தொடக்கநிலைக் கேள்வி- பதில் - [ 6 ]

மார்க்சியத்துக்கு அப்படி என்ன ஸ்பெஷாலிட்டி ?

 கேள்வி :

 எத்தனையோ அரசியல் கொள்கைகள் இருக்கும்போது, மார்க்சியம் மட்டும்தான் சமூகத்தில் உண்மையான நிரந்தர மாற்றத்தைக் கொண்டுவரும் என்று எப்படி உறுதியாகச் சொல்கிறீர்கள்? காலந்தோறும் மாற்றங்கள் நிகழ்ந்துகொண்டுதானே இருக்கின்றது ; அப்படி இருக்க மார்க்சியத்துக்கு அப்படி என்ன ஸ்பெஷாலிட்டி இருக்கிறது ?

பதில் :

இயல்பாக எழக்கூடிய சந்தேகம்தான் . எத்தனையோ அரசியல் கொள்கைகள் ஆட்சி முறைகள் உலகெங்கும் இருக்கின்றன.அதிலொன்றுதான் மார்க்சியமா ? இல்லை .பாக்கி எல்லாம் ஒன்று . இது நேர் எதிர். இப்படிச் சொன்னால் குழப்பமாக இருக்கிறதா ? ஆயின், அதுதான் உண்மை .

லத்தின் அமெரிக்க பாதிரியார் ஒருவர்  சொன்னார் , “ நான் பசித்து வருவோர்க்கு தேவாலயத்தில் ரொட்டிகள் வழங்கினேன் . காருண்ய வள்ளல் என்றனர் .புகழ்ந்தனர் . விருதுகள் வந்தன . ‘அவர்களை, ஏன் ரொட்டி இல்லை?’ என்று கேள்வி எழுப்பச் சொன்னேன் . என்னை கம்யூனிஸ்டு என்றனர் . சிறையில் அடைத்தனர்.”

எல்லா மதங்களும் தத்துவங்களும் கட்சிகளும் ஏழைகளுக்காகவும் ஒடுக்கப்பட்ட மக்களுக்காவும் கண்ணீர் வடித்தன . உதவிக்கரம் நீட்டின . ஆனால் ஏழ்மைக்கும் ஒடுக்குமுறைக்கும் அடிப்படைக் காரணம் என்ன என்பதை மட்டும் சொல்ல மறுத்தன . இங்கேதான் மார்க்சியம் விதிவிலக்காய் எழுந்தது . “ தானே எல்லாம் மாறும் என்பது பழைய பொய் ; தனியுடைமைக் கொடுமைகள் தீரத் தொண்டு செய்! “ என்றது மார்க்சியம்.

பசிப்பிணி போக்க அட்சய பாத்திரத்தை மணிமேகலை நமக்கு காட்டியது .பசியைப் பிணி என்று சொன்ன வகையில் நல்ல பார்வை . அனைவருக்கும் சோறு அளிக்க கனவு கண்டது மிக நன்று . ஆனால் அவை கனவாகவும் கற்பனையாகவுமே முடிந்து போயின .

ஏனைய தத்துவங்கள் வறுமையை வியாக்கியானம் செய்வதில் போட்டி போட்டன ; ஆனால் அதை மாற்றுவதற்கு முன்கை எடுத்தது மார்க்சியம் மட்டுமே !

ஒவ்வொரு நாட்டில் ஒவ்வொரு விதமாக ஆட்சி அமைப்பு , கொள்கைப் பிரகடனங்கள் இருக்கலாம் . ஆயின் அங்கு நிலம் ,தொழிற்சாலை ,சுரங்கம் போன்ற உற்பத்தி சாதனங்கள் யாரிடம் இருக்கின்றன என்பதுதான் அடிப்படைக் கேள்வி .

ஒரேவிதமான வாழ்க்கைச் சூழலில் வாழ நிர்ப்பந்திக்கப்பட்டுள்ள மக்கள் திரளையே வர்க்கம் என்பர் . இது வெறும் ஏழை பணக்காரன் என்ற வகைப்பாட்டுக்குள் அடங்காதது . நிலம் ,தொழிற்சாலை , சுரங்கம் , பட்டறை , வணிகம் இவற்றில் அவர் உழைப்பு சார்ந்து அவருக்குரிய இடம் தீர்மானிக்கப்படுகிறது . இதன் மூலம் உருவாகும் சமூக உறவே வர்க்கம் எனலாம் . முதலாளி / தொழிலாளி , நிலப்பிரபு /விவசாயி , கார்ப்பரேட் /கூலியடிமை , வர்த்தகர் / கூலிக்காரன் இப்படி எதிரெதிர் வர்க்கங்களாக வடிவம் பெறும் .

