராக்கில் நூலகத்தைக் காப்பாற்றிய ஆலியாவின் கதை சொல்லும் செய்திகள் வலுவானவை .

இந்தியாவின் முதல் பெண் ஆசிரியை சாவித்திரி பூலே , புதை படிவ ஆய்வாளர் மேரி ஆனிங் , உலகின் முதல் பெண் சாஃப்ட்வேர் இஞ்ஜினியர் அடா லவ்வேஸ் ,உலகை சைக்கிளில் சுற்றி வந்த ஆனி லண்டண்டெரி ,மரங்களின் தாய் வங்காரி மாத்தாய் , கிரிகெட்டில் சாதனைப் பெண் மித்தாலி ராஜ் ,அனிமேசன் நாயகி மேரி ப்ளேரின் ,முதலில் காரை ஓட்டிய பெண் பெர்த்தா பென்ஸ் உட்பட பல சாதனைப் பெண்களையும் ,சில ஆண்களையும் பிஞ்சுகளுக்கு அறிமுகம் செய்திருப்பது பாராட்டத் தக்க முயற்சி .

உரையாடல் வடிவம் , எளிய சொற்கள்,  குழந்தைக்கு சொல்ல வேண்டிய அளவில் செய்தி இவற்றை  சரியான விகிதத்தில் கலந்து தந்திருப்பதுதான் இ.பா.சிந்தனின் வெற்றி .

அவர் ஓர் குழ்ந்தைகளுக்கான யூ டியூப் சேனலும் நடத்தி வருகிறார். உங்கள் குழந்தைகளுக்கு அந்த சேனலை அறிமுகம் செய்து வையுங்கள் .

 [ Kutti Story Kids@KuttiStoryKids‧1.52K subscribers‧759 videosகுழந்தைகளுக்கு கதைசொல்வது மிகமிக அவசியம். இவ்வுலகைப் புரிந்து…]

 நான் என் பேரனுக்கும் பேத்திக்கும் கதை போல் ஒரு அறிவியலையோ வரலாற்றையோ சொன்னால் போதும் மறுநாள் சக நண்பர்களோடு விளையாடும் போது இந்த புதிய செய்தியை அவன் /அவள் பாணியில் கைகால் முளைக்க வைத்து சொல்லிக் கொண்டிருப்பார்கள் . அவர்களே இதுபோல் தகவல்களை கூகுளில் தேடி நமக்கு பரிட்சை வைக்கும் போது பெரும்பாலும் தோற்றுப் போவேன் . அதில் எவ்வளவு இன்பம் தெரியுமா ?

இந்நூல் அது போன்ற ஆவலை நிச்சயம் கிளர்த்தி விடும் என்பதில் ஐயமில்லை . வாசலை திறந்து விடுங்கள் அவர்கள் வானத்தை ,கடலை அளந்து சொல்வார்கள் .

அப்பா மகளுக்கு சொல்வது நல்ல உத்தி . என் ஞானப் பிள்ளை இ.பா.சிந்தன் எப்போதும் லட்சியத் தெளிவுள்ள தன் படைப்புகளால் என்னை வியக்கவைத்துக் கொண்டே இருக்கிறான் .வாழ்த்துகள் !

அப்பா ஒரு கதை சொல்றீங்களா…. பெரிய சாதனைகள்… குட்டிக் கதைகள் .

ஆசிரியர் : இ.பா.சிந்தன் , வெளியீடு : புக்ஸ் ஃபார் சில்ரன் , பாரதி புத்தகாலயம் , தொடர்புக்கு :044 – 24332924 /8778073949

 Email :  bharathiputhakalayam@gmail.com  / www.thamizhbooks.com 

பக்கங்கள் : 144 , விலை :ரூ.140/

சு.பொ.அகத்தியலிங்கம்.

10/05/2024.

10/05/2024.

தன்னையும் திருத்தும் !உன்னையும் திருத்தும் !

இயற்கை அதன் போக்கில் நம்மை வாழவைக்கிறது . நாம் அதற்கு கொடுக்கிற தொல்லைகளுக்கு அவ்வப்போது பதிலடி கொடுத்தாலும்.தன் கடமையில் அது வழுவுவதில்லை.

