தூய்மைப் பணியிலிருந்து விடுதலை எப்போது ?

[ இங்கே நான் சொல்லுவது முழுவதும் என் சொந்தக் கருத்தே.]

தூய்மைப் பணியாளர் போராட்டத்தை ஆதரிக்கிறேன் . அவர்கள் ஊதியம் குறையக்கூடாது என்பது மட்டும் அல்ல அதிகரிக்கவும் வேண்டும் .பணி பாதுகாக்கப்பட வேண்டும் . பணி நிரந்தரம் செய்யப்பட வேண்டும் .தனியார் மயம் கூடாது . இக்கோரிக்கைகளை ஆதரிப்பதும் திமுக அரசின் ஒட்டுக்குமுறையை எதிர்ப்பதும் முற்றிலும் சரி ! முற்றிலும் நியாயம் ! இது ஒரு புறம் .

தூய்மைப் பணியில் ஈடுபட்டுள்ள ஒடுக்கப்பட்ட சமூகத்தை சமூக இழிவிலிருந்து மீட்க சொல்லப்படும் வாதங்கள் பல. அவை அபத்தமாய் உள்ளன ,கற்பனையாக உள்ளன. சாதிசமூக வேரைச் சரியாக உள்வாங்கதவையாக உள்ளன என்பது என் கருத்து . சில வாதங்களைப் பார்ப்போம்.

1] பணி நிரந்தரம் கூடாது ; அப்போதுதான் வேறு பணி தேடி செல்வார்கள் .
2] ஒடுக்கப்பட்ட சாதியினர் தூய்மைப் பணியிலிருந்து வெளியேற வேண்டும்
3] தூய்மைப் பணிக்கு அதிக ஊதியம் கொடுத்தால் எல்லா சாதியிலிருந்தும் வருவார்கள் .
4] வேறு சாதியினர் தூயமைப் பணிக்கு வந்தால் எல்லாம் இயந்திர மயமாகிவிடும் . நவீன மயமாகிவிடும்.

முதலில் பணி நிரந்தரம் என்பது பொருளாதார ரீதியான குறைந்தபட்ச பாதுகாப்பு . அதில் காலூன்றி தம் சந்ததியினரை படிக்கவைத்து வேறு பணிகளுக்கு அனுப்ப இயலும் . ஆகவே முதல் யோசனையை ஏற்க முடியாது . சமூக பாதுகாப்போடு கூடிய பணி நிரந்தரம் என்பது வர்க்க நலன் ,சமூகநிதி இரண்டிற்கும் அடிப்படையாகும் .

இரண்டாவது , தாங்களாக அப்பணியிலிருந்து வெளியேற வேண்டும் என்பதை நிராகரிக்கவும் முடியாது ;வற்புறுத்தவும் முடியாது .ஒரு காலத்தில் நாடார் சமூகம் என்ன நிலையில் இருந்தனர் ? ஆயின் , சுயமாக வியாபாரம் உள்ளிட்ட துறைகளில் காலூன்றி எழுந்தனர் என்பதும் அதற்கொப்ப அங்கே அக்காலத்தில் ஓர் சமூக விழிப்புணர்வு ஏற்பட்டது என்பதும் அனுபவம் . அதை அப்படியே காப்பி அடிக்க முடியாது .அன்றைய சூழல் வேறு ;இன்றைய சூழல் வேறு . ஆயினும் , படிப்பை கெட்டியாகப் பிடித்து சந்ததியினரை முன்னுக்கு கொண்டுவரலாம் .அதன் மூலம் தூய்மைப் பணியை உதறலாம் .இப்போதே வேறு பணிகளுக்குள் நுழைந்தோ [ அதனை முன்னிட்டு புலம் பெயர்ந்தாவது ] தூய்மைப் பணியை உதறலாம். இது அவரவர் தேர்வைப் பொறுத்தது ;திணிக்க முடியாது . அப்படி உதறி எழுவது அவர்களின் உரிமை விருப்பம் வாய்ப்பு சார்ந்தது . முடிவெடுக்க வேண்டியது அவர்களே !

மூன்று , அதிகச் சம்பளம் கொடுத்தால் எல்லா சாதியினரும் இப்பணிக்கு வந்துவிடுவார்கள் என்பது மிகை மதிப்பீடு . அங்கொன்றும் இங்கொன்றுமாக ஒரு சிலர் வரக்கூடும் ; இப்போதும் உள்ளனர் .ஆனால் அவர்கள் குறுக்கு வழிகளில் இப்பணியைச் செய்யாமல் பிறர் தலையில் கட்டிவிட்டு மேய்ப்பனராகி விடுகின்றனர் . அப்படியே செய்ய நேரிட்டாலும் ‘கார்ப்பரேஷன் வேலை’ என வெளியில் சொல்லித் திரிவர் . இப்பணியிலும் உயர் பொறுப்புகளுக்கு வேறு சாதியினர் வருகின்றனர் . அது பதவி கிரீடமாகிவிடுகிறது .sewage engineer கழிவுநீரகற்று பொறியாளர் , wast management expert கழிவு மேலாண்மை வல்லுநர் போன்றவற்றில் வேறு சாதியினர் வந்துவிட்டனர் .ஆனால் அடிமட்டத்தில் குப்பையை ,கழிவை நேரடியாக அகற்றும் பணியில் இன்னும் சாதியில் ஒடுக்கப்பட்டோரே உள்ளதைப் பார்க்க வேண்டும். ஆகவே அதிகச் சம்பளம் கொடுத்தால் இழிவு தொலைந்து எல்லோரும் வருவர் என்பது மிகைக் கற்பனையே !

நான்காவதாக , வேறு சாதியினர் இந்தப் பணிக்கு வந்தால் எல்லாம் நவீனமாகிவிடும் என்பதும் ஓர் மிகைக் கற்பனையே . இன்று அடுப்பங்கரை நவீனமயமாகிவிட்டது ஆயினும் இந்த அறைக்குள்தானே பெண்களைப் பூட்டி வைக்கிறோம். ஏன் எனில் பாலின சமத்துவ சிந்தனை இன்னும் வலுவாக வேர்விடவில்லை என்பதால்தானே . ’கேட்டரிங் டெக்னானலஜி’ படிக்க ஆண்கள் அதிகம் முட்டி மோதினாலும் , வீட்டு சமையலறை சுமை முழுவதும் யார் தலையில் ? பெண்கள் தலையில்தானே! ’லெதர் டெக்னாலஜி’ படிக்க ஐஐடி போவது யார் ? மேல் சாதியினர் . தோலைப் பதப்படுத்தும் அடிமட்டப் பணியில் இன்னும் யார் உள்ளனர் ? ஒடுக்கப்பட்டோரும் சிறுபான்மையினருமே ! ஆகவே நவீனம் மட்டுமே முழுவிடுதலை தந்துவிடுமா ?

