அவர்கள் சொன்னார்களாம் உடை உங்கள் விருப்பம் .அவரவர் உரிமை .” ஏஎன் சாரத்துடன் ஓர் நிகழ்வில் கியூபாவில் பங்கேற்றதை அவ்வளவு மகிழ்வுடன் சொன்னார் .

“ கடவுள் உண்டா ?இல்லையா ?” “ மார்க்சியத்திற்கு குருபீடம் எங்கும் இல்லை” போன்ற தோழர் ஏபியின் பிரசுரங்கள் என்னை மிகவும் ஈர்த்தவை .  “ கடவுள் உண்டா ? இல்லையா ?” பிரசுரம் இன்றைக்கும் புதிய இளைஞர்களுக்கு வாசிக்கக் கொடுக்க வேண்டிய ஒன்று எனில் மிகை அல்ல .

நூற்றாண்டு நாயகர்கள் நினைவலைகள் : 6.

1979 -80 காலகட்டத்தில் நான் சோஷலிஸ்ட் வாலிபர் முன்னணி இணைச் செயலாளர் என்கிற முறையில் மாநிலம் முழுவதும் பயணிக்கத் துவங்கிவிட்டேன் . மாவட்டச் செயலாளர் பணியுடன் அதுவும் இணைந்தது .

1980 ல் இந்திய ஜனநாயக வாலிபர் சங்கமாக மாறும் மாநில மாநாடு திண்டுக்கல்லில் நடைபெற ஆயத்தம் ஆகிக்கொண்டிருக்கும் வேளை . தோழர் ஏ.பாலசுப்பிரமணியம் கேட்டுக்கொண்டதற்கிணங்க திண்டுக்கல்லில் முகாமிட்டு கிட்டத்தட்ட இரண்டு மாதம் பணியாற்றிக் கொண்டிருந்தேன் .

சென்னைக்கு இடையில் ஓர் நாள் வந்தபோது தோழர் .பி.ஆர்.பரமேஸ்வரன் என்னை அழைத்துக் கொண்டு மெரினா பீச்சுக்குப் போனார் . பட்டாணி சுண்டலைக் கொறித்தபடி பேசத்துவங்கினோம் .அப்போது மெல்ல சொன்னார் , “ உன்னை வாலிபர் சங்க மாநிலப் பொறுப்புக்கு கொண்டுபோக முடிவெடுத்திருக்கிறோம் . நீங்கள் தயங்காமல் ஒப்புக்கொள்ள வேண்டும் . நீங்கள் கடைசி நேரத்தில் மறுத்துவிடக்கூடும் எனவே தோழர் ஏபி முன்கூட்டியே உங்களிடம் பேசச்சொன்னார் …”

நான் அப்போதும் உடன்படவில்லை . பின்னர் தோழர் விபிசியும் பேசினார் .கடைசியாக தோழர் ஏபி பேசினார் ,” எதுக்கு பயப்படுகிறாய் ? துணிஞ்சு இறங்கி அடி .. உனக்கு முழு சப்போர்ட் நான் தறேன் . நீதான் பொறுப்பேற்கிறாய் …” கட்டளையே இட்டுவிட்டார் . மீற இயலுமா ? அதுவும் அவர் மீது மிகுந்த மரியாதை கொண்டவனல்லவா நான் ?

இதற்கு முன் நடந்த ஒரு சம்பத்தைச் சொன்னால் என் தயக்கம் புரியும் ? ஏற்கெனவே மாநிலம் முழுவதும் சுற்றி வந்த போது மதுரைப் பேரவையில் நான் பேசியதை ஒருவரி விடாமல் எழுதி தோழர் ஏபிக்கு அனுப்பி ,” இதுதான் கட்சி கோட்பாடா ? தி .க மேடை போல் ஆகிவிட்டதே !” என ஆதங்கப்பட்டிருந்தார் ஓர் மூத்த தோழர் .

தோழர் ஏ.பி என்னை அழைத்து அதைப் படிக்கச் சொன்னார் . இதற்கு என்ன சொல்லுகிறாய் எனக் கேட்டார் . “ நான் பேசியதைத்தான் எழுதி இருக்கிறார் .எதுவும் தப்பாகப் பேசவில்லையே ?” என்றேன்.

