அதிமருதம் ராமசுப்பு …

Posted by அகத்தீ Labels:

 

 

சிறுகதை – 2.

[ பிரச்சார சிறுகதையே என உறுதி அளிக்கிறேன்.]

 


அதிமருதம் ராமசுப்பு …

சு.பொ.அகத்தியலிங்கம்.

 

ராமசுப்புவை உங்களுக்குத் தெரியுமா ? மகாயோக்கியர் .இதை அவரே பலமுறை சொல்லியிருக்கிறார் .

 

நெற்றியில் திருநீற்றுப் முப்பட்டை ,அதன்மேல் ஒரு சந்தணப் பட்டை , நடுவில் குங்குமம் என தெய்வ கடாட்சமாய்த் திகழ்வார்.

 

இந்த கோலமே அவருக்கு ஒரு பெரிய மனிதத் தோரணையைத் தந்திருந்தது .

அதிகாலை 4.30 மணிக்கு கதவைத் தட்டிய வேணு என்கிற வேணுகோபாலுக்கும் இப்படித்தான் காட்சி அளித்தார் .

 

முதல் நாள் இரவு 10.30 மணிக்கு வீட்டில் சந்தித்தபோதும் இப்படியேதான் இருந்தார் . இரவு தூங்குவாரா என்பதுதான் வேணுவுக்குச் சந்தேகம் .

 

அலுவலகத்தில் இவரைச் சுற்றி எப்போதும் ஒரு கூட்டம் இருக்கும் .யாராவது கேட்ட கேள்விக்கு புராணத்தில் இருந்தோ ஆன்மீக குட்டிக்கதைகளோ  இல்லாமல்  பதில் சொல்லவே மாட்டார் .

 

கொஞ்சம் நகைச்சுவை, லெளகீகம் எல்லாம் கலந்து அடிப்பார். பெண்களுக்கு சமையல் டிப்ஸ் ,சடங்கு பூஜை டிப்ஸ் கொடுப்பதில் மன்னன் . பெண் ரசிகர்களுக்கு கேட்கவா வேண்டும் ?

 

ஓய்வு பெற இன்னும் ஐந்து வருடங்கள் உள்ளன . அதற்குள் டிப்பார்ட்மெண்டில் ஏ டி அதுதான் அசிஸ்டெண்ட் டைரக்டர் ஆகிவிட முயன்று கொண்டிருக்கிறார் .

 

எல்லா ஜி ஓ க்களையும் கரைச்சு குடிச்சுகிட்டு இருக்கார் . ஒருத்தன் மட்டும் இவனுக்கு பத்துநாள் சீனியராக குறுக்க நிக்கிறான் . எப்படி அவனத்தள்ளிட்டு  மேலவரதுன்னு மூளையைக் கசக்கிட்டு இருக்கார் .

 

அலுவலக உணவு இடை வேளையில் இப்போதும் அதே யோசனையில் இருந்தவரை , வழக்கம்போல பெண்களின் வருகை கலைத்துவிட்டது .

 

“என்ன சார் ! ஏ டி கனவுதானா ?” என சியாமளா கலாய்க்க ,

 

“ இல்லை … இல்லை …சும்மா கொஞ்சம் ரிலாக்ஸ் பண்ணினேன்” ன்னு சமாளித்த ராமசுப்பு வழக்கமான ரீலுக்கு தயாரானார் .

 

 “ சார் ! எவ்வளவு காசு வந்தாலும்  கையில தங்கவே மாட்டேங்குது … என்ன செய்றதுன்னு புரியல…” என பத்மா பல்லவி வைக்க ,ஹேமா ,ரெஜினா எல்லாம் ஒத்து ஊதினார்கள்

 .

 

 “ நான் சொன்னா கேலி செய்வீங்க இவ்வளவு கஷ்டத்துகும் காரணம் நம்ம வீட்டில பொம்பளைங்க செய்ற சின்னத் தப்புதான் . அதைச் செய்யாமலிருந்தால் பாதி கிணறைத் தாண்டிடலாம் .