உழவாரப் பணி , கோயில் குளத்தை சுத்தம் செய்வது புண்ணியம் , காந்தி ஆசிரமத்தில் எல்லோரும் தூய்மைப் பணி செய்தனர் , ’தூய்மை இந்தியா’ என கூவி மோடி பெரிதாகத் தப்பட்டம் அடித்தார் . காலங்காலமாகப் பிரச்சாரம் தொடர்கிறது .ஆனாலும் சுற்றுப்புறத் தூய்மையைப் பேணுவது என்பது நம் பழக்க வழக்கமாக பண்பாட்டுக் கூறாக இன்னும் மலரவில்லையே ஏன் ? தடை நம் மூளையில்தான் உள்ளது .

தூய்மைப் பணி என்பது கர்மயோகம் என எழுதி ; அதன் மூலம் சொர்க்கம் நிச்சயம் என மோடி உறுதி சொன்ன பின்பும் குஜராத்தில் கூட வேறு சாதியினர் தூய்மைப் பணிக்கு வந்தனரா ? இல்லையே ! சொர்க்க வாசல் திறக்க வைகுண்ட ஏகாதேசியில் விழித்திருக்கும் ஆன்மீகக் குஞ்சுகள் சொர்க்கத்தற்கு ’எளிதான ரூட்’ என மோடி சொன்ன இப்பணியில் வந்தனரா ? தேசபக்தியை பற்றி வாய்கிழியப் பேசும் குஜராத்திகள் இராணுவதில்கூட சேருவதில்லை .அங்கே எல்லோரும் அம்பானி அதானி அல்ல ; வறுமை சூழினும் பாணி பூரி விற்றுப்பிழைத்தாலும் இராணுவத்திற்கு போவதில்லை குஜராத்திகள் . அது ஒரு சமூக இறுக்கம் . ஆக தூய்மைப்பணிக்கு அதிகச் சம்பளமோ நவீனமோ இந்த சமூக இழிவைப் போக்கிவிடும் என்பதும் மிகைக் கற்பனையே !

மெத்தப் படித்தவர்கள் வாழும் எம் அடுக்ககத்தில் குப்பை கொட்ட தனி இடமும் தொட்டியும் உண்டு ; தினசரி பஞ்சாயத்தார் அதை எடுத்துச் செல்வர் . ஆனால் இங்கு குப்பைத் தொட்டியில் போடுவதில்கூட பொறுப்பின்மையே நிலவுகிறது . டூ விலரிலோ காரிலோ பயணித்தபடியே குப்பைப் பையை வீசி எறிவதும் அது எங்கும் சிதறுவதும் வாடிக்கை . தெருக்களிலும் இதே நிலைதான் . மாடியிலிருந்து வீசும் புத்திசாலிகளும் உண்டு . எங்கள் அடுக்ககத்தில் ஹவுஸ் ஹிப்பிங் தூய்மை பணி செய்யும் வேலைக்கு ஊதியம் உயர்த்த வேண்டும் என்ற வாதம் எழுந்த போது , இது பெண்கள் வேலை ஆண் செய்தாலும் குறைவாகத்தான் சம்பளம் கொடுக்க வேண்டும் என வாதிட்ட படித்த நல்ல ஊதியம் வாங்குகிற பிரக்ஸ்பதியைப் பார்த்தேன். குப்பை அள்ளுபவரை மனிதனாகவே மதிப்பதில்லை . கடுமையாக சண்டை நடத்தி ஊதியம் உயர்த்தினோம் . குடியரசு தினத்தில் கொடியேற்றும் வாய்ப்பை அளித்து பெருமைப் படுத்தினோம். இது சும்மா தகலுக்காக .

வீட்டில் குப்பைகளை பெருக்குவது துணி துவைப்பது [ வாஷிங்மெஷின் ஆனாலும் ] , வீட்டை சுத்தம் செய்வது ,பாத்திரம் கழுவுவது எல்லாம் இன்னும் பெண்கள் தலையில்தானே பெரிதும் சுமத்தப்படுகிறது . பெண்களால் இச்சுமையைத் தூக்கி எறிய முடியாத அளவு குடும்பச் சூழல் ,சமூகச்சூழல் . அந்தக் கோபத்தில் கண்ணை மூடிக்கொண்டு குப்பையை வெளியே தூக்கி வீசுகின்றனர் . தெருக்களிலும் இதே நிலைதான் . மாடியிலிருந்து வீசும் புத்திசாலிகளும் உண்டு .

வீட்டுக்கு உள்ளே தூய்மைப் பணி செய்ய பெண்கள் ,வெளியே தூய்மைப் பணி செய்ய ஒரு குறிப்பிட்ட சாதி என்கிற சனாதனப் பார்வை நம் மூளையில் உறைந்திருப்பதால் தூய்மையைப் பற்றிய பொறுப்பற்று குப்பையை கண்டபடி வீசுகிறவராக உள்ளனர் ஆண்களும் பெண்களும் . இந்த கரடு தட்டிப்போன வறட்டுப் பார்வை அனைவர் மூளைகளிலிருந்தும் துடைத்தெறியப்படும் வரை பெரிய மாற்றம் நிகழ வாய்ப்பே இல்லை . ’தூய்மை இந்தியா’ அதுவரை வெறும் பேச்சே ! அடித்தளத்திலிருந்து எரிமலைபோல் கலகம் வெடிக்கும் போதே விடை கிடைக்கும் . அதற்காக இப்போதே கனலை விசிறிவிடுவது தவறல்ல . தேவை .

சமூகநீதி பேசுகிறவர்களும் சமத்துவம் பேசுகிறவர்களும் இந்தப் போரில் ஒன்றிணையாமல் விடிவு இல்லை . இதனை உணர்ந்தோமா ?

சுபொஅ.
21/08/25.