 “ சபாஷ் ! சிங்கக் குட்டி ! தொடர்ந்து இதைப்போல் வாலிபர் சங்கக் கூட்டங்களில் பேசு ! அது இப்போதையத் தேவையே ! யாராவது கேட்டால் ஏபிதான் இப்படி பேசச் சொன்னார்னு சொல்லு “ என சொல்லியத்தோடு . என் எதிரிலேயே அந்தத் தோழருக்கு கடிதமும் எழுதினார் .

மேலும் சொன்னார் , “ வாலிபர் சங்கம் ,மாணவர் சங்கம் ,எழுத்தாளர் சங்கம் மூன்றிலும் அழுத்தமாகச் சமூகசீர்திருத்தக் கருத்துகளை பேசியாக வேண்டும் . மாதர்கள் மத்தியிலும் பேசவேண்டும் ஆனால் கொஞ்சம் நிதானமாக எச்சரிக்கையோடு பேசவேண்டும் . தொழிற் சங்கம் , விவசாயிகள் சங்கம் போன்ற வர்க்க அமைப்புகளில் வர்க்க அரசியல் ஓங்கி இருக்க வேண்டும் .கட்சி இவற்றை ஒருங்கிணைத்து இடது அரசியலை முன்னெடுக்க வேண்டும்.”

அவர் சொன்னதின் சாரத்தை நினைவில் இருந்தபடி எழுதியிருக்கிறேன் . இந்த சம்பவம் எனக்குக் கொடுத்த உத்வேகம் கொஞ்சமல்ல .இப்பின்னணியிதான் தோழர் ஏபியின் கட்டளையை ஏற்றுக் கொண்டேன் .தோழர் ஏபியின் வழிகாட்டல் இன்றைக்கும் பொருந்தும்தானே ?

தோழர் ஏ.பி. மறைவுக்கு பின் ஓர் நாள்  தனியாக உரையாடிக்கொண்டிருந்த போது தோழர் பிஆர்சி என அன்போடு அழைக்கும் பி.ராமச்சந்திரன் சொன்னார் ,” கட்சி மாநிலச் செயற்குழுவில் வாலிபர் சங்கப் பொறுப்புக்கு உங்களைப் போட வேண்டும் என்பதில் தோழர் ஏபி பிடிவாதமாக இருந்தார் .  “அவன் [ என்னைத்தான் ] சுயமாகச் சிந்திப்பான் , கிரியேட்டிவிட்டியாக இருப்பான் .சில வேளை தன்னிச்சையாகச் செயல்பட்டுவிடுவான் .கொஞ்சம் அடம் அதிகம் . பரவாயில்லை .திருத்திக்கொள்ளலாம் . .நமக்குத் தேவை தலையாட்டி பொம்மை அல்ல .” என்று ஏபி சொன்னார் . பிஆர்சி இதைச் சொன்னபோது நான் சிலிர்த்துப் போனேன்.

தோழர் ஏபி ஊழியர்களை நம்பிக்கையோடு அணுகுவார் . அவருக்கு செயல்படுபவரையே பிடிக்கும் .ஜால்ராக்களை அல்ல . வேலைசெய்தால் தப்பு வரும் . வேலையே செய்யாவிட்டால் முன் முயற்சியே இல்லாவிட்டால் தப்பே நடக்காது . தப்பை சரி செய்யலாம் . செயல்படும் ஊழியர் தேவை என ஏபி வலியுறுத்துவார் .ஜால்ரா அவருக்கு பிடிக்காது .கருவறையில் இருக்கும் குழந்தையும் , செத்த பிணமும்தான் தப்பு செய்யாதவை எனும் மேற்கோளை அடிக்கடி சுட்டுவார் . “ தாராளவாதத்தை எதிர்த்துப் போரிடுக !” எனும் லியோசோச்சி பிரசுரத்தை மொழியாக்கி கட்சி அணிகளிடம் கொண்டு சென்றவர் ஏபி. இவை எல்லாம் பிஆர்சி என்னுடன் பகிர்ந்தவை .

  “ கடவுள் உண்டா ?இல்லையா ?” “ மார்க்சியத்திற்கு குருபீடம் எங்கும் இல்லை” போன்ற தோழர் ஏபியின் பிரசுரங்கள் என்னை மிகவும் ஈர்த்தவை .  “ கடவுள் உண்டா ? இல்லையா ?” பிரசுரம் இன்றைக்கும் புதிய இளைஞர்களுக்கு வாசிக்கக் கொடுக்க வேண்டிய ஒன்று எனில் மிகை அல்ல .

