அந்த கொடிய மிருகம்

எந்த நூற்றாண்டைச் சார்ந்தது ?

நெருப்பை உமிழும் கண்கள்

இரத்தம் ஒழுகும் வாய்

விஷத்தைக் கக்கும் நாக்கு

மனிதத்தைக் கிழிக்கும் விரல்கள்

வீட்டில் வளர்ப்பரோ

அந்த கொடிய மிருகத்தை ?

நாட்டில் உலவ விடலாமோ

அந்த விஷ ஜந்தை !

அந்த மிருகம் வளர்ப்பு பிராணி அல்லவே அல்ல !

காட்டுப் பிராணியும் அல்ல

நாட்டுப் பிராணியும் அல்ல

ஈரமில்லா இதயமும்

மரத்துப்போன மூளையும்

அழுகிநாறும் ஆன்மாவும்

மொத்தமாய் கொண்ட

அந்த கேடுகெட்ட மிருகத்தை

வாரி அணைத்து ஊட்டி வளர்க்கும்

எவனும் எவளும் மனித ஜன்மம் அல்ல !

கண்டால் காறி உமிழுங்கள்

காலில் கிடப்பதைக் கழட்டி

விரட்டி அடியுங்கள்

’வெறுப்பு அரசியல்’ எனும்

விநோத ஜந்துவை !

அந்த கொடிய மிருகம்

எந்த நூற்றாண்டைச் சார்ந்தது ?

 “நிறுத்து ! நிறுத்து ! நீ சொல்லும்

’ஜந்து’ எதுவும் எம் மிருகராசியில் இல்லை !

இனியும் எம்மைக் கேவலப்படுத்தாதீர் !

மதிகெட்ட மனிதர் செயலைக் காட்டி !”

சுபொஅ.

08/05/25.