அது வரலாற்றுப் பிழை! நீ

Posted by அகத்தீ Labels:

அவர்கள்
அடிக்கிறார்கள்
மிதிக்கிறார்கள்
அடக்குகிறார்கள்
நசுக்குகிறார்கள்
சுரண்டுகிறார்கள்
இப்படியே
இனியும்
சொல்லிக்கொண்டே
இருக்காதே !
அது வரலாற்றுப் பிழை!
நீ
இன்னும்
திருப்பிக் கொடுக்கத்
தயாராகவில்லை
என்று வேண்டுமானால் சொல் !
தாமதமாயினும்
ஒவ்வொரு வினைக்குக்
எதிர்வினை செய் !
வரலாற்றின் கட்டளை
அதுவே !
[ இது அவசர காலத்தில் இளம் ரத்தம் துடித்த போது எழுதியது. இப்போது நினைவுக்கு வந்தபடி பதிகிறேன்.]
சுபொஅ.
5/10/2019.

0 comments

ஒன்றைப் புரிந்து கொள்வீர் !

Posted by அகத்தீ Labels:

ஒன்றைப் புரிந்து கொள்வீர் !
நான்சொல்லியாக வேண்டும்
இனியும் தாமதிக்க முடியாது !
எப்படிச் சொல்வது ?
கடிதம் எழுதிவிடுவோமா ?
முடியாது
தேசத் துரோகக் குற்றமாகிவிடும் !
முகநூலில் ,டுவிட்டரில் பதிவிடலாமோ ?
சாத்தியமில்லை
அவதூறு வழக்குகள் பாயும்!
அரங்கத்துக்குள் உரையாற்றலாமே?
வாய்ப்பில்லை
கதவு மூடப்பட்டுவிடும்!
பொதுமேடையில் முழங்கலாமோ
இயலாது
அனுமதி மறுக்கப்படும் .
சரி ! சரி ! எழுத்தித் தொலைக்கலாமொ?
எங்கே இருக்கிறீர் ..
வழக்குகள் பாயும் !
முணுமுணுத்தேனும் எதிர்ப்பைக் காட்டலாமோ?
ம்..ம்..கூடவேகூடாது
ரகசியச் சதியென கைதாவீர்!
என்னதான் செய்வது ?
எப்படித்தான் சொல்வது ?
வழிகண்டாக வேண்டுமே !
ஒன்றைப் புரிந்து கொள்வீர்!
ஆண்டைகளின் அனுமதி பெற்று
அடிமைகள் ஆயுதம் ஏந்த முடியாது !
எல்லா கதவையும் அடைத்தவர்களுக்கு
வரலாற்றின் அரிச்சுவடியும் தெரியாது
அடக்குமுறையின் எதிர்வினையும் அறியார்!
கதவை மட்டுமல்ல கோட்டைச் சுவரையும்
உடைத்தெறியும் எம் வெஞ்சினம்
ஸ்பாட்டகஸைக் கேட்டுப் பாருங்கள் !
பாஸ்டல் சிறைச் சுவரைக் கேளுங்கள்!
வியட்நாமில் பின்னங்கால் பிடரியில் இடிபட
ஓடிய ஏகாதிபத்தியத்தைக் கேளுங்கள்
கருப்பர்களின் தசைமுறுக்கைப் பாருங்கள் !
விடுதலைப் போர்களின் வீரத்தழும்புகளை
தடவித் தடவி உரிமையின் வீரியத்தை பாருங்கள்
எல்லாவற்றிலும் கொடிய அடக்குமுறையான
சமூக ஒடுக்குமுறைக்கு எதிராய்
மாற்றங்களைச் சாதித்த எம் சோதரரைக் கேளுங்கள் !
உங்கள் அடக்குமுறை சாசுவதம் அல்ல
மீறமுடியாத தடையும் ஏதுமில்லை
எங்களின் வெற்றி எட்டிவிடும் தூரம்தான்….
ஒன்றைப் புரிந்து கொள்வீர்!
ஆண்டைகளின் அனுமதி பெற்றா
அடிமைகள் ஆயுதம் ஏந்துவர் ?
சு.பொ.அகத்தியலிங்கம்.
6/10/2019.

0 comments

நிலமென்னும் நல்லாள்.

Posted by அகத்தீ Labels:




நிலமென்னும் நல்லாள்.


மலர் சிரித்துப் பார்த்திருப்பீர்
மண் சிரித்துப் பார்த்தீரா !
வள்ளுவனும் பிழை செய்தான்!

இலமென்று அசைஇ இல்லை
எங்க ஊர் உழவன்
இரவென்றும் பகலென்றும்
பாராமல் உழைத்தான்
உழுதபின் கணக்குப் பார்த்தான்
கடன் புதைகுழியில் மூழ்கிச் செத்தான்.

நிலமெங்கும் ரியல் எஸ்டேட்
வண்ணக் கொடிகள் பறந்தன
நிலமெனும் நல்லாள் நகைத்தாள்
வறண்ட சிரிப்பு வானை இடித்தது
நாட்டு நிலை எண்ணி வெடித்தது !

சு.பொ.அகத்தியலிங்கம்.
11 அக்டோபர் 2019.