தமிழ்நாட்டில் வாக்குத் திருட்டு நடக்காதா ? நடக்கும் ? தேர்தல் ஆணையம் நாக்பூர் சாவிக்குத்தானே இயங்குகிறது . இதைத்தானே ’பிரமாண்டக் கூட்டணி’ என்றார் எடப்பாடி . ஆகவே இங்கேயும் இரட்டை விழிப்புணர்வு தேவையே ! கடும் போராட்டம் தேவை .அதற்கேற்ப வியூகமும் பக்குவமான அணுகுறையும் தேவை .

வெறும் வாக்கு மோசடி மட்டுமல்ல . ஒப்பீட்டளவில் சமூகநீதி சற்று நிலவும் தமிழ்நாட்டில் அதற்கும் வேட்டுவைக்கும் ’சோஷியல் என்ஜினியரிங்’ வேலை ஆர் எஸ் எஸ் மூலம் பல காலமாக நடந்து வருகிறது . ஆம் இங்கு சாதியமும் பாலின ஒடுக்குமுறையும் முற்றாக ஒழிந்துவிடவில்லைதான் ; ஆயிரம் ஆண்டு நோய் தொற்றை ஒரு நூற்றாண்டில் முற்றாக துடைத்திடல் சவால்தான் . நோய்க்கிரிமிகள் புதிய அவதாரம் எடுப்பதுபோல் சாதியமும் பாலின ஒடுக்குமுறையும் புதிய அவதாரம் எடுப்பது தமிழ்நாட்டிற்கு மிகப்பெரிய சவால்தான். அதில் ஆர் எஸ் எஸ் பங்கு திரைமறைவில் மிகப்பெரும் அளவு உள்ளது என்பது கண்கூடு .

சாதிய சங்கங்களில் ஆர் எஸ் எஸ் ஊடுருவி மிகவும் சாதிவெறி தலைகேறிய சிலரை உசுப்பிவிட்டு ஆங்காங்கு பல சாதிய மோதல்களைத் தூண்டிவிட்டு வருகிறது . இந்த சதியாளர்கள் வெளிஉலகின் கண்ணில் படாமல் காரியமாற்றிவதில் வல்லுவரான ’கார்யகர்த்தாக்கள்’.  

பார்ப்பணியத்தையும் சனாதனத்தையும்  மூளையில் சுமந்து திரியும் இடைநிலை மற்றும் ஒடுக்கப்பட்ட சாதிகளில் ஒரு சிறு பிரிவினர் , படித்தவர்கள் உட்பட இதில் அங்கமாகி உள்ளனர் . இதில் அந்த கார்யகர்த்தாக்கள் வெற்றிபெறத் தொடங்கி இருப்பதே அதிக ஆபத்தானது .

“ ஆண்டவரே ! இவர்கள் அறியாமல் செய்த பிழையை மன்னியும்” என மன்றாட முடியாது ; இது சமூகச் சவாலாகிறது . தற்போது அந்த விஷக்கிருமியால் அந்த சிறுவட்டத்துக்கு வெளியே பரவமுடியவில்லை என்றாலும் சமூக உளவியலில் மெல்ல மெல்ல நஞ்நேறிக்கொண்டிருக்கிறது .ஆகவே நம் பார்வையும் பணியும் போதாது .போதாது .போதாது . ஆகவே மூளையில் படிந்துள்ள இந்த பிற்போக்குத் தனத்துக்கு எதிராக வீரியமான தத்துவப் போராட்டம் தேவை .

சாதியமும் சனாதனமும் தன்னை மறுகட்டமைப்பு செய்து புதுக்குரலில் நயவஞ்சகத்தை மூடி மூலம் பூசி பேசிவருபவற்றை உள்வாங்கிட வேண்டும் ; அவற்றை எதிர்த்த தத்துவப் போராட்டமும் தன்னை மறு கட்டமைப்பு செய்திட வேண்டும் .பழைய மொழியில் பழைய வாதங்களை அப்படியே கிளிப்பிள்ளை போல் ஒப்பிப்பது பயன்தராது . புதிய குரலில் அறிவியல் ரீதியாக சமுதாய மாற்றச் சிந்தனையோடு பேசப்பழக வேண்டும் . விஷவேரில் வெந்நீர் ஊற்ற கற்க வேண்டும் .கற்பிக்க வேண்டும் . பெரியாரிய ,அம்பேத்காரிய ,மார்க்சிய இயக்கங்கள் முன் உள்ள சவால் இது .

ஒரு பக்கம் தமிழ் நாட்டின் மீது இப்படி ஓர் வஞ்சக நரித்தன வேலையை ஏவிவிட்டுக் கொண்டே , மறுபக்கம் தமிழ்நாடு இப்போது கல்வியில் அடைந்த சிறு முன்னேற்றத்தையும் தரம்  தாழ்த்தி அவமானப்படுத்தும் வேலையை ஆளுநரி செய்கிறது . வேதகாலத்தில் நோயே கிடையாது என மூளையை கழற்றி வைத்துவிட்டு உளறித் திரியும் அந்த நரிதான் ,தமிழக கல்விமுறை தரமில்லை என சேறு வாரி இறைக்கிறது . கல்வித் தரம் மேம்பட வேண்டும் என்பதில் யாருக்கு இருவேறு கருத்து இருக்கவே முடியாது . ’அடுத்த படியில் ஏறு’ என ஊக்குவிப்பது வேறு ; கேலியும் கிண்டலும் அவமரியாதையும் செய்து முடக்க முனைவது வேறு .நரி செய்ய முனைவது இரண்டாவது வகையைத்தான் .

ஆக ,கல்வி ,சமூகநீதி ,பாலின சமத்துவம் ,  இவற்றில் சனாதனமும் சாதியமும் பின்னும் நுட்பமான சதிவலையை பிய்த்து எறிய கூர்த்த பார்வையும் பரந்த அணுகுமுறையும் தொடர்ச்சியான செயல்பாடும் தேவைப்படும் காலத்தில் வாழ்கிறோம் . ஒவ்வொரு நிகழ்வையும் இக்கோணத்தில் பார்த்து எதிர் கொள்ள வேண்டும் . வேறு வழியில்லை.

இவை என் தனிப்பட்ட கருத்துகளே .இதனை நான் சார்ந்த கட்சி மீது ஏற்றி குழப்ப வேண்டாம் .