இந்த இடத்தில் தோழர் ஏபி மொழிப்பிரச்சனை குறித்து பேசியதை சுட்டுவது பொருத்தமாக இருக்கும் ,

 “அவசரமாக நமது அரசு செய்ய வேண்டிய வேலைகள் இருக்கின்றன . ஆங்கிலத்தை அகற்றி எல்லா துறைகளிலும் தமிழ் வந்துவிட வேண்டும் .அதற்கு வேண்டிய அவசர நடவடிக்கைகளை நாம் எடுக்க வேண்டும் .நீதி ,நிர்வாகம் ,கல்வி என்ற மூன்று நாற்காலிகள்தான் . அந்த மூன்று நாற்காலிகளிலும் தமிழை அமர்த்திட வேண்டும் .அந்த மூன்று நாற்காலிகளிலும் வேறுமொழி அமர இடம் கொடுக்கக்கூடாது .மற்ற மொழிகள் தனி இடத்தில் உட்காரலாமே தவிர ,இந்த மூன்று நாற்காலிகளிலும் மற்ற மொழிகளுக்கு இடம் இல்லை .இந்த மூன்று நாற்காலிகளிலும் தமிழைத் தவிர வேறு எந்த மொழிக்கும் இடமில்லை என்ற நிலையை ஏற்படுத்திவிட்டால் தமிழ் மக்களுக்கு பயம் இருக்காது .பீதி இருக்காது .நமது மாநிலத்திற்குள் வேறு எந்த மொழிக்கும் தனி இடம் கிடையாது என்று உத்திரவாதம் செய்துவிட்டால் பெரிய அளவு கலக்கம் போய்விடும் .பீதி குறைந்துவிடும்.துரிதமாக தமிழை அரியாசனத்தில் அமர்த்த வேண்டும்.”

என சட்டமன்றத்தில் தோழர் ஏபி பேசினார் . முதல்வர் பேரறிஞர்அண்ணா பதில் சொன்னார் .”திரு பாலசுப்பிரமணியம் ,திரு சங்கரய்யா அவர்கள் சொன்னது போல் இந்திய அரசு இந்திக்கு மட்டும்  சலுகை காட்டுகிற அந்த திட்டத்தை மாற்றி எல்லா மொழிக்கும் சம அந்தஸ்த்து கொடுத்து வளரச் செய்வார்களேயானால் நாம் அந்த நிலைக்கு வர முடியும் .அதுவரை கொஞ்சம் பல்லைக் கடித்துக் கொண்டு [ ஆங்கிலத்தைப் ] பொறுத்துக் கொள்ள வேண்டும் .”

இன்றும் மொழிசிக்கல் மேலும் வலுவடைந்துள்ளது . நாம் தாய்மொழியைத்தான் உயர்த்திப்பிடிக்க வேண்டும் அல்லவா ? தொடர்ந்து பேசுவோம் .

தோழர் ஏபியிடம் கற்றுக்கொள்ள நிறைய உண்டு . தொடர்ந்து கற்போம் !

சு.பொ.அகத்தியலிங்கம் .

5 ஆகஸ்ட் 2021.

 “எதிரிகூட பாராட்டிவிடுவான் நம் தலைவர்கள் பாராட்டவே மாட்டார்கள் ; இன்று திட்டவில்லையா ? அதுவே பாராட்டு..” என நாங்கள் ஆசிரியர் குழுவில் பேசிக்கொள்வோம்.

 உமாநாத்திடமும் இந்த மெனக்கிடலைக் காணலாம் . ஒரு மணி நேரம் பொதுக்கூட்டத்தில் பேச இரண்டு மூன்று நாட்கள்கூட தயாரிப்பார் .

நூற்றாண்டு நாயகர்கள் நினைவலைகள் : 4.

 எந்தப் பிரச்சனையைக் கொண்டு போனாலும் அதனை மேலோட்டமாகக் கேட்டு போகிற போக்கில் ஏதேனும் சொல்லும் வழக்கம் அவரிடம் கிஞ்சிற்றும் கிடையாது .

நூற்றாண்டு நாயகர்கள் நினைவலைகள் : 3.

