பழங்கறியும் கட்லெட்டும்
நான் சிறுவனாக இருந்த போது பொங்கலன்றும் மாட்டுப்பொங்கலனறும்
வீட்டில் தடபுடல்தான். சர்க்கரைப் பொங்கல்,பொங்கல்,வடை , கரும்பு ,பழங்கள் ,கற்கண்டு,
பனங்கிழங்கு என நாங்கள் மூழ்கிவிடுவோம் . சோறு ,காய்கறிக்கூட்டு ,அவியல் ,பச்சடி ,பொரியல்
,சாம்பார்.ரசம் எல்லாம் மீந்துவிடும் . எல்லாம் நாஞ்சில் நாட்டு பக்குவம்.
மறுநாள் காணும் பொங்கலன்று , மீதமான அனைத்தையும் போட்டு
சுண்டவைத்து தருவார்கள் .அதனை பழங்கறி அல்லது சுண்டக்கறி என்போம். பழைய சாதத்தில் கட்டித்
தயிர்விட்டு பிசைந்து பழங்கறி சேர்த்து அம்மாவோ /ஆச்சியோ உருட்டித் தரும் போது சுற்றி
இருந்து உண்ணும் எங்களுக்கு ஒரே கொண்டாட்டம்தான் . ஆச்சி எனில் கூடவே கதையும் கிடைக்கும்.
அதன் ருசியே தனி . வழக்கத்தைவிட அதிக உருண்டைகள் உள்ளே சென்றுவிடும் அந்த ருசி இனி
எந்த ஜென்மத்திலும் கிடைக்காது .
[ தீபாவளியின் போதும் வேறு பண்டிகைகளின் போதும் இதுபோல் நடக்கும்]
சரி ! வெறொன்றை பார்ப்போம். நான் ஐடிஐ [சிடிஐ]படிக்கிற
காலம் .நான் ,உத்தண்டராமன் ,ஜெயராஜ் ,மிலான், சைதை நண்பர் சிவராஜ் எல்லோருக்கும் கட்லெட்டை
எப்படியாவது ஒரு நாள் ருசி பார்த்துவிட வேண்டும் என்கிற ஆவல் . அதற்கு ஒரு திட்டம்
போட்டோம். கிட்டத்தட்ட ஐந்தாண்டு திட்டம் மாதிரிதான் .காசு வேண்டுமே !
ஒரு நாள் எல்லோரும் சைதாப்பேட்டையில் இருந்து நடந்து தி.நகர்
போனோம். அங்கு ஒரு ஹோட்டலில் [சரஸ்வதி பவன் நின நினைவு ] நுழைந்தோம் . கட்லெட் விலைக்
கேட்டு உறுதி செய்துகொண்டோம் .ஆளுக்கொரு கட்லெட் சாப்பிட காசு இருந்தது . கட்லெட் விலை
அப்போது ஆறு காசு [ஒரு அணா] என நினைவு. ஐந்து கட்லெட் வாங்கி ஆளுக்கு ஒன்றாய் ஐவரும்
சாப்பிட்டோம் .டீ /காபி குடிக்க காசு கிடையாது .தண்ணீர் குடித்தோம்.
“ நம்ம வீட்ல பழங்கறி
செய்வோம்ல அதுமாதிரி ஹோட்ல மிச்சம் வர்றத எல்லாம் சேர்த்து செய்தால் அது கட்லெட்..
ஆனாலும் நம்ம பழங்கறியை அடிச்சிக்க முடியாது ” என உத்தண்டராமன் ஜோக் அடிக்க . ஆமாம்
போட்டு சிரித்தோம் . எங்க ஞானமும் அப்போது அம்புடுத்தான். அப்புறம் ரொம்ப காலம் கட்லெட்
பக்கம் நாங்க திரும்பிப் பார்க்கவே இல்லை.
பின்னர் கட்லெட்
சாப்பிட வாய்ப்புகள் அமைந்த போதும் ; என்னை
அது பெரிதாய் ஈர்க்கவே இல்லை . ஏனோ தெரியவில்லை . ஆயின் என்றோ சாப்பிட்ட பழங்கறி சுவை
இன்னும் நாக்கில் ஒட்டிக்கொண்டிருக்கிறதே என்ன செய்ய ?
சுபொஅ.
16/01/2024.