ஒவ்வொரு கட்சியும் / தத்துவமும்  பொதுவாக மக்களுக்கானது எனப் பேசினாலும் இறுதியில் அது மக்களில் எந்த வர்க்க நலனைப் பாதுகாக்கப் போகிறது என்பதே கேள்வி . வல்லான் வகுத்ததே வாய்க்கால் என்பது வெறும் உடல் பலம் சார்ந்தல்ல சொத்து சார்ந்தது . ஆக சொத்துடையவன் வகுக்கிற நீதி ,சட்டம் ,ஒழுக்கம் ,விழுமியம் ,அறம் எல்லாம் அவர்களின் சொத்துடைமையைப் பாதுகாக்கவே . மேல்தட்டு மக்களின் கண்ணசைவில் இயங்குபவையே . எல்லா கட்சிகளும் தத்துவங்களும் இதனைப் போதிக்கவே. பாதுகாக்கவே . இதற்கு நேர் எதிராய் கலகக் கொடி உயர்த்தி அடித்தட்டு    உழைக்கும் வர்க்கத்தின் வாழ்க்கை மேம்படுத்த அதிகாரம் அவர்கள் கைக்கு வரவேண்டும் என வரையறுப்பது மார்க்சியம் மட்டுமே ! ஆகவே மெய்யான மாற்றம் மார்க்சிய வழியில் மட்டுமே என்கிறோம் .

அதுமட்டுமல்ல ஒவ்வொரு தத்துவமும் அல்லது கட்சியும் அல்லது ஆட்சியும் உடனடி நிவாரணம் என்பதோடு திருப்தி அடைந்து விடுகின்றன .ஆயின் அதன் வேர் எது என்பதை அடையாளம் காண அக்கறை காட்டுவதில்லை . மாஸ்கோவில் மழை பெய்தால் மதுரையில் கம்யூனிஸ்டுகள் குடை பிடிப்பார்கள் எனக் கேலி பேசுவது உண்டு .ஆனால் உண்மை என்ன ? ஈரானில் யுத்தம் நடந்தால் இந்தியாவில் பெட்ரோல் விலை ஏறும் .நாம் வாழும் இப்பூமிப்பந்தின் எந்த ஒரு மூலையில் நடக்கிற நல்லதுக்கும் கெட்டதுக்கும் உலகளாவிய தாக்கம் உண்டு . குண்டுச் சட்டிக்குள் மட்டும் குதிரை ஓட்டினால் போதும் என்கிற கட்சிகளுக்கு இது புரியாது .இதனை பேசமாட்டார்கள் .  உலக அரசியல் முதல் உள்ளூர் அரசியல் வரை அனைத்தையும் ஒருங்கிணைத்து அறிவியல் பூர்வமாக அலசி பிரச்சனைகளுக்கு விடை தேடுவது மார்க்சியம் மட்டுமே !

 “நோய்நாடி நோய்முதல் நாடி அதுதணிக்கும்

வாய்நாடி வாய்ப்பச் செயல்.”  [ குறள் : 948 ]

இந்தக் குறளுக்கு விளக்கம் தேவை இல்லை .படித்ததும் புரியும் .

ஆயினும்  விளக்கத்தையும் அறிவோம் .கலைஞர் மு.கருணாநிதி எழுதிய விளக்கம் என்ன வெனில் “நோய் என்ன? நோய்க்கான காரணம் என்ன? நோய் தீர்க்கும் வழி என்ன? இவற்றை முறையாக ஆராய்ந்து சிகிச்சை செய்யவேண்டும். (உடல் நோய்க்கு மட்டுமின்றிச் சமுதாய நோய்க்கும் இது பொருந்தும்). அடைப்புக்குறிக்குள் எழுதியதும் அவரே !

அடைப்புக் குறிக்குள் அவர் எழுதியதும் சரியே . வறுமை ,வேலையின்மை ,ஏற்றதாழ்வு ,ஒடுக்குமுறை , பொருளாதார சமத்துவமின்மை ,சமூக சமத்துவமின்மை இப்படி சமூகத்தைப் பீடித்துள்ள அனைத்து நோய்களையும் அதற்கான காரணங்களையும் அதன் விஷ வேர்களையும் பழுதற விளக்கி அதற்கான தீர்வையும்யும் முன்மொழியும் ஒரே தத்துவம் மார்க்சியம் மட்டுமே . ஆகவேதான் மார்க்சியமே ஒரே தீர்வென உறுதியாகச் சொல்கிறோம்.