சுபொஅ.

17/08/25.

நேற்றைய கள்ள ஓட்டும் ; இன்றைய ஓட்டுத் திருட்டும் …

“ கள்ள ஓட்டு” புதிதல்ல ; தேர்தல் தோறும் பேசப்படுபவைதான் . செத்தவர் வாக்களிப்பதும் , உயிரோடு இருப்பவர் செத்துப் போவதும் தேர்தல் அதிசயங்கள் .ஆங்காங்கு வலுவான கட்சியோ / சாதியோ /தனிநபரோ வாக்குச் சாவடியைக் கைப்பற்றி தங்களுக்குத் தாங்களே வாக்களித்துக் கொள்வது அது . ஆள் மாறாட்டம் செய்து வாக்களிப்பதும் “ கள்ள ஓட்டே” . இவை எல்லாமே சட்டப்படி குற்றம் . கைதாகலாம் .வழக்கு பாயலாம் . ஊருக்கு வெளிச்சம் போட்டுக் காட்டப்படலாம் . இவை எல்லாம் அங்கொன்று இங்கொன்றாக  நடக்கும் . இதுவே தவறுதான் . தவிர்க்க வேண்டும் . தடுக்க வேண்டும் .

இப்போது அம்பலப்படுத்தப்படும் “  ஓட்டு திருட்டு” என்பது தேர்தல் ஆணையமே திட்டமிட்டு மோசடி செய்து பாஜக வென்றதாக அறிவிக்கும் மகா மோசடி .ஜனநாய விரோத செயல் . வேலியே பயிரை மேயும் கொடூரம் . இதனை செய்வதற்காகவே தேர்தல் ஆணையர்களை தேர்வு செய்யும் குழுவில் இருந்து உச்சநீதி மன்ற நீதிபதியை நீக்கிவிட்டு உள்துறை அமைச்சரை சேர்த்தது மோடி சர்க்கார் . நாக்பூர் கைக்கூலி – ஆர் எஸ் எஸ் அடியாட்களை நியமித்து மோசடியை அரங்கேற்றியது . கொள்ளையடிக்க வசதியாய் தம் கொள்ளைக்கார கூட்டத்தில் ஒருவனையே காவலாளியாக நியமிக்கும் கொடுமை .

ஏற்கெனவே நீதிமன்றம் , அமலாக்கத்துறை ,வருமானவரித்துறை ,ஊடகங்கள் ,கல்வி , ,சிபிஐ என ஒவ்வொரு  உறுப்பையும் தன் சாவிக்கு இயங்கும் ரோபட்டாக மாற்றிய நாக்பூர் கண்ட்ரோல் ரூம்  தேர்தல் ஆணையத்தையும் கைப்பற்றிவிட்டது .அதற்கேற்ப சட்டத்தை திருத்தியது மோடி சர்க்கார் . இப்போது தேர்தல் ஆணையம் ’ஓட்டு திருடும் இயந்திரமாகிவிட்டது’ .

EVM வாக்கு இயந்திரமும் மோசடிக்கான கைக்கருவி ஆக்கப்பட்டுவிட்டது .

“ நான் அளிக்கும் வாக்கு நான் வாக்களித்த கட்சிக்கே போகும் என உத்தரவாதம் தரமுடியுமா தேர்தல் ஆணையமே !” இப்போது மக்களின் கேள்வி இதுவே !

நாளை சுதந்திரதினம் .

ஆயின் தேர்தல் ஜனநாயகம் நாக்பூர் நாசசக்திகளிடம்  சிக்கிச் சீரழிவதை எப்படிக் கொண்டாடுவது ?

இதை எதிர்த்த போராட்டம் எளிதல்ல ; நெடிய மக்கள் போராட்டத்துக்கு தயாராவோம் ! வெல்வோம் !

சுபொஅ.

14/08/25.

எழுத்துக்கும் வாழ்க்கைக்கும் இடையே ….

ஒரு எழுத்தாளர் மனைவியின் வெள்ளந்தியான பேட்டியை காணொளியில் பார்த்தேன். எழுத்துக்கும் வாழ்க்கைக்கும் உள்ள இடைவெளி பளிச்சென புலப்பட்டது . இது விதி விலக்கல்ல . படைப்பாளியை ஓரம் தள்ளிவிட்டு படைப்பைப் பார்க்க வேண்டிய சூழலே மிகுந்துள்ளது .

’பெரிய மனிதர்கள் ‘ /எழுத்தாரோ / அரசியல் தலைவரோ /கல்வியாளரோ பிரபலமானவரோ யாராயினும் பேச்சுக்கும் செயலுக்கும் இடைவெளி இருக்கத்தான் செய்கிறது . அதனால் எல்லோருமே போலி என சொல்லிவிடமுடியுமா ? ஏன் உங்கள் வீட்டில் என் வீட்டில் நம் இதயத்தை எண்ணத்தை  ஸ்கேன் செய்ய முடியுமானால் ஒவ்வொரு கணவன் மனைவிக்குள் புதைந்து கிடக்கும் உண்மைகள் பூகம்பமாய் வெடிக்கக் கூடும் . ஆகவே அந்த ’பெரிய மனிதர்கள்’ அப்படியே இருக்கட்டும் என்று விட்டுவிட முடியுமா ?சிக்கலான கேள்விதான்.

முற்போக்காளராய் / சாதி ,மத மறுப்பாளராய் /பகுத்தறிவாளராய் / கம்யூனிஸ்டாய் /போராளியாய் /புரட்சிக்காரராய் / அறிவியலாளராய் வாழ ஆசைப்படுவதும் ; அதற்காக பேசுவதும் ; எழுதுவதும் ; செயல்படுவதும் ஒரு வகையில் எளிதானது . ஆயின் சொந்த வாழ்வில் தனிப்பட்ட முறையில் சறுக்கலோ / வழுக்கலோ இல்லாமல் வாழ்வது மிகப் பெரிய சவால் .

