இதயத்தில் ஈரமும் நம்பிக்கையும்

இதயத்தில் ஈரமும் நம்பிக்கையும் 

யுகந்தோறும் மாறுதல் என்பது பழங்கனவாச்சு

கணம்தோறும் மாற்றம் என்பதே நிகழ்காலமாச்சு .

ஈடு கொடுக்க எங்கும் எதிலும் பெரும் போராட்டம்

எல்லோருக்கும் எதையோ இழந்த திண்டாட்டம்  

லாபவெறி பெரும்பசி நுகர்வுவெறி பெரும்பசி

பதவிவெறி பெரும்பசி பணவெறி பெரும்பசி

வெறிகொண்ட பூதத்தை மேலும்  வெறியேற்ற

சாதிவெறி மதவெறி இனவெறி  போதையுச்சம் !

தீயவர் நானென திமிருடன் தெருவினில் ஆட்டம்

ஊரவர் அவர்முன்  கிடந்தனர் நைந்ததுணியாட்டம்

மூளையிடுக்கெலாம் அப்பியது பயம் , மூடத்தனம்

இதயத்தில் ஈரமும் நம்பிக்கையும் மிஞ்சுமோ இனி

மாறுதலின் வேகத்தை எதிர்கொண்டு புதிதாக்கி

மானுடத்தை வாழவைக்க வீயூகத்தை புதிதாக்கி

நொடிதோறும் நொடிதோறும் ஆதிக்க சதியை

பொடியாக்கி புழுதியாக்கி முன்னேறு புதிதாக !!

சு.பொ.அகத்தியலிங்கம்.
28 ஜூலை 2019

Top of Form