தர்க்கம் புரிவது அல்லது விவாதிப்பது ஒரு அரிய கலை . தன்னோடு உரையாடுகிறவர் சொல்வதை காதுகொடுத்துக் கேட்பது மட்டுமல்ல ; “READ BETWEEN LINES.” எனும் ஆங்கிலச் சொலவடை ஒன்று உண்டு .அதாவது சொல்வதையும் சொல்லாமல் விட்டதையும் இணைத்துப் புரிந்து கொள்வது அல்லது சொற்களுக்குள் உள் நுழைந்து உண்மையைத் தேடுவதும் என்பதாகும் . அதற்கும் மேல் மார்க்சியப் பார்வையில் வரலாற்று சமூக பின்புலத்தோடு புரிந்து கொள்வதுமாகும் .

தோழர் ஏஎன் என அன்போடு அழைக்கப்படும் தோழர் ஏ.நல்லசிவனிடம் விவாதிக்கிற ஒவ்வொருவரும் பெறும் அனுபவம் அதுவே . அவர் எந்தப் பிரச்சனை ஆயினும் பிரித்து மேய்ந்துவிடுவார் என அவரைப் பற்றி வேடிக்கையாகச் சொல்வோம் .

எந்தப் பிரச்சனையைக் கொண்டு போனாலும் அதனை மேலோட்டமாகக் கேட்டு போகிற போக்கில் ஏதேனும் சொல்லும் வழக்கம் அவரிடம் கிஞ்சிற்றும் கிடையாது . முழுமையாய் புரிந்து நாம் ஏற்றுக்கொள்கிற விதத்தில் வழிகாட்டக்கூடியவர் . அதற்காக மணிக்கணக்காக உட்கார்ந்து பேச சலிக்கவே மாட்டார் .அப்படி ஒரு கம்யூனிஸ்ட் வார்ப்பு அவர் .

நான் வாலிபர் சங்கப் பொறுப்பில் இருந்தபோது பலமுறை பல்வேறு பிரச்சனைகள் குறித்து விவாதித்திருக்கிறேன் .

விருதுநகர் வாலிபர் சங்க மாநில மாநாட்டில் நம் தோழர்கள் கொல்லப்படும் போது நம் எதிர்வினை எத்தகையதாக இருக்க வேண்டும் என்கிற விவாதம் எழுந்தது .அரசியலாகத்தான் எதிர்கொள்ள வேண்டும் என்று பொதுச் செயலாளராகிய நான் பதில் சொன்னேன் . விவாதம் முடிந்தது .மாநாடு ஏற்றுக்கொண்டது .

மாநாடு முடிந்தபின் ஓர் தோழர் அந்த விவாதத்தைக் குறிப்பிட்டு சில விமர்சனங்களை முன்வைத்து தோழர் ஏஎன்னுக்கு கடிதம் எழுதி இருந்தார் .

தோழர் ஏ என் என்னைக்கூப்பிட்டு விபரம் கேட்டார் .நான் நடந்ததைச் சொன்னேன் . அதன் பின் தோழர் எ என் சொன்னார் , “ நீங்கள் சொன்ன பதில் சரிதான் . ஆனால் அதை முன்வைத்த விதம்தான் தப்பு . எதிரியோடு வாதம் செய்கிற போது அவரைத் தோற்கடிக்க வேண்டிய கட்டாயம் நமக்கு உண்டு .அதற்கேற்பச் செய்ய வேண்டும் . மக்களிடம் பேசும்போது அவர்களை வென்றெடுக்க வேண்டும். அதற்கேற்ப கன்வின்சிங் டோனில் அதாவது ஒப்புக்கொள்ள வைக்கிற முறையில் விவாதம் அமைய வேண்டும் . கட்சி அமைப்புக்குள் தோழர்களின் தவறான அணுகுமுறையை அவர்கள் புரிந்து கொள்ளும் விதத்தில் , ஏற்றுக்கொள்ளும் விதத்தில் அதே சமயம் கறாராக இருக்க வேண்டும் . சுயவிமர்சனமாக நமது பிழைகளை ஒப்புக்கொள்ளுவதன் மூலமே தோழர்கள் தங்கள் தவறுகளை உணரவைக்க முடியும் .”