‘விலைவாசியைக் குறை’ என்பதை ஒரு பொருளாதாரக் கோரிக்கையாக மட்டும் பார்ப்பது ஓர் அரசியல் . அதனை அரசியல் பொருளாதாரக் கொள்கை சார்ந்த பிரச்சனையாக அணுகுவது மார்க்சியம் மட்டுமே !

அண்மையில் ராகுல் காந்தி தமிழ்நாட்டுக்கு வருவது குறித்த அறிவிப்பில் , ‘அவர் கல்வி ,வேலை பற்றி மட்டுமே பேசுவார் ; அரசியல் பேசமாட்டார்’ என அறிவித்தனர் . கல்வியும் வேலையும் பற்றி பேசுவது அரசியல் அல்லாமல் வேறென்ன ? மார்க்சியர் அதனை ஓர் அரசியல் போராட்டமாகவேப் பார்க்கின்றனர்.

அரசியல் ,சமூகம் ,பொருளாதாரம் , பண்பாடு , அறிவியல் என ஒவ்வொன்றையும் தனித்தனி துறைகளாக மட்டுமே பார்ப்பது ஓர் வகை தத்துவம் .கிட்டத்தட்ட எல்லா தத்துவ போக்குகளும் அவ்வழிதான் செல்லும் . எல்லாவற்றையும் ஒருங்கிணைத்தும் தேவையானதை தனித்து கூர்மைப் படுத்தியும் பார்க்கிற பார்வை மார்க்சியத்துக்கு மட்டுமே உரிய ஒன்று .அதுதான் சரியான தீர்வுக்கு இட்டுச் செல்லும்.

2000 ஆயிரத்தின் துவக்க தசாப்தங்களில் அமெரிக்காவில் நடந்த ‘வால் ஸ்ட்ரீட் போராட்டம்’ நினைவிருக்கிறதா ?  “ நாங்கள் 99 சதம் நீங்கள் 1 சதம்” என்பதே போராட்ட முழக்கம் . ஒரு சதம் கார்ப்பரேட் முதலாளிகள் லாபவெறிக்கு 99 சதம் மக்கள் பாதிக்கப்பட வேண்டுமா என்பதுதான் கேள்வி . முதலாளித்துவம் எந்தனை வடிவம் எடுத்தாலும் பெயர் தரித்தாலும் அவை அனைத்தும் சுரண்டல் வர்க்க தத்துவங்களே ! கேடயங்களே ! உழைக்கும் மக்கள் வாளும் கேடயமும் மார்க்சியம் மட்டுமே !

அப்படியாயின் வேற்பல தத்துவ முகாம்களும் கட்சிகளும் ஏன் என்கிற கேள்வி இயல்பானது .  பல்வேறு வர்க்கங்களும் சமூக அடுக்குகளும் நிலவும் சமூகத்தில் அவரவர் வர்க்க நலன் சமூக அடுக்கின் நலன் இவற்றைப் பாதுகாக்க பல்வேறு முகாம்கள் தவிர்க்க முடியாதது . உழைக்கும் வர்க்க நலனைப் பாதுகாக்க உழைக்கும் வர்க்க ஆட்சி அதிகாரத்தை நிறுவ ஒரே வழி மார்க்சியம் மட்டுமே . அதே வேளை மார்க்சிஸ்டுகள் தனிக்காட்டு ராஜாவாக பயணிக்கும் சூழல் இல்லை .ஆகவேதான் இடது முன்னணி ,இடது ஜனநாய முன்னணி போன்ற பல படிக்கட்டுகளை மார்க்சிஸ்டுகள் வியூகமாக முன்னிறுத்துகின்றனர் . இதனை முன் கேள்வி பதிலில் பார்த்தோம். அதனை நினைவிற்கொள்ள வேண்டும் .

நிரந்தர மாற்றம் என கேள்வியாளர் குறிப்பிடுவதில் மாறுபடுகிறோம் . மாற்றம் என்பது தொடர் நிகழ்வு , உற்பத்திக் கருவிகளின் வளர்ச்சி ,அறிவியல் முன்னேற்றம் இவைகளுக்கு ஏற்ப உழைக்கும் மக்கள் வாழ்வும் வளமும் மேம்பட்டுக்கொண்டே இருக்க வேண்டும் என்கிற திசை வழிதான் மார்க்சியம். தொடர் முன்னேற்றத்தின் முகவரிதான் மார்க்சியம்.

- சு.பொ.அகத்தியலிங்கம் .

03 /10 /26.

குறிப்பு : ஒவ்வொரு சனிக்கிழமையும் ‘கேள்வி -பதில்’ வெளிவரும் . நீங்களும் கேள்விகளை அனுப்பலாம். முந்தைய கேள்வி பதில்களை வாசிக்க  akatheee.blogspot.com