 

அப்புறம் ஒரு சின்ன விஷயத்தை மட்டும் செஞ்சீங்கன்னு வச்சுக்குங்க கைப்பணம் குறையாது கூடிக்கிட்டே போகும் …”

 

” சொல்லுங்க சார் ! சொல்லுங்க சார் !” என கோரஸாக பெண்கள் கேட்க ,ஞானத் திமிரோடு சுற்றி நோட்டம் விட்டார் .

 

ராமசாமி நெருங்கி வந்து ஓர் நமட்டுச் சிரிப்போடு பார்த்துவிட்டு கொஞ்சம் தள்ளி உட்கார்ந்து அரட்டைக் கச்சேரியில் பட்டும்படாமலும் இருந்தான். .

 

 “ நம்புறவங்களுக்குத்தான் சொல்றேன் .. மற்றவங்க இந்தக் காதுல கேட்டு அந்தக் காதுல விட்டுருங்க…” என்றார் ராமசுப்பு .

 

இது ராமசாமிக்குன்னு எல்லோருக்கும் தெரியும்.

 

வழக்கமாக இவர் அடிக்கிற டயலாக்தான் எனவே அதைப் பற்றி சட்டை செய்யாமல் , “ சொல்லுங்க சார்!”ன்னு வாயைக் கிளறியது பெண்கள் ஜமா .

 

 “ யாரும் என்ன தப்பா நினைக்காதீங்க .. பொம்பளைங்க ஆபீஸ் போற அவசரத்துல காலையிலே சமையலெல்லாம் முடிச்சிட்டு , ஒரு வாய் காபிய குடிச்சிட்டு …”

 

“ அதுகூட நாங்க குடிக்கிறதுக்குள்ளே ஆறிஅலந்து போகுது…”

 

 “ சரி ! அத குடிச்சிட்டு அப்புறம்தான் குளிக்கிறீங்க , ஆபீஸ் கிளம்புறீங்க… அதுதான் தரித்திரத்துக்கு மூல காரணம் ,

 

காலையில பிரம்ம முகூர்த்ததில குளிச்சிடணும் … அதுக்கு முன்னாடி அடுப்படிய தொடைச்சி சுத்தமாக வச்சிடனும் …”

 

 “ பிரம்ம முகூர்த்தம்னா ?” பத்மா சந்தேகம் கேட்க

 

 “ காலையில  4 - 4.30..”

 

 “ சார் ! அது வேறொண்ணுக்கு நல்லதுன்னு அண்ணைக்குக்கு கணேசனுக்கு உபதேசம் செஞ்சிங்க..” என ராமசாமி குறுகே புகுந்தான்.

 

 “ ராமசாமி ! அது புதுசா கல்யாணமானவங்களுக்கான டிபஸ்…” என நெளிய பெண்களும் புரிஞ்சுகிட்டு கமுக்கமா சிரிச்சாங்க…

 

 “ ராமசாமி ! உனக்கு பிடிக்கைலைன்னா விடு ! குறுக்க வராதே “ என ராமசுப்பு ஒரு தடா போட்டு பின் தொடர்ந்தார் .

 

 “ பிரம்ம முகூர்த்தத்தில குளிச்சிட்டு மற்ற காரியங்கள கவனியுங்க பிராப்ளம் பாதி ஓவர்..”

 

 “ சார் ! மீதி ?” என சியாமளா கொக்கி போட , புன்சிரிப்போடு தம் அஸ்திரம் வேலைசெய்ய துவங்கிவிட்ட திருப்தியில் தொடர்ந்தார் ;

 

 “ அதிமருதம் அதிமருதம்னு  ஒரு மூலிகை இருக்கு . அது உங்களுக்குத் தெரியும் , அது எப்படி நம்ம முகத்தை சாப்டா வைக்க ஹெல்ப்பண்ணும்னு ஏற்கனவே சொல்லியிருக்கேன் ..