பேச்சினூடே லெனின் சொன்ன உதாரணத்தைச் சொன்னார் , “ எதிரிகளை விமர்சிக்கிற போது பூனை எலியைக் கவ்வுகிற மாதிரி கவ்வ வேண்டும் . நண்பர்கள் தோழர்களிடம் எனில் பூனை தன் குட்டியைக் கவ்வுவதுபோல் கவ்வ வேண்டும்.” ஏற்கெனவே நானும் அறிந்த உதாரணம்தான் எனினும் அதை உதாரணங்களோடு அவர் எடுத்துச் சொன்ன போது அது புது ரத்தம் பாய்ச்சியது போலானது .

இடது சாரி /கம்யூனிஸ்ட் இயக்கங்களில் உள்கட்சி ஜனநாயகம் பேசப்படும் அளவு செயலில் இருக்கிறதா ? சுயபரிசீலனை ஆவணங்கள் வெறும் எட்டுச் சுரைக் காயாகவே அங்கும் மாறிப் போய்விட வில்லையா ? அக்கட்சிகளிலும் மனம் நொந்தோர் இல்லையா ? இவையும் இவைபோன்ற இன்ன பிற கேள்விகளும் எளிதில் புறந்தள்ள முடியாதவையே !

ஆயினும் கம்யூனிஸ் கட்சியில் அமைப்புசார் நடைமுறையே முன்னிலைப் படுத்தப்படுவதால் ; நாயக வழிபாடு குறைவாக இருப்பதால் தீர்வுக்கான வாசல் அடைபடாமல் இன்னும் திறந்தே இருக்கிறது . உட்கட்சி ஜனநாயகம் என்பது பதவிகளுக்கான தேர்வு மட்டுமல்ல ; கொள்கை முடிவுகளை பரந்த விவாதத்தின் மூலம் எட்டுவதும் ஆகும் . உட்கட்சி ஜனநாயகத்துக்கான போராட்டம் கம்யூனிஸ்ட் கட்சிகளின் தொடர் நடவடிக்கையாகும் . அது கட்சி வாழ்க்கையின் ஒரு பகுதி .

இதிலும் ஓர் சிக்கல் , சிலர் அதுமட்டுமே கட்சி செயல்பாடாய் கருதி அதையே இருபத்தி நாலுமணி நேரமும் பேசிக்கொண்டும் செய்துகொண்டும் இருப்பர் , இதன் மூலம் தானும் நொந்து ,கட்சி வளர்ச்சிக்கும் குந்தகம் செய்கின்றவராக உள்ளனர் அந்த சிலர் .

தோழர் ஏ.நல்லசிவன் சென்னை மாவட்ட மாநாட்டு நிறைவுரையின் போது சொன்னார் . “ உள் கட்சிப் போராட்டமும் தத்துவ விவாதமும் கம்யூனிஸ்ட் இயக்கத்தின் உயிர்நாடியே . மறுக்கவே முடியாது .மறக்கவும் கூடாது .அதேவேளை பொதுவெளியில் வேட்டியை உதறக்கூடாது ; ஜட்டியை மாற்றக்கூடாது ; அரிப்பெடுக்கிறது என்பதால் கண்ட நேரத்தில் கண்ட இடத்தில் சொறியவும் கூடாது .” என்றார் .

தோழர் எ என் குரல் அவருக்கு மிகவும் தொந்தரவு தரக்கூடியது .நாலு வார்த்தை பேசியதும் கம்மிவிடும் .புரியாது போய்விடும் . ஒரு வேளை அவரின் குரல்வளம் சிறப்பாக இருந்திருப்பின் அவர்தான் தமிழகத்தின் சிறந்த பேச்சாளர் ஆகி இருப்பார் ; பேச்சில் அவ்வளவு செய்தியும் வாதமும் கூர்மையும் இருக்கும் . இதனை மறைந்த மூத்த செய்தியாளர் வில்லியம்ஸ் அடிக்கடிகூறுவார் ; ஏனெனில் அவரின் மேல்சபை உரைகளை தீக்கதிருக்குத் தந்தவர் அவர் . ஆகவே வில்லியம்ஸின் அனுபவ உண்மை மறுக்க முடியாததே !

தோழர் ஏ என் கொள்கை வழிநின்று காட்டிய வழி சொல்லச் சொல்ல நீளும்….. தொடர்ந்து பேசுவோம்…

சு.பொ.அகத்தியலிங்கம் .

31 ஜூலை 2021.