0 comments

பிரார்த்தனையும் புதிய பிரார்த்தனையும்

Posted by அகத்தீ Labels:



#பிரார்த்தனையும் புதிய பிரார்த்தனையும்

கொடுங்கோல் மன்னன் துறவியிடம் கேட்டான்;
“ பிரார்த்தனைகளிலே மிகச் சிறந்தது எது ?”

துறவி சொன்னார் ;
“ உங்களைப் பொறுத்த மட்டில் உறக்கம்தான்.”

மன்னன் விழித்தான்…

துறவி சொன்னார் ;
“நீங்கள் உறங்கிக் கொண்டிருக்கும் போதாகிலும்
மக்கள் துன்புறுத்தப்படாமல் இருக்கிறார்கள் அல்லவா ?
அதனால்தான்..”

இது சா அதியின் பாரசீகக் கவிதை .மொழியாக்கம் என்.ஆர்.தாசன்.
அன்றைக்கு எழுதிய கவிதை .இன்றைக்குப் பொருந்துமா ?

“மன்னரோடு துறவியும் உறக்கம் என்கிற உயர் பிரார்த்தனையில் ஈடுபடட்டும் . அப்போதாலும் மக்கள் கொஞ்சம் மூச்சுவிட அவகாசம் கிடைக்கும் அல்லவா ?”
என திருத்தம் சொன்னாள் சிஷ்யை .

சு.பொ.அகத்தியலிங்கம்.
27 செப்டம்பர் 2019.

0 comments

அந்தச் சாலையில்…

Posted by அகத்தீ Labels:





அந்தச் சாலையில்…

இடி,மின்னல் ,மழை
வெள்ளம் வழிந்தோடியது
கால் வைத்தால் வழுக்கும்
சேறும் சகதியும்
சாலையாய் பல்லிளித்தது
மின்சாரமும் திடீர் விடுப்பு
ஊரே இருண்டு மிரட்டியது
தெருவே வெறிச்சோடியது

அந்தச் சாலையில்
கொட்டும் மழையில்
குடைகூட இல்லாமல்
கந்தல் புடவை முந்தானையில்
கைப்பிள்ளையை பொத்தியபடி
ஒற்றையாய் நடந்து செல்லும்
தாயின் வைராக்கியமும்
வாழ்க்கை வலியும்
உரக்கச் சொன்னது
அவள்
பூங்கொடி அல்ல
போர்க்கொடி .

நம்பிக்கை பாடத்தை
வேறு எங்கிருந்து
கற்கப் போகிறீர்கள் ?

சு.பொ.அகத்தியலிங்கம்.
24 செப்டம்பர் 2019.

0 comments

#முதியோர் தீர்மானம்

Posted by அகத்தீ Labels:









#முதியோர் தீர்மானம்

முதியோர்கள் சபையில்
’இன்னும் அழைப்பு வரவில்லை’
என்கிற ஆதங்கம்
கேட்காத நாளிருக்காது !

நோயில் விழாமல்
பாயில் கிடக்காமல்
பட்டென்று உயிர்பிரியும்
வரம் கேட்கா முதியோர் அபூர்வம் .

எங்கே பேச்சு தொடங்கினும்
மரணத்தைத் தொடாமல்
முதியோர் சபை
ஒரு நாளும் கலைந்ததில்லை .

இன்றொரு குரல் வித்தியாசமாய்
ஆனால் ஆத்மார்த்தமாய் வெளிப்பட்டது
 ‘பாசிசப் பேயிருள் தேசத்தைச் சூழ்கிறது .
பகத்சிங்காக வெளிப்பட இளவயது அல்ல
காந்தியாய் போராட சூழல் சரியில்லை
இனியும் வாழ்ந்து பயன் என்ன ?’

முதியோரின் உள்ளக் கிடக்கை
இளையோர் நெஞ்சில் நெருப்பை மூட்டுமோ ?
அது முதியோர் நெஞ்சில் பால் வார்க்குமோ ?
ஏக்கத்தோடு கலைந்தது
இன்றைய முதியோர் சபை !

சு.பொ.அகத்தியலிங்கம்.
20 செப்டம்பர் 2019.






0 comments

அவர் பொய் சொல்ல மாட்டார் !!!

Posted by அகத்தீ Labels:






அவர் பொய் சொல்ல மாட்டார் !!!





ஆளுநர் சிவப்பாய் இருக்கிறார்
அவர் பொய் சொல்ல மாட்டார் !!!

குழந்தை அழும் சத்தம்கூட
அமைதியைக் குலைக்கக்கூடாது
என்பதற்காகவே
பெல்லட் குண்டுகளால்
குழந்தையைக்கூட மவுனிக்கச் செய்யும் !
காஷ்மீர் பனிமலையில்…

ஆளுநர் சிவப்பாய் இருக்கிறார்
அவர் பொய் சொல்ல மாட்டார் !!!

ராகுலும் ,யெச்சூரியும் ,ராஜாவும்
திருச்சி சிவாவும் இன்னபிறரும்
உள்ளே நுழைந்து
மயாணத்தை
அமளி துமளி ஆக்கவிடலாமா ?

ஆளுநர் சிவப்பாய் இருக்கிறார்
அவர் பொய் சொல்ல மாட்டார் !!!

சு.பொ.அகத்தியலிங்கம்
25 அக்டோபர் 2019.


0 comments
Subscribe to: Posts ( Atom )