 

இந்த அதிமருதத்தை பற்றி நம்ம வேதங்களிலே பிரம்மாதமா சொல்லி இருக்கு , அதை கொஞ்சம் வாங்கி சின்ன சின்னதா வெட்டி  ஒரு சுத்தமான கிண்ணத்தில போட்டு …..

 

வெள்ளிக் கிண்ணம்மா இருந்தா இன்னும் விஷேசம்  , நெய்யில ஊறவச்சு பூஜை அறையில வையுங்க மறு நாள் எடுத்து நல்ல தொடச்சி மஞ்சள் குங்குமம் வச்சி …”

 

 “ இதை எல்லாம் குளிச்சிட்டு செய்யணுமா ?” – இது கிரிஜாவின் சந்தேகம்.

 

 “ கண்டிப்பா எல்லாமே குளிச்சதுக்கு அப்புறம்தான் … சுத்தபத்தமா இருக்கச்சதான் செய்யணும் … அந்த நாட்களிலே செய்யக்கூடாது ..”

 

கிரிஜாவுக்கு எல்லாம் விளங்க சிரத்தையோடு தலையாட்ட , தொடர்ந்தார்,

 

 “ அந்த குச்சிகள குத்து விளக்கு மூன்னாடியோ சாமிபடம் முன்னாடியோ வச்சு குலதெய்வம் நாமத்தை நூறுதரம் ஸ்தோத்திரித்து பூ தூவி வணங்கணும் .

 

இப்ப அது அதிமருதமல்ல அபூர்வ சக்தி கொண்ட வஸ்து .அதை உங்க பீரோல ரூபாமேலேயோ நகையேலேயோ அரிசி பாணையிலேயோ வச்சிடுங்க பணம் சேருமே தவிர குறையாது ,

 

ரெஜினா நீங்க இந்த குச்சிய வச்சு ஒங்க ஏசுநாதரை கும்பிடுங்க அது போதும் எல்லா சாமியும் ஒண்ணுதான் ” சொல்லிகிட்டு சிவ… சிவா என பக்தியோடு கன்னத்தில் போட்டுக்கொண்டார் .

 

 “ சார் ! இத நம்ம பினான்ஸ் மினிஸ்டர் நிர்மலா சீத்தாராமண்ட்ட சொல்லக்கூடாதா ? நம்மள இப்படி ஜிஎஸ்டி ,பெட்ரோல்விலை ,கேஸ்விலைன்னு தாளிக்காம இருப்பாங்கள்ள… “

 

என்று ராமசாமி  வெடிகுண்டை வீச ,கூடியிருந்தோர் கொல்லென சிரிக்க ராமசுப்பு மூஞ்சி அஷ்ட கோணலானது…

 

 “ நீ எதையும் ஒத்துக்க மாட்டே … ஆளவிடு …”

 

கூட்டம் கலைந்தது .  “ஆபீஸ் போற பொம்பள கஷடம் தெரியாம பிரம்ம முகூர்த்தம் சிவ முகூர்த்தம்னு கதை விடுறாங்கப்பா …

 

காலையில டிபனையே பஸ்ல ரயிலிலே சாப்பிடுறதாப் போச்சு நம்ம பொளப்பு ..” பத்மா அங்கலாய்க்க எல்லோரும் “ஆமாம்” போட்டபடியே நகர்ந்தனர்.

 

 “ சார் ! அதைவிடுங்க காலையில என் சீட்ல வந்து தேடுனீங்களாமே..” என ராமசாமி சாதாரணமாக பேச்சை மடைமாற்றக் கேட்டான் .

 

 “ ஒண்ணுமில்ல ராமசாமி ! நம்ம அப்ளிகேஷன் எந்த நிலையில இருக்குன்னு ..கேட்கத்தான் வந்தேன் ..” ராமசுப்பு யதார்த்தமாகச் சொல்ல …

 

   அந்த லோண் அப்பிளிகேஷன்தானே …நெக்ஸ்ட் மண்டே வந்திரும்னு” இப்படி சொன்ன ராமசாமி அத்தோடு நிக்காமல் குறும்போடு ஒரு கேள்வியைக் கேட்டான் ,

 

“ ஏன் சார் ! உங்க வீட்ல இந்த அதிமதுரக் குச்சி எல்லாம் இல்லையா ?”

