விலங்குகளோடு
எனக்கு
எந்த விவாதமும் இல்லை .
அவை
ஒருபோதும் தம்
எல்லையை மீறுவதில்லை
தன் பலம் பலவீனம்
இரண்டையும் அறிந்தவை
விலங்குகள் மட்டுமே !
நரி தந்திரமானது
நீதான் சொல்லிக்கொண்டிருக்கிறாய்
உன்னைவிடவா ?
’குரங்கு புத்தி’ என்று
நீ செய்யும் அழிச்சாட்டியத்துக்கு
அதன் பெயரை ஏன் இழுக்கிறாய் ?
மூர்க்கனும் முதலையும்
கொண்டது விடாது என்கிறாய் ?
சரியா மூடனே !
‘முதலைப் பண்ணை ‘ காட்சிக்கு மட்டுமே
‘மதவெறி சாதி வெறி மூர்க்கப் பண்ணையாக’
தேசமே ஆனதெப்படி ?
மனித வியாபாரத்தை
‘குதிரை வியாபாரம்’ என்கிறாய்
விலங்குகள் அறியா வித்தை அது .
‘கர்ஜிப்பது’ , ‘கனைப்பது’ , ‘ஊளையிடுவது’
எல்லாம் விலங்குகள் உரிமை
நீ ஏன் காப்பி அடிக்கிறாய் ?
முதலில் மனிதத்தைப் படி
மதம் பிடிக்காத
மனிதனாக முயற்சி செய் !
அவ்வளவுதான்…..
சுபொஅ.

0 comments :
Post a Comment