ஏனெனில் உன்னைச் சுற்றி உள்ள உலகின் அழுக்குகளும் கசடுகளும் கிருமிகளும் உனக்குள்ளும் நிறைய இருக்கும் . அதிலிருந்து மீள உனக்குள்ளும் ,உன்னோடு வாழ்பவரோடும் பிறரோடும் நீ நடத்த வேண்டிய போராட்டமும் ; அவர்கள் உன்னோடு மோதிக்கொண்டே இருப்பதும் தொடர்கதை . இந்தப் பயணத்தில் நீ எந்த அளவு உறுதியோடு நிற்க முயல்கிறாய் என்பதே முக்கியம் ; வெற்றி தோல்வி குறிப்பிட்ட அக புற சூழலோடும் சுய முயற்சியோடும் இணைந்தது .

நூறுசதம் புனிதமானவரோ புரட்சிகரமானவரோ யாருமில்லை . ஆனால் கால ஓட்டத்தில் முட்டி மோதி மேம்பட்டுக்கொண்டே இருப்பவரைத்தான் நாம் கொண்டாட முடியும் .வாழ்க்கையில் இழுப்பில் தன்னை இழந்து கொண்டே இருப்பவரை அடையாளம் காண வேண்டும் . அடையாளம் காட்டவும் வேண்டும் . இதுவும் தவிர்க்க முடியாததே !

நாத்திகர் என்பதாலேயே கோட்சேவை ,சாவர்க்கரை கொண்டாட முடியுமா ? புலால் மறுப்பாளர் என்பதால் ஹிட்லரை ,மோடியை ,அமித்ஷாவை கொண்டாட இயலுமா ? முடியுமா ?

’இறந்த தன் மனைவியின் ஆவியுடன் பேசுகிறேன்’ என்று சாகும்வரை சொல்லிக் கொண்டே இருந்த  மூடநம்பிக்கையைச் சுமந்து மறைந்த நீதிபதி கிருஷ்ணய்யரின் அரிய சமூகநீதித் தீர்ப்புகளை சமூக பங்களிப்பை நிராகரிக்க முடியுமா ? கவிஞர் கண்ணதாசனின் தனிப்பட்ட வாழ்வை , அவர் அங்கும் இங்கும் தாவிக்கொண்டே இருந்ததை , நாளைக்கு ஒன்று பேசியதை சுட்டி அவர் பாடல்களின் வலிமையை இனிமையை நிராகரிக்க முடியுமா ? இளைய ராஜாவின் அரசியல் தத்துவச் சறுக்கலை விமர்சிப்பதும் அவர் இசையை ரசிப்பதும் தவிர்க்க முடியாததுதானே !

மேற்கத்திய சமூகம் Open society அதாவது திறந்த சமூகம் அங்கே எதையும் மூடி மறைப்பதில்லை , ஒவ்வொருவரும் அவர் செய்கையை மூடிமறைப் பதில்லை .அங்கே எழுத்தாளரோ தலைவரோ வெளிப்படையாகவே வாழ்கின்றனர் . புரிவது எளிது .ஆகவே படைப்போ கருத்தோ மட்டுமே அளவு கோலாகும் .அங்கேயும் தலைவர்கள் சுய சறுக்கல் பொது விமர்சனத்தில் இருந்து தப்புவதில்லை .

இங்கு நாம் மூடுண்ட சமூகத்தில் வாழ்கிறோம் . ஹிப்போகிராட் சொசைட்டி Hypocrite Socity .இங்கே முதுக்கு பின்னால் ஒன்று முகத்துக்கு நேராக ஒன்று என்கிற தவறான பண்பாட்டுக்கூறு எங்கும் வியாபித்துள்ளது . ஆகவேதான் படைப்பைபோ படைப்பாளரையோ எடை போடுவது சவாலாக உள்ளது . மேலும் சமூக வரலாற்றுப் பின்புலத்தோடு காலநிரலோடு  எதையும் ஒப்பிட்டுப் பார்க்காமல் எதோ ஒரு துண்டு துக்காணிச் செய்தியையோ அல்லது கத்திரிக்கப்பட்ட துண்டு வார்த்தைகளையோ வைத்து மயிர் பிளக்கும் விவாதம் செய்து கொண்டிருக்கிறோம்.

யாராயிருப்பினும் ஒருவரின் தனிப்பட்ட சமூக பங்களிப்பை , தனிப்பட்ட பலவீனங்களை , தவறுகளை எல்லாம் கூட்டிக் கழித்து கொள்வன கொண்டு தள்ளுவன தள்ளி எடைபோடலே இயங்கியல் அணுகுமுறை . இதுவே சமூக விஞ்ஞான அளவுகோல் . இதை புரிந்து ஏற்பது சுலமமல்ல . மேலோட்டமாய் ஏற்பதும் நிராகரிப்பதுமே பொது புத்தியாய் உள்ள சூழலில் யாரொருவரையும் எடை போட புத்தியைத் தீட்ட வேண்டும் .வேறு வழியில்லை .

சுபொஅ.

[ஆகஸ்ட் மாத   “காக்கைச் சிறகினிலே..” இதழில் வெளிவந்துள்ள கட்டுரை இது .]

ஆன்மீகம் என்ற சொல்லுக்கு பின்னே…….

சு.பொ.அகத்தியலிங்கம்.

ஆன்மீகம் என்ற சொல் போல் மிகவும் மலினப்படுத்தப்பட்ட ; மிகவும் கொச்சைப் படுத்தப்பட்ட வெறொரு சொல் இருக்குமா என்பது சந்தேகமே . இதனை நீருபிக்க நாத்திகவாதிகளின் எழுத்துகளோ பேச்சுகளோ தேவை இல்லை . தங்களை ஆன்மீகவாதிகள் என்று பிரகடனப்படுத்திக் கொள்வோர் வாக்கு மூலங்களே போதும் . இதில் எல்லா மதத்தவரும் ஒருப்போல்தான் இருக்கின்றனர் .

குறிப்பாக இரண்டு கோணங்களில் இதனை அலசலாம் . ஒன்று , ஆன்மீகவாதிகள் என்று தங்களைப் பிரகடனப்படுத்திக் கொள்ளும் சந்நியாசிகள் ,உபந்யாசிகள் , பிரச்சாரர்கள் பேச்சையும் எழுத்தையும் தொகுக்க ஆரம்பித்தால் அது முரண்பாடுகளின் மூட்டையாக பல்லிளிக்கும் . அவை தன்னைத்தானே அம்பலப்படுத்திக் கொள்ளும் . மீண்டும் சொல்கிறோம் மதம் எதுவாயினும் நிலைமை இப்படித்தான் . ஆயினும் , “ எங்கள் மனம் காயப்பட்டுவிட்டது” என அவர்களின் சிஷ்யகோடிகள் கூப்பாடு போடக்கூடும் என்பதால்  அவை குறித்து இங்கு பேசப்போவதில்லை .அவை உங்கள் தனிப்பட்ட நம்பிக்கை என விட்டுவிடுகிறோம்.