 

பெண்கள் கூட்டம் சிரித்தபடியே திரும்பிப் பார்த்தது .

 

ராமசுப்பு பல்லைக் கடித்தபடி ராமசாமியைத் திரும்பிப் பார்த்தார்.

 

அப்புறம் ஓர்நாள் வழக்கம் போல் ஆபீஸில் நுழைஞ்ச ராமசுப்பு கிரிஜாவைக் காணமால் துளாவினான் ,  “ சார் ! கிரிஜாவுக்கு ஜேண்டீசாம் …” சியாமளா சொல்ல ; மெல்ல எல்லோரும் அங்கே கூடனார் .

 

 “ அதுக்கு பயப்படவே தேவையில்லை . உப்பில்லாம மோர் ஊற்றி பழைய சாதம் சாப்பிடணும் ஒரு வாரம் கீழாநெல்லி சாற்றை மோர்ல கலந்து வெறும் வயிற்றில குடிக்கணும் …

 

சுற்றி ஒரு முறை பார்த்திட்டு … ஒரு தட்டுல கொஞ்சம் துளசி , வில்வம் ,சாமந்திப்பூ , குங்குமம் , ஒரு எலுமிச்சம் பழம் ஐந்தையும் வைத்து சாமி முன்னால வைத்து கும்பிடணும் … எல்லா கஷ்டமும் பறந்தே போயிடும்…” ஒரு பெரிய பிரசங்கமே அடித்து முடித்தார் ராமசுப்பு .

 

 

 “ கீழாநெல்லி லிவருக்கு நல்லதுதான் . ஆனா எதையும் மருத்துவ ஆலோசனை பெற்றே செய்யணும் .மஞ்சக்கா மாலை பல வெரைட்டி இருக்கு .சாதாரணமா வர்ற ஜேண்டிஸ்க்கு கீழாநெல்லியும் பழைய சோறும் மோரும் போதும் ,…” என ராமசாமி முடிக்கும் முன்பே…

 

 “ அதத்தான அவரும் சொன்னாரு , கீழாநெல்லி சாப்புடுறதில உங்களுக்கு என்ன பிரச்சனை…” என சியாமளா கேட்டார்

 

 “ நான் அதை வேண்டாம்னு சொல்லலை ஆனால் ஒயிட் ஜெண்டீஸ் ரொம்ப ஆபத்து ; இன்னும் பல இருக்கு …

 

நம்ம ஆபிஸிலேயே மணிகண்டன் சார் மாதிரி சொன்னவங்க பேச்ச கேட்டு நடந்து நோய் முற்றி ஆஸ்பத்திரியில சேர்ந்து அப்புறம் மீண்டார் தெரியுமில்லையா ?

 

நோய் பாதிப்பு எவ்வளவுன்னு தெரிஞ்சு வைத்தியம் செய்யுங்க பிளட் , யூரின் செக் பண்ணச் சொல்லுங்க …

 

டாக்டர பார்த்து யோசனை கேளுங்க.. எல்லோரும் வைத்தியராகிராதீங்க… வாட்ஸ் அப் வைத்தியம் ரொம்ப ஆபத்து…”

 

 “ இதுக்கெல்லாம் இங்கிளீஸ் வைத்தியம் சரிப்பட்டு வராது சார் ?” பத்மா சொன்னார் .

 

 “ நான் இங்கிளீஸ் வைத்தியம் ,தமிழ் வைத்தியம் ,மலையாள வைத்தியம்னு சொல்லலையே ..

 

மொறையா படிச்ச வைத்தியரைக் கேளுங்க ..