மழை ,வெயில் ,பனி ,வசந்தம் எல்லாம் மாறி மாறி வருவது இயல்பான சுழற்சி .ஒன்றில்லாமல் இன்னொன்று இல்லை .ஒன்று மட்டுமே இருந்தால் இயக்கம் அற்றுப்போகும்.

வெயில் இல்லாமல் மழை இல்லை .மழை இல்லாமல் பனி இல்லை .பனி இல்லாமல் வசந்தம் இல்லை .வசந்தம் இல்லாமல் வெயில் இல்லை .சுழன்றுகொண்டே இருந்தால்தான் பூமி .நின்று போனால் என்ன ஆகும் ?

உன் உறைவிடம் , உன் உடை ,உன் உணவு ,உன் பழக்க வழக்கங்கள், உன் வாழ்முறை எல்லாம் பருவ மாறுதலோடு இயைந்து மாறிக்கொண்டே இருந்தால் இயற்கை உனக்கு தொல்லை இல்லை நண்பன் .தோழன்.

நீ இயற்கையை உன் முன் மண்டியிட வைக்க மல்லுக் கட்டுகிறாய் . இயற்கை உன்னை அதன் முன் மீண்டும் மீண்டும் மண்டியிட வைக்கிறது ?உன் கர்வம் ஒவ்வொரு முறையும் பங்கப்படுகிறது .என்ன செய்ய ?

இயற்கையை புரிந்து கொள்ள முயற்சி செய் ! மழை உனக்கு மட்டுமல்ல , நிலத்துக்கும் கடலுக்கும் உரிய பங்கு உண்டு . எல்லாவற்றையும் நீயே சுருட்ட நினைத்தால் சுழற்சி முடங்கும் .முதலுகே மோசம் வரும் .முதலில் இதனை அறிந்து கொள் !

வெயில் நிலத்தில் மீது மட்டுமா ஆட்சி செய்கிறது கடல் மீதும்தான் ; விளைவு பருவமழைக்கு வெற்றிலை வாக்கு வைத்து அழைப்பு விடுகிறது .நீ ஏன் வெயிலைச் சபிக்கிறாய் ?

இயற்கையப் புரிந்து கொள்வது என்பது முகநூலிலும் வாட்ஸ் அப்பிலும் போடும் அரைகுறை தகவல் அல்ல . அடி முடி அறியாமல் அவசரகோலத்தில் பழிபோடும் சின்னப்பிள்ளைத்தனம் ஆகவே ஆகாது .

பருவகாலம் ஒவ்வொன்றுக்கும் ஓர் பங்கு உண்டு .ஓர் பணி உண்டு .அதனை செய்தால் மட்டுமே அது பருவகாலமாய் இருக்கும் . தப்புத் தாளங்கள் எங்கும் இருக்கும் .பருவ காலங்கள் மட்டும் தப்புமா ?

தப்புத் தாளங்கள் என்பது நிரந்தரமல்ல .அதனை வைத்து மட்டுமே எந்த அவசர அரைகுறை முடிவுக்கும் போகாதே ! இயற்கையும் தப்பு செய்யும் .தன்னை திருத்தி தகவமைத்துக் கொள்ளும் .

உன்  பொறுப்பற்ற அளவுக்கு மீறிய தலையீட்டால் தாமதமாகலாம் .ஆனால் முடங்கி விடாது .இயற்கை தன்னையும் திருத்தும் !உன்னையும் திருத்தும் ! முடங்குவதல்ல முன்னேறுவதே இயற்கையும் நீயும் என்று உணர் !

அரைகுறைகளால்தான் எப்போதும் பேராபத்து.அரைக்கிணறு தாண்டுவது அறிவிலித்தனம் . ஆனாலும் எல்லாம் உனக்குத் தெரியும் என்கிற இறுமாப்புக்கு மட்டும் குறைவில்லை .

இளைய தலைமுறையே!  இயற்கையை ஆழப்படி ,அகலப்படி , முழுதாய் படி , ஒன்றோடு  ஒன்று இணைத்துப் படி ! இயற்கை உன் வசப்படும் ! நீ இயற்கையோடு இயைந்து நடப்பாய் !

சரிதானே ! தோழா!

சுபொஅ.

04/05.2024.