இரண்டாவது , ஆன்மீக இதழ்களாக மாதந்தோறும் அல்லது வாரந்தோறும் வெளிவரும் ஏடுகள் மற்றும் காட்சி ஊடகங்களை ஆய்வு செய்தாலே ஆன்மீகத்தை மிகவும் கேலிக்குரியதாக மாற்றிக் கொண்டிருப்பவர்கள் இவர்களே என்பது வெட்டவெளிச்சமாகும் . பெரும்பாலான ஆன்மீக இதழ்கள்  ”இந்து இதழ்”களாகவே முழுதாய்த் தங்களை வெளிப்படுத்திக் கொள்கிறது . தங்களை பொதுவானவர்கள் எனக் காட்ட ஓரிரு பக்கங்களில் பிற மதம் குறித்துப் போகிற போக்கில் சில துணுக்குகளை வீசுவதோடு சரி ! ஆக , இவ்வேடுகள் தோற்றத்திலேயே ஆன்மீகம் என்ற முகமூடியைக் கழற்றிவிட்டு மத பிரச்சார ஏடாகவே வெளிப்பட்டுவிடுகிறது . கிறுத்துவ ,இஸ்லாமிய,இதர மத பிரச்சார ஏடுகளிலும் ஆன்ம பலம் மிக்க மானுடரை உருவாக்கும் நோக்கம் இருப்பதில்லை ;  ‘மதம் பிடித்த மனிதனை’ உருவாக்கவே மெனக்கிடுகிறது .

ஆன்மீக ஏடுகளை ,காட்சி ஊடகங்களை முன்வைத்து இங்கு நான் சில கேள்விகளை முன்வைக்கிறேன் .அவற்றை முன்வைத்து நீங்களே உங்களுக்கு விருப்பமான மேற்படி ஏடுகளில் அல்லது காட்சி ஊடகங்களில் பதிலைத் தேடுங்கள் ! ஆய்வுக்கு உட்படுத்துங்கள்! நான் கூறுவது சரியா பிழையா என்பது தெளிவாகிவிடும்.

1] கஷ்ட நிவர்த்திக்கு பரிகார ஸ்தலங்கள் ,பரிகார பூஜைகள் ,பரிகாரச் சடங்குகள், தொழுகைகள் ,பிரார்த்தனைகள் ,ஜெபங்கள் என வாராவாரம் பல்வேறு யோசனைகளை முன்வைக்காத ஊடகம் ஏதேனும் உண்டா ? இவற்றை பட்டியல் போட்டால் ஒவ்வொரு பிரச்சனைக்கும் பலநூறு யோசனைகள் - தப்பு தப்பு பல ஆயிரம் யோசனைகள் முன் மொழியப்பட்டிருக்கும் அல்லவா ; அவற்றில் எது சரி , எது தவறு , என்பதை ஏதேனும் வழியில் ஆய்வு செய்து பட்டியிலிட முடியுமா ?

2] அவற்றைக் கடைபிடித்தும் இன்னும் பக்தர்கள் முழுவதும் ஏதேனும் பிரச்சனைகளில் சிக்கி தடுமாறுவது ஏன் ? குறிப்பாக உடனே வேலைகிடைக்க , கல்யாணம் ஆக , பணக்கஷ்டம் தீர ,கடனில் இருந்து விடுதலை பெற , நோயிலிருந்து விடுபட என அன்றாடம் உலுக்கும் ஆயிரம் பிரச்சனைகளுக்கு இவ்வளவு எளிய பரிகாரங்களும்  நிவாரணங்களும் முன்மொழியப்பட்டும் ;   பக்தியும் இவற்றில் நம்பிக்கையும் கொண்டு பின்பற்றும் கோடிக்கணக்கான மக்கள் தொடர்ந்து பிரச்சனைகளில் உழல்வது ஏன் ? ஒற்றைக் கலாச்சாரம் ஒற்றைப் பண்பாடு ஒற்றை மொழி என உளறுவோர் ”ஒற்றைப் பரிகாரத்தை” முன்மொழியலாமே ! அதைச் செய்யாமல் வாராவாரம் புதுசு புதுசாக குழப்புவது யார் ? ஏன் ?

3] ஒவ்வொரு கோயிலுக்கும் ஒவ்வொரு சாமிக்கும் ஒவ்வொரு கடவுளுக்கும் விஷேச சக்தி இருப்பதாகவும் , அந்த குறிப்பிட்ட சாமியை குறிப்பிட்ட முறையில் வழிபடுவோர் அந்த குறிப்பிட்ட பிரச்சனையிலிருந்து விடுபடுவதாகவும் வாராவாரம் எழுதுகின்றன அவ்வேடுகள் . அவற்றைத் தொகுத்துப் பார்த்தால்  ஒரே பிரச்சனைக்கு நூறு சாமிகளை ஒரே ஏடு எழுதியிருக்கும் ; புரட்டிப்பார்த்தால் பட்டியல் நீளும் . அதில் எது உண்மை,, எது பொய் ,எது சக்தி மிக்கது ,எது டுப்பாக்கூர் என கூற முடியுமா ? அல்லது வெறும் விளம்பரச் செய்திகள்தாமா அவை ? அந்தந்த சாமிக்காவது தனக்கு இப்படிப்பட்ட ’விஷேச பவர்’ இருக்கிறது என்பது தெரியுமா ? ஏன் இந்த கேலிக்கூத்து ?

4] புராண கதைகளாக வாராவாரம் வெளியிடுகிற அனைத்தையும் தொகுத்துப் பார்த்தால் ஒவ்வொன்றைக் குறித்தும் நூறு பொய் இருக்கும் . அவற்றிற்கும் இன்றைய நவீன வாழ்க்கைக்கும் அறிவியல் வளர்ச்சிக்கும் ஏதாவது சம்மந்தம் உண்டா ? அவற்றில் எத்தனை ஆபாசக் கதைகள் இருக்கும் ? அதை எல்லாம் கூச்சநாச்சமின்றி எப்படி எழுதவும் பேசவும் முடிகிறது ?