 

இரத்த பரிசோதனை , சிறுநீர் பரிசோதனை போன்ற மருத்துவ விஞ்ஞானம் இங்கிளீஸ் வைத்தியத்துக்கு மட்டுமானதல்ல …

 

மருத்துவ விஞ்ஞானம் எல்லோருக்குமானது…”

 

மெல்ல கூட்டம் கலைந்தது .நாட்கள் வேகமாய் ஓடின .

 

நீண்ட மருத்துவ விடுப்புக்குப் பின் கிரிஜா அலுவலகம் வந்தார் . எலும்பும் தோலுமாய் ஒட்டி உலர்ந்து இருந்தாள் .ஒவ்வொருவராய் வந்து விசாரித்தபடி இருந்தனர் .ராமசுப்புவும் ராமசாமியும் ஏதோ பேசிக்கொண்டே அருகே வந்தனர் .

 

 “ ராமசாமி சார் ! ரொம்ப நன்றி ! நீங்க அண்ணைக்கு கட்டாயபடுத்தி டாக்டர்ட்ட கூட்டிட்டு போகலைன்னே நான் இண்ணிக்கு உயிரோடு வந்திருக்க மாட்டேன் .

 

அது வெறுமே மஞ்சள்காமாலை மட்டுமல்ல என் லிவரும் கடுமையாகப் பாதிக்கப்பட்டிருந்தது … ஜெஸ்ட் எஸ்கேப்ன்னு சொல்லுவாங்களே அதுபோல தப்பி பிழைச்சு வந்திருக்கேன் சார் !

 

நீங்க சொன்னது நூற்றுக்கு நூறு உண்மைதான் சார் ! வாடஸ் அப் வைத்தியமும் வாய்ச்சவடால் வைத்தியமும் சாவை வெற்றிலை பாக்கு வச்சு அழைக்கிறதுக்கு சமம் …”

 

 ராமசுப்பு பேச்சற்று நின்றான்.

 

அலுவலகத்தில் விரைவில் ஓய்வுபெறப்போகும் சியாமளாவுக்கு வழியனுப்பு விழா நடத்துவது பற்றி மாலையில் எல்லோரும் கூடிப் பேசிக்கொண்டிருந்தனர்.

 

அங்கே வந்த ராமசாமி , “ வாழ்த்துகள் ராமசுப்பு சார் ! தெரியுமா சேதி , வேணுகோபால் சார் விஆர்எஸ் கொடுத்திட்டாரு ..இனி நீங்க தான் ஏ.டி …” என புதுத்தகவலைச் சொல்ல எல்லோரும் வாவ் என சந்தோஷக் கூச்சலிட்டனர் .

 

 “ நான் செஞ்ச பூஜை என்ன கைவிடலை”,என சொல்லி வானத்தைப் பார்த்து கும்பிட்டார் .

 

அந்த நேரம் பார்த்து , வேணுகோபாலும் அங்கே வந்தார் .அவரைச் சுற்றி எல்லோரும் சேர்ந்தனர் . ஆளுக்காள் விசாரணை .

 

வேணுகோபால் விளக்கம் சொன்னார் , “ உங்களுக்குத் தெரியும் தானே ஒய்ப் நெல்லூர்ல டீச்சர் .நான் இங்கு வாரவாரம் போய்வந்து போய்வந்து சோர்ந்து போயாச்சு .

 

அவ ரிட்டயர்ட் ஆக இன்னும் பத்து வருஷம் இருக்கு எனக்கு ஐஞ்சு வருஷம்தான் .குழந்தையா குட்டியா ஏன் ஆளுக்கொரு பக்கம் கிடக்கணும் ?

 

அவா ஸ்கூல்ல குழ்ந்தைகளோட இருந்தாத்தால் சந்தோஷமாக இருப்பா .. அதனால பேசி நான் விஆர்எஸ் கொடுத்திட்டேன் …

 

நான் சிறிய அளவு புக் டிரான்ஸ்லேஷன் செய்றது உங்களுக்குத் தெரியும்தானே  இனி அதுல முழுசா இறங்கலாம்ன்னு இருக்கேன்…”

 

வேணுவின் முடிவில் நியாயமும் தர்க்கமும் இருப்பதைக் கண்டு எல்லோரும் பாராட்டினர் .

