சொற்கோலம் .6.
முட்டை அழுகினால் சற்று தாமதமாக அப்புறப்படுத்தினும் கேடொன்றும்
நிகழ்ந்துவிடாது .
தக்காளி அழுகினால் உடனே தூக்கி எறிந்துவிட வேண்டும் ; இல்லையேல்
கூடைத் தக்காளியும் அழுகிவிடும் .
முட்டையும் அழுகியது ,தக்காளியும் அழுகியது ஆயினும் இரண்டும்
ஒருப்போல் இல்லை . கையாளுவதற்கு ஒரு பக்குவம் தேவை .புரிதல் தேவை .
சமூக உளவியலும் அப்படித்தான் முடை நாற்றமெடுக்கும் பல அழுகல்
சித்தாந்தங்களின் குவியலாக உள்ளது .தூய்மைப் படுத்த வேண்டும் .
எங்கிருந்து தொடங்குவது என்பதே அடிப்படையானக் கேள்வி .எங்கே
தொட்டாலும் மினனதிர்ச்சி ஏற்படும் .அளவும் தாக்கமும் மாறுபடும் .
‘மானுடம் வென்றதம்மா’
எனக் கவிபாடும் பரந்த இதயத்துடன் மானுடம் ஒன்றுபட எவை எவை தடை என ஓர்ந்து நொறுக்குதல்
ஓர் புறம் .
பேயிருட்டையும் ஓர் கணத்தில் கொல்லும் தீபச் சுடராய் முயன்று அறிவொளி ஏற்றுதல் இன்னோர் புறம் .
நல்லது அல்லது பகுத்துப் பார்க்கும் பார்வையைத் தொலைத்து
; ஒரு கலயம் கள்ளுக்கு ஆசைப்பட்டு குடியிருக்கும் வீட்டுக்கு தீ வைக்கும் படித்த மூடரை
தீமையின் கருவென அறிந்து அகற்றுக விரைந்து .
தனக்கு அநீதி இழைக்கப்பட்டதென ஓருத்தர் ஆவேசம் கொண்டு பொருதும்
வேளையில் ; அவர் வேட்டியை கோவணத்தை உருவி தனக்கென உரிமை கொள்வேன் அழுகிய தக்காளியினும்
அழுகிய மனம் கொண்டோன். ஆபத்தின் மூலவேர் .
இல்லாதிருப்பது இரக்கத்திற்குரியதே . தேவையை அடைய தேடிப்
பயணித்தல் உயிர்த்தலின் பொருட்டே .
ஈன்றாள் பசி காண்பாள் ஆயினும் கோடாரிக் காம்பாய் தீட்டிய
மரத்தை பதம் பார்த்தல் அறமும் அன்று .மனிதமும் அன்று .
கொல்லும் வறுமையிலும் போராட்ட துணையாகு ! மானுடம் வெல்லும்
வழி அது ஒன்றே .இன்றும் .என்றும் .
-
சு.பொ.அகத்தியலிங்கம்.
0 comments :
Post a Comment