5] மகான்கள் வாழ்வில் நடந்ததாக இவ்வேடுகள் எழுதிக் குவித்த செய்திகள் எதற்காவது தக்க ஆதாரம் உண்டா ? ஒரே கதையை வெவ்வேறு மகான்கள் வாழ்வில் நடந்தாக வெவ்வேறு இடங்களில் எழுதி வைத்துள்ளவற்றை மறுக்க முடியுமா ? சரி ! இப்படி எழுதி வைக்கிற செய்திகளில் எத்தனை ஆன்மீக மேம்பாட்டுக்கு உகந்தவை சொல்ல முடியுமா ; அவை பொய்மையையும் போலிபிம்பத்தையும் கட்டமைப்பதைத் தவிர உருப்படியாய்ச் செய்தது என்ன ?

6] ஆன்மீகம் என்பது மதம் சார்ந்தததா ? மனித விடுதலை சார்ந்ததா ? இந்த ஏடுகள் எழுத்தும் பார்வையும் மதம் சார்ந்து இருக்கிறதா , மனித விடுதலை சார்ந்ததாக இருக்கிறதா ? ஆன்மீக குருக்களிலும் மனித குலம் முழுவதையும் அன்பால் குளிப்பாட்டிய  மனிதகுல விடுதலைக்காக அர்ப்பணித்த சிலர் உண்டு .அவர்கள் சார்ந்து எழுதும் போதாவது மனிதகுலத்தை வாரி அணைக்கும் வெள்ள அன்பு இவ்வேடுகளில் வெளிப்பட்டது உண்டா ? அவர்களை  வெறும் கருவேப்பிலையாகப் பயன்படுத்தல் அன்றி வேறு நோக்கில் எப்போதேனும் சொன்னது உண்டா ?

7] ”இதை இதைச் செய்யலாம் இதை இதைச் செய்யக்கூடாது” என இவ்வேடுகளில் பட்டியல் போட்டு பக்தர்களை குறிப்பாக பெண்களை மிரட்டி எழுதுவதில் ஏதேனும் வரைமுறை உண்டா ? இப்படி ஒவ்வொரு மதமும் ஒவ்வொரு பிரிவும் ஒவ்வொரு சந்தர்ப்பத்திலும் போட்ட பட்டியலைத் தொகுத்தால் ஒன்றுக்கொன்று முரணாக அல்லவா இருக்கும் ? இன்றைய அறிவியல் வளர்ச்சி காலத்தில் ,ஆணும் பெண்ணும் உழைத்து வாழும் யுகத்தில் , கல்வி அறிவு மேம்பட்டிருக்கும் காலத்தில் , அறிவியல் அன்றாடம் புதிய சாளரங்களைத் திறந்திருக்கும் சூழலில் , இவ்வேடுகள் போடும் பட்டியலுக்கும் வாழ்க்கை அனுபவத்திற்கும் ஏதேனும் சம்மந்தம் உண்டா ?

8] இவ்வேடுகள் சுட்டும் ஆன்மீகம் இதுதான் என ஒரு இலக்கணத்தை வரைந்து காட்ட முடியுமா ? மூடநம்பிக்கைகளை மட்டுமே அவ்வேடுகள் விதைத்தன எனக் கூறுவதில் பிழை இருக்க முடியுமா ? மதம் ,சாதி இவற்றின் பெயரால் மனிதகுலம் அடித்துக் கொண்டு சாவதை தடுத்து நிறுத்த , “எல்லோரும் இறைவனின் பிள்ளைகள் ; எல்லோரும் அன்பு செய்து வாழ்வீர் !” என வலியுறுத்த  இவ்வேடுகள் ஒரு துரும்பையேனும் எப்போதேனும் கிள்ளிப் போட்டது உண்டா ?

இப்படி கேள்விகள் நீண்டு கொண்டே போகும் . நீங்களே நூறு இதழ்களை சேகரித்து இவற்றுக்கும் இதுபோல் நீங்கள் எழுப்பும் கேள்விகளுக்கும் விடை காண முயல்வீர் ! ஆய்வு செய்வீர் !

அப்போது , ஆன்மீகம் என்ற சொல் போல் மிகவும் மலினப்படுத்தப்பட்ட ; மிகவும் கொச்சைப் படுத்தப்பட்ட வெறொரு சொல் இல்லை என்பதை இந்த ஆன்மீக வியாபாரிகள் வழியே நீங்கள் கண்டடைவீர்கள் ! ஆன்மீக வியாபாரத்தின் வீச்சும் ,செழிப்பும் ,கொள்ளை லாபமும், மோசடியும் , திருட்டும் உங்களைத் திடுக்கிடவைக்கும் . இவை வெறும் வார்த்தை அன்று. .உண்மை .உண்மை . உண்மை .

நன்றி : காக்கைச் சிறகினிலே , 2025  ,ஆகஸ்ட் இதழ்

டிஜிட்டல் உலகில் காசு போறது தெரியுமா ?

 “கையில வாங்கினேன் பையில போடல

காசு போன இடம் தெரியலே

என் காதலி பாப்பா காரணம் கேப்பா

ஏது சொல்லுவதேன்றும் புரியல்லே

ஏழைக்கு காலம் சரியில்லே

கையில வாங்கினேன் பையில போடல

காசு போன இடம் தெரியலே..”

1960 ஆம் ஆண்டு “ இரும்புத்திரை” படத்தில் திருச்சி லோகநாதன் பாடியது .பாடலை எழுதியது மக்கள் கவிஞர் பட்டுக்கோட்டை கல்யாணசுந்தரம் . இசை எஸ்.வி.வெங்கட்ராமன் . இப்பாடல் வரிகளை இன்றைக்கு கேட்டாலும் நம்மை தலையாட்ட வைக்கும் .

ஆனால் , ‘காசு போற இடம் தெரியாத’ அளவு டிஜிட்டல் உலகம் நம் கையிருப்பை களவாடுகிறது . பட்டுகோட்டை பாடல் வரியின் பொருளே சமூக உளவியலில் மாறி மரத்துப்போனதோ. அது குறித்து பேசுவோமா ?