 

கூட்டம் முடிகிற நேரத்தில் வந்த அட்டண்டர் சாமிக்கண்ணு நேராக ராமசுப்பு காதில் ஏதோ கிசுகிசுத்தான் .

 

“ அப்பாடா ! நிம்மதி!”ன்னு ராமசுப்பு ஆசுவாசமானார் .

 

என்ன பேசியிருப்பார் ,கிட்டத்தட்ட எல்லோருக்கும் ரகசியமாக தெரிந்த சேதிதான் ,

 

வாங்கிய கடன் வட்டியும் அசலுமாய் கழுத்தை நெரிக்க ராமசுப்பு திணறினார் இரண்டுநாளா வேணுவும் சாமிக்கண்ணும் ஈட்டிக்காரண்ட்ட பேசி வட்டியத் தள்ளுபடி செஞ்சு அசல மட்டும் பத்து தவணையாக கொடுக்க வழி செய்தனர் .கடைசியாக அத ஒப்புக்கொண்ட சேதிதான் அது .

 

ராமசுப்புவின் புனிதம் மெல்ல கரைந்து கொண்டிருந்தது . பிள்ளகுட்டி இல்லாத ராமசுப்புவுக்கு அப்படி என்னதான் செலவு , மாதமாதம் திருப்பதி போறாரா அந்த செலவோ பத்மாவும் ரெஜினாவுக் குசுகுசுவென பேசிக்கொண்டிருந்தனர் .

 

இதற்கிடையில் ஓயுபெறப்போகிற சியாமளா ஒவ்வொருவரிடமும் அந்நியோன்யமா பேசி அவரவருக்கு தனித்தனியாக மெஜேஸ் சொல்லிகிட்டு வந்தா ராமசுப்பு அருகே வந்தவர்,

 

 “ சார் ! நீங்க வேலையில சேரும் போது உங்க நாமனியா உங்க அம்மாவ போட்டீங்க ,உங்க அம்மா இறந்தாச்சு இன்னும் நாமனிய மாற்றவே இல்லையே..”

 

 “ அது என்ன மேடம் கேள்வி , செளமியா மாமிதானே சட்டப்படி வாரிசு” – கிரிஜா அப்பாவியா தெரியாத மாதிரி கேட்க ,

 

 “ அதெப்படி சட்டபூர்வமாக கல்யாணம் பண்ணிக்கிட்ட கனகா மாமி திருப்பதியிலே இருந்து தடியோடு அடிக்க வரமாட்டாங்க..” என வேணு விஷயத்தைப் போட்டுடைக்க , அலுவலகத்தில் லேசுமாசாக உலவின செய்தி முழுசா அம்பலமாச்சு …

 

 ராமசுப்பு மெல்லவும் முழுங்கவும் முடியாமல் தவித்து நின்றார் ..

திருப்பதி சமாச்சாரம்  கடன்  சமாச்சாரம் என எல்லாம் ராமசுப்புவை மவுனமாக்க … ஆளுக்காள் ஒருத்தரை ஒருத்தர் பார்த்துகிட்டு சிரிப்பை முழுங்கிகிட்டு நின்னாங்க .

 

 “ சார் ! ஊருக்கெல்லாம் அதிமருத டெக்னிக்கை சொன்ன நீங்க கனகா மாமி,செளமியா மாமி இரண்டு பேருக்கும் சொல்லவே இல்லையா ?” ராமசாமி நேரம் பார்த்து வெடியை வீச

 

எல்லோரும் கொல்லென சிரித்தனர் .

 

அதில் சிந்தனை பொறந்திருக்குமோ ?

 

( அதிமருதம் விவகாரம் ஓர் வாட்ஸ் அப் குழுவிலும் முகநூலிலும் படித்தது.)

 

***

 

0 comments :

Post a Comment