முன்பு நூறு ரூபாய் எடுத்துக்கிட்டு கடைக்குப் போனால் விலையைக் கேட்டு , இருக்கிற காசுக்கு  ஏற்ப பொருட்களை வாங்குவோம் . இப்போது பொருட்களை வாங்கிவிட்டு  “போண் பே” பண்ணுகிறோம் .பெரும்பாலும் அது பட்ஜெட்டைத் தாண்டிப் போகும் ; ஆயின் உறைக்காது . நம்மை மீறி காசு கரைகிறது ; ஆனாலும் தெரியாது …

அதுமட்டுமா கிலோ எவ்வளவுன்னு கேட்டு அரைக்கிலோ கால்கிலோன்னு கேட்டு வாங்குவோம் .இப்போதெல்லாம் நீங்க எடுக்கிற  எடை கால் கிலோவா முன்னூற்றி பத்து கிராமா பிரச்சனை இல்லை .பில் அதுக்கு தானாகப் போட்டுவிடும் . கணக்கு பார்ப்பதும் கிடையாது .

சாப்பாடு , மளிகைச் சாமன் , காய்கறி ,லொட்டு ,லொசுக்கு எல்லாம் ஆன் லைனில் வாங்கிக் குவிக்கிறோம் . வாங்குவதும் பணம் கொடுப்பதும் நொடியில் நடந்துவிடுகிறது . செலவு கைமீறிப் போய்க் கொண்டிருக்கிறது .

ஒரு லிட்டர் fortune எண்ணை என்ன விலை என அறிந்து வாங்குவோம் . இப்போது விலை ஏற்றுவதில்லையாம் ,ஆனால்  அதே விலை ஆனால் 870 மில்லி பாக்கெட்டில் அடைத்து விற்கிறான் .நாமும் வாங்குகிறோம் .கிட்டத்தட்ட இது ஒரு வியாபரத் தந்திரமாகிவிட்டது .இதனை ’மோடி தந்திரம்’ என்கின்றனர் .

பெட்ரோல் விலை ஏறுவது நறுக்கென முன்பு உறைக்கும் .இப்போது விலை ஏறியது தெரியாது . ’நூறு ரூபாய்க்கு போடு ! ஐநூறு ரூயாய்க்கு போடு !’ன்னு பழகிட்டோம். பெட்ரோல் பங்கிலிருந்து வரும் நூறு பேரை வழிமறைத்து பெட்ரோல் இன்று என்ன விலைன்னு கேளுங்கோ , 99 பேர் திருதிருன்னு முழிப்பார்கள். இதில் இருந்துதான் ‘மோடி தந்திரம்’ உருவானது .

வருங்காலத்தில் மின்சாரம் ,தண்ணீர் எல்லாம் இப்படி கொடுக்கிற காசுக்கு தருவதை வாங்குவதாக மாறிப்போகும் .கட்டண ஏற்றம் தெரியாது .

காசை எண்ணிக் கொடுப்பதில்லை ; போண் பே அல்லது கார்டை உரசுகிறோம் , அதிலும் கிரடிட் கார்டு உரசி உரசி தீராத கடன் வலையில் சிக்குகிறோம் . உணர்ச்சியே இல்லை . டெபிட் கார்டு இருப்பை அறியாமல் அதிகபட்சம் உரசி விட்டு ; மினிமம் பேலன்ஸ் இல்லாமல் பைன் வேறு கட்டி அழுகிறோம். இருக்கிற காசுக்கு வாங்கிற காலம் போய் , ” கடையில இருக்கிறேன் அக்கவுண்டல காசு இல்லை உடனே ஆயிரம் போட்டுவிடுன்னு …” கணவனோ மனைவியோ கேட்கிற காலம் வந்தாச்சு … திட்டமிட்ட வாழ்க்கை இல்லை ; நாம் பொருட்களின் இழுப்பில் அல்லாடுகிறோம்.

காசு வருவதும் தெரியவில்லை ; போவதும் தெரியவில்லை டிஜிட்டல் பரிவர்த்தனை நம்மை எளிதாகச் சுரண்ட ; பிக்பாக்கெட் அடிக்க நல்ல வாய்ப்பாகிவிட்டது . எளிதாக இருக்கிறது ,சில்லறைப் பிரச்சனை இல்லை , பணத்தை சுமந்து திரிய வேண்டாம் எல்லாம் சரி . இனி இந்த டிஜிட்டல் உலகிலிருந்து தப்பிக்க ஒருபோதும் முடியாது ; எல்லோர் வாழ்விலும் அது ஒரு அங்கமாகிவிட்டது . சமூக உளவியலே பழகிப்போனது என்று சொல்வதா, மரத்துப் போனது சொல்வதா?

எப்படி ”நிரந்தர வேலை” என்கிற கருத்தே இன்றைய தலைமுறையிடம் காணாமல் போய்க்கொண்டிருக்கிறதோ ; அப்படியே  “விலையேற்றமும்” உறைக்காத அளவு டிஜிட்டல் மரத்துப் போகச் செய்கிறது என்பதும் உண்மை . உலக மயமும் நவீன மயமும் தன் சுரண்டலுக்கும் கொள்ளை லாவவெறிக்கும்  ஏற்ற மனிதர்களை வெறும் நுகர்வோர்களாய் பொம்மைகளாய் செதுக்குவதில் வெற்றி பெற்றுக் கொண்டிருக்கிறது . AI இன்னும் என்னென்ன செய்யப் போகிறதோ ? எதிர்காலச் சவால் நுட்பமானது தந்திரமானது ஆபத்தானது தவிர்க்கவே முடியாதது. அதனை எதிர்கொள்ளும் மனிதரை நாம் எப்படி உருவாக்கப் போகிறோம் ? கோடி டாலர் கேள்வி .

[  ரூபாய் தேய்ந்து கொண்டே போகிறது .ஒரு நாள் காணாமலே போகுமோ ! ஒரு கட்டத்தில் மோடி போகிற போக்கில் டிரம்ப் சொன்னாருன்னு ரூபாய் செல்லாது ,இனிஅமெரிக்க டாலர்தான் புழங்கணும்னு டிவியில வந்து சொல்லிவிடுவார்ன்னு நினைக்கிறேன். இல்லை .இல்லை .இதையும் அமெரிக்காவிலிருந்து டிரம்பே சொல்லிவிடுவாரோ!]

சுபொஅ